Ami Mes i Mi Logronan kampion Titans Softball Tournament i resultado Liga van Engelen
WILLEMSTAD- Ekipo Ami Mes i Mi Logronan a gana di The New Radiator 13 pa 2 i bira kampion di Titans Softball Tournament organisá pa Quick 60. Ekipo Ami Mes i Mi Logronan ta di spònser pa Around The Clock enkabesá pa Ramiro Balentina. Ramiro Balentina mes a dal dos homerun den e wega final. E wega tabata den kategoria Soshal Plus.
Swift a gana Jaws 9 pa 3 i ta keda invikto den Liga Van Engelen
WILLEMSTAD- Swift a gana nan di 15 wega sigí den Liga van Engelen den 2022 djadumingu ultimo. Swift a dal nan rival Jaws ku skor di 9 pa 3. Randolph’ Randy’ Kirindongo tabata e picher habridó i ganadó pa Swift. Ela tira 6 inning i tuma solamente 3 kareda. Falta un wega mas pa start ku play-off. Swift ta sigi invikto rumbo pa play-off. Play-off lo start dia 4 di desèmber i wikènt benidero tin último weganan di buelta regular. Standing Liga van Engelen faltando un wega ta Swift 15-0, Clase Aparte 11-4, Jaws 10-5, Quisqueya 9-6, Navegantes 8-7, Bucaneros 6-9, The Kings 5-9, Big Leaguer 2-11 i Renegados 0-15.
RESULTADONAN
Clase Aparte 11, The Kings 1
Clase Aparte tabatin 9 hit i nan a hunga sin eror. Richene Martina a gana i Ramiro Balentina ku Shurby Sambo, ámbos a bai di 1-1. Geriyon Jakob, Leroy Antonia, Richene Martina, Regino Winklaar ku Naimruni Schoop, tur a bai di 2-2 i Ulrich Snijders a bai di 2-2. Geriyon Jakob ku Ulrich Snijders, ámbos a konektá 1 homerun. The Kings a dal 5 hit i nan a hasi 3 eror. Jourmaine Josepha a pèrdè. Jason Kleinmoedig, Jourmaine Josepha, Themesh Lourens i Shanon Kleinmoedig, tur a bai di 2-1.
Swift 9, Jaws 3
Swift a dal 10 hit i nan a kometé 2 eror. Randolph Kirindongo tabata ganadó i Dicson Acosta a bai di 1-1.
Randolph Kirindongo ku Isaac Palencia, ámbos a bai di 3-2. Jegveny Hendrik a konektá 1 homerun. Jaws tabatin 8 hit i nan a hunga sin eror. Adriaan de Freitas a resultá pèrdèdó. Kevin Boekhoudt a bai di 3-2 i Fritzgerald Girigorie a bai di 4-3.
Quisqueya 16, Renegados 8
Quisqueya a konektá 19 hit i nan a kometé 3 eror. Fernando Rosario a gana. Jonjendri Rifaela ku Jesus Gonzalez Reyes, ámbos a bai di 2-1. Jonathan Pascual a bai di 2-2. Yensi Lopez Herasme, Rigoberto Ramos Rodriguez, Fernando Rosario ku Luis Velos Peña, tur a bai di 4-2. Carlos Gil, Jonjendri Rifaela i Rylan Reina, tur a konektá 1 homerun i Mac Martina a konektá un grand slam. Pa Renegados 9 hit ku 1 eror. Walmart Galicia a bai di 2-1, Gilberto Almonte di 3-2 i Jhoan Rodriguez di 4-2.
INFORMASHON DI SÒFTBÒL I BEISBÒL
Lesadónan di Deporte Kòrsou, bontardi. Futbòl, Futbòl, Futbòl e dianan aki for di Qatar kaminda Kopa Mundial di Futbòl ta tumando lugá, pero nos ta sigi ku informashon di Sòftbòl i Beisbòl aki na Kòrsou. Fanátikonan di Argentina rabiá rabiá ayera despues ku e ekipo di Saudi Arabia a dal Argentina 2-1. Sorpresa grandi di Mundial i sigur despues ku Argentina a sali pika dilanta fásil den e wega, pa despues bin pèrdè. Alemania tambe a haña ku skor di 2-1 kontra Hapon. Laga nos ban direkt pa e weganan di Sòftbòl i Beisbòl Veterano ku ta bai tuma lugá e wikènt aki na Vi Jansen Ballpark, Van Engelen Ballpark i Frank Curiel Ballpark.
* * * * *
Nos ta start ku final di Sòftbòl 50+ ku lo tuma lugá djasabra 2’or i djadumingu 11’or entre Baranka i Jaws. Djasabra 2’or ta na Van Engelen Ballpark i djadumingu no ta konosí ainda kua parke lo hunga e wega aki. Baranka a klasifiká for di dia 29 di òktober despues ku nan a gana di Ban Serio ku skor di 22-20. Baranka a warda kasi un luna, miéntras ekipo Jaws a keda move pendiente un fecha pa hunga wega number 3 di e play-off semi-final. Weganan di dia 5 i 12 di novèmber a keda suspendé pa motibu di hopi awaseru i mal estado di Van Engelen Ballpark. Baranka ta faborito anke Jaws a hunga bon kontra Baranka e temporada aki. Jaws a gana Baranka ku skor di 21 pa 6 den e úniko wega entre e dos ekiponan aki den 2022.
* * * * *
Den e wega meshoná tabata Fernando Rosario ku tabata e picher ganadó i Kenny Hellment pèrdèdó. E dianan ei Hellary ‘Ponpon’ Plantijn tabata ku e ekipo ainda i a dal grandslam den wega ei. Na e okashon ei Jaws a usa pichernan Carlos Madera i Fernando ‘Paiza’ Rosario i Baranka tabatin Kenny Hellement i Gilbert Henrietta komo picher. Den di dos buelta ekipo Jaws a kai den otro pul i no a topa ku Baranka atrobe. Hopi diskushon naturalmente riba e wega di djadumingu, debí ku Jaws 60+ tambe tin wega djadumingu, pero e wega di Jaws 60+ di djadumingu ta 2’or i e wega di 50+ ta programá pa tuma lugá 11’or. E promé wega di e seri final, e wega di djasabra lo ta krusial. By the way, final di 50+ tambe ta djadumingu 2’or na Vi Jansen Ballpark despues ku djasabra lo tin e weganan di semi-final.
* * * * *
Ban mesora pa e play-off di Beisbòl Veterano. Skèdjel a sali i weganan ta konosí. Ku e resultado di e wikènt, no ta nesesario pa hunga e último wega di kampionato entre Sigui Hunga i Otrobanda ku a wòrdu posponé pa motibu di biahe di e ekipo di Otrobanda. Por lo tantu play-off di Liga 50 lo hunga djasabra i djadumingu awor. Manera ta konosí play-off Liga 50 (tantu final komo semi-final) ta un partido so. E ganadónan ta hunga final djadumingu i e pèrdèdónan ta hunga pa di tres puesto djadumingu.
* * * * *
Manera ta stipulá den regla, ekipo number 1 i ekipo number 2 riba e standing lo ta ekipo di kas den semi-final. Pa play-off final e ekipo ku a kaba mas haltu riba standing entre e ekiponan ku yega final, lo ta ekipo di kas. (Meskos pa e partido pa di tres lugá). Ke mèn djasabra 11’or ta Sigi Hunga kontra Yesterday ku Yesterday komo ekipo di kas. Djadumingu 2’or ta Otrabanda kontra Jandoret Raiders ku Jandoret Raiders komo ekipo di kas. Ganadónan di e wega aki lo hunga final 2’or, miéntras pèrdèdónan lo hunga pa di 3 i 4 lugá djadumingu 11’or.
* * * * *
Liga 60 su final ta sigi djadumingu ku di dos wega di final na Frank Curiel Ballpark. Ekipo Nos Tambe Por mester gana pa forsa un wega number 3. Nos Tambe Por tin 3 aña sigí kampion i por konta ku Emile Haswell djadumingu awor. Emile tabatin dos wikènt sigí na Sint Maarten. Jaws a kibra invikto di ekipo Nos Tambe Por den e promé wega di play-off, pa despues bolbe gana den e promé wega di play-off final. Durante e kampionato regular Nos Tambe Por a gana di Jaws na dos okashon.
