Amstel Bright Premier Cup a terminá ku 6 kampion dilanti un públiko grandi
WILLEMSTAD- E popular i eksitoso Amstel Bright Premier Cup 2023, e di 8 edishon di e torneo organisá pa Cicoza a terminá djadumingu 19 di mart na Van Engelen Ballpark. Un públiko grandi a disfrutá di e weganan henter wikènt pa bai kulminá djadumingu ku animashon di Gio. Kampionnan tabata Ban Serio, Swift, The New Radiator, SBAB (1), Chonchis i SBAB COED.
Despues di wega tabatin entrega di premio individual i di ekiponan.
WEGANAN FINAL
Ban Serio 7, Marlins 3 (50+)
Nonnie de Roon a tira wega kompletu pa bira e picher ganadó. Albert Pieternella a dal un homerun i empuhá 3 kareda.
Swift 9, Dream Team 5 (Modified)
Emilio Velarde tabata e picher ganadó i Jegvenny Henrik a dal grandslam.
The New Radiator 10, UoC 2
Rhenderson Thomasa a gana i Jeandely Ricardo a bati di 3-2.
SBAB 7, EWT 0 (Soshal Corporate)
Jeremy ‘Loko’Lucas tabata e picher ganadó i Jedion Cras a dal 3 homerun.
Chonchis 19, Quick (60) 9 (Soshal Open)
Jeremiah Wansing a gana i Swindley Lint a bati 4-4.
SBAB 16, Corendon/Karakter 6
Hemsley Martha a gana i e mes a dal dos homerun. Jedion Cras tambe a dal dos homerun.
Rising Phoenix ta gana Mas Goso i Nos Goso ta vense Treasure New Era
WILLEMSTAD- Rising Phoenix ta gana Mas Goso i Nos Goso ta vense Treasure New Era riba djasabra den The Diamond Stars League. Weganan a tuma lugá na Sam Bunting Ballpark.
Djabièrnè 17 di mart
Treasure New Era 17, Lady G 0
Treasure New Era a dal 18 hit i nan a kometé 1 eror. Minerva Maduro a gana. Idelmira Remilia a bai di 2-1. Suyene Otto-Apostel ku Ismairy Ignacio, ámbos a bai di 3-2. Solange Soliana a bai di 3-3. Chaunice Maduro ku Janitza Beltrian, tur dos a bai di 4-3. Lady G tabatin 5 hit ku 6 eror. Monica Noor a pèrdè.
Mirugia Bernadina, Nohah Constancia, Mairita Reigina, Genaiska Offerman ku Monica Noor, tur a bati di 2-1.
Djasabra 18 di mart
Rising Phoenix 6, Mas Goso 4
Rising Phoenix tabatin 4 hit ku 1 eror. Marie Windster tabata ganadó. Curilma Carolina, Mirugia Paulina, Ashantely Giterson ku Nethley Casper, tur a bai di 1-1. Mas Goso a dal 10 hit ku 5 eror. Shunesca Martina a resultá pèrdèdó. Arnalda Margarita ku Loeshemans Kook, ámbos a bai di 1-1. Shunesca Martina ku Angelique Fransina, tur dos a bai di 2-1. Maria Bentura ku Henmangila Bernardus, ámbos a bai di 3-2.
Nos Goso 6, Treasure New Era 5
Carlientje Cleopa a bai ku e viktoria. Gwendolyn Juliana a bai di 1-1 i Myriela Carlo di 2-1. Emmely Jonis ku Charleda Winklaar, ámbos a bai di 2-2. Fayna de Mey a bai di 3-2. Emmely Jonis a konektá 2 homerun. Pa Treasure New Era 9 hit sin eror. Suyenne Otto-Apostel a karga ku e derota I e mes a bai di 2-1. Minerva Maduro tambe di 2-1. Tanusi Delando a bai di 3-3 inkluyendo 1 homerun.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia. Nos ta den un siman kaminda lo tin weganan di semi-final i final di World Baseball Classic. Hapon a bira kampion djamars ganando di USA ku skor di 3-2. Shohei Ohtani a tira ultimo inning di e wega i poncha Mike Trout pa finalisa e wega. Ohtani a bira MVP di e World Baseball Classic ku tremendo picheo i bateo durante henrer I WBC, no den final so. USA a gana Cuba fásil 14-2 i Hapon a laga Meksiko den tereno ku skor di 5-4 djaluna. Hapon tabata faborito, pero tur kos por a pasa, nos a mira grandinan kai afó manera por ehèmpel República Dominicana. Bèk pa Amstel Bright Premier Cup. Super eksitoso e di 8 torneo Amstel Bright organisá pa Cicoza. Hopi hende mes na Van Engelen Ballpark djasabra i djadumingu.
* * * * *
Nos a wak e wega kandela di kuart final entre Puerto Rico i Meksiko. Meksiko a gana ku skor 5 pa 4. Tur kos tabata mustra ku Puerto Rico lo a bai gana fásil despues ku nan a nota 4 kareda den promé inning riba 2 homerun, unu di Javier Baez i otro di leftfielder, Eddie Rosario. Pero Meksiko ta bini bèk pa bin gana e wega. Meksiko lo enfrentá Hapon djaluna 20 di mart den Loan Depot Park den semi-final. Puerto Rico tabata ganá 4-0 for di den promé inning, después 4-1, 4-2. Meksiko komo ekipo di kas a nota 3 kareda den bòm di e di 7 inning pa bóltu e skor pa e wega kaba finalmente 5 pa 4. Kandela mes mes. Beisbòl ta keda hunga riba tereno i no riba papel. Puerto Rico mas fuerte riba papel ku Meksiko. Puerto Rico ku algun multiminario riba vèlt, República Dominicana meskos. Colombia ku a sali sorprendé Meksiko no a pasa e promé buelta. Dos ekipo ku a pèrdè nan promé wega ya den semi-final. Kada un wega ta unu.
* * * * *
USA a gana di Venezuela ku skor di 9 pa 7 den otro wega emoshonante di World Baseball Classic djasabra. Den e wega ei bálido pa kuart final Venezuela a bin bèk bon despues di tabata atras, pero e grandslam den di 8 inning tabata mortal pa Venezuela. USA a bai ariba 3 pa 0 den kabes di promé inning. Venezuela a kontestá ku dos kareda riba homerun di Arráez. USA tabata ariba 5 pa 2 den kabes di e di 5 inning. Venezuela ta nota 4 kareda den bòm di e di 5 inning i bòltu e skor i hasi e wegs 6 pa 5. Bai ariba 7 pa 5 den bòm di e di 7 inning. Den kabes di e di 8 inning USA ta nota 4 kareda riba grandslam di Trea Turner. Promé ku esei tabatin base por bola, hit i hit by pitch. E wega a bira 9 pa 7 i terminá asina ei.
* * * * *
Ban pa Slowpitch mesora. Wikènt final tremendísimo den Amstel Bright Premier Cup. Djasabra 18 di mart e wega di play-off na Van Engelen Ballpark a start kayente. Den Liga 50 ekiponan Ban Serio i Marlins a pasa pa final, ganando di Pitufos i Jaws respektivamente. Den e kategoría Modified, Swift a gana di Sugar/Bucaneros i ekipo Dream Team a gana di Cicoza i pasa pa final. Universidat di Kòrsou (UoC) i ekipo The New Radiator a pasa pa final den COED Open.
* * * * *
Djasabra awor Torneo di Jaws kategoría 60+ ta start. E torneo ta dediká na Ivan Schoobaar alias Kid Boca Chica, un dje grandinan di tur tempu di Slowpitch. Hómber ku tin mas ku 50 aña aktivo den Slowpitch i un gran picher di tur tempu. Gran kabayero tantu pafó komo padén di tereno. By the way, gran bòksdo tambe tempu di su tempu, pesei e nómber Kid Boca Chica. Kid ta loke hopi bóksdo ta haña dilanti di nan nòmber. En todo kaso e torneo lo tuma lugá den Frank Curiel Ballpark. E 8 ekiponan di 60+ ku ta partisipá den e torneo ta repartí den dos pul. Ekiponan number 1 di kada pul ta pasa pa final, miéntras number 2 ta hunga kontra otro pa di 3 lugá. Ekiponan Jaws, Pitufos, Los Amigos i Lions ta den Pul A. Nos Tambe Por, Sluggers, Curaçao Super Stars i Nos Power ta den Pul B. Nos ta keda tea ki pa awe.
