Amstel Bright Premier Cup ta sigi djasabra i djadumingu na Van Engelen Ballpark
WILLEMSTAD – Djabièrnè 3 di mart tabatin 3 wega i nos ta pendiente pa e resultadonan. Djasabra tin 16 wega i djadumingu 13 wega na Van Engelen Ballpark den tremendo ambiente serka nos amigunan di Cicoza, organisadó di Amstel Bright Premier Cup 2023. Nos tin tur resultado di wikènt pasá.
Jandoret Raiders i Ban Serio ta gana den 50+ Amstel Bright Premier Cup
WILLEMSTAD - Jandoret Raiders a gana Pitufos pèrtá ku skor di 7 pa 6. Ban Serio mester a lucha pa gana Flamboyan Tigers 5-3 den e torneo Amstel Bright Premier Cup 2023 ku ta tumando lugá na Van Engelen Ballpark. E weganan ariba menshoná a tuma lugá djasabra último. Djadumingu ekipo Flamboyan Tigers a bini bèk i gana di Marlins ku skor di 9 pa 3. Pitufos a dal Lions duru ganando 14 pa 1. Situashon ta interesante den 50+ ku tin 8 tim ta kompetí pa e título. Awe nos tin resultado di weganan ku a tuma lugá wikènt pasá.
LIGA 50
Ban Serio 5, Flamboyan 3;
Jandoret 7, Pitufos 6;
Flamboyan//Tigers 9, Marlins 3;
Pitufos 14, Lions 1.
COED
SOAB 11, ORCO Bank 4;
SBAB 14, Corendon 4;
Lab de Med 8, ORCO Bank 3.
MODIFIED
Dream Team 11, Terremoto 5;
Swift 3, Sugar/Bucaneros 1;
Swift 11, Dream Team 6;
Cicoza 8, Sugar/Bucaneros 7.
Breaking News, djasabra Jaws a gana Jandoret 4 pa 2. Marlins a sorprendé Ban Serio ganando 8 pa 5.
SOSHAL
Banco di Caribe 18, KPC 5;
CITCO 21, Digicel Group 10;
Renaissance 13, Douane 3;
MCB 10, Kefin 9;
EWT 9, Selikor 6;
EWT 14, Fraal 7;
CITCO 8, Douane 4;
VKC 13, Building Depot/JDT Transport 2;
Omni 9, Corendon /GGZ 4.
COED OPEN
The New Radiator7, Chonchi’s 3;
Fire Team 10, UoC 1.
Djabièrnè 3 di mart Santa Maria Pirates a selebrá 60 aña di eksistensia
WILLEMSTAD – Ayera, djabièrnè 3 di mart 2023, Santa Maria Pirates a rekordá e echo ku 60 aña pasá, Frank Curiel ku algun amigu di e bario di Santa Maria a funda e ekipo Santa Maria Pirates. E promé aña e ekipo tabata yama Santa Maria Giants i despues a bira Santa Maria Pirates. Tabatin un Santu Sakrifisio di misa na Misa di Santa Maria, sigí pa un seremonia i brindis na Santa Maria Ballpark se Frank Curiel. Durante e parti ofishal Frank Curiel i algun dirigente mas a dirigí palabra i lo honra algun Baluarte sigi pa un brindis. Djasabra i djadumingu lo tin weganan di Minor League, Little League, Sòftbòl Femenino Veterano i Sòftbòl Veterano 60+.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis wikènt. Nos ta bai drenta di dos wikènt di Amstel Bright Premier Cup ku ta tumando lugá na Van Engelen Ballpark. Manera semper ta e kaso di Amstel Bright Premier Cup, ku ta masha hopi fanátiko ta bai wak e weganan ku ta kulminá ku aktuashon musikal bibu di bandanan super popular. Amstel Bright Premier Cup ta organisá pa ekipo di Sòftbòl Cicoza. For di ayera, djabièrnè, 3 di mart tabatin 3 wega sigí pa awe i djasabra sigi ku weganan kandela di Liga 50.
* * * * *
Moveshonnan ta sigi den Liga 50 i hopi bista ta riba ekipo Ban Serio ku a reforsá ku dos picher kandela ku ta Michelangelo ‘Galbao’ Boekhoudt i Norman ‘Nonnie’ De Roon. Ta trata aki di dos èks Ban Serio ku a bini bèk huntu ku Jerry Booi den 2023. Eldred Estanista, Kelvin Winklaar huntu ku Jair Josepha tambe a bini bèk ku Jerry Booi. Jair Josepha i Kelvin Winklar a train kaba ku e ekipo ku ta bini fuerte den 2023 pa kita e título for di Baranka.
* * * * *
Ekiponan Among Us i Chonchi’s a bolbe duna un espektákulo den Soshal Maskulino Speshal djadumingu último. Den e wega bálido pa kampionato regular, e ekipo Chonchi’s a sali viktorioso, pero djadumingu último ekipo Among Us a demonstrá su poderío i kon ta bini bèk den e wega pa gana di Chonchi’s i bira kampion di e kategoría Soshal Maskulino Speshal den Torneo Survivors. Tur dos ekipo lo ta den Amstel Bright Premier Cup. E hungadó Jason Kleinmoedig a pone pelíkula riba vèlt tantu den bateo komo den fildeo pa bira MVP di e wega final.
* * * * *
Beisbòl Little League ta sigi den full swing den luna di mart aki rumbo pa play-off ku ta fin di aprel. Den luna di mart spònser mayor i spònser grandi di Little League ya pa 23 aña lo firma kontrakt atrobe ku Curacao Little League Foundation i liganan. RBC Royal Bank, ántes RBTT Bank, a nifiká masha hopi mes pa Little League durante e último añanan. Ta dia RBTT/RBC a kuminsá spònser Little League, éksitonan a kuminsá bini. Gobièrnu tambe ta duru tras di Little League i no papia mes di Crisma Henriqez di El Señorial ku a hinka su propio sèn (Fls.60.000.==) den un tiru den Little League.
* * * * *
Little League di Kòrsou i District Administrator a risibí bon notisia ku Junior League Latino tambe lo tuma lugá na Kòrsou den 2023. Na komienso di aña tabata sigur ku Senior League Karibe lo tuma lugá na Kòrsou ku un posibilidat chiki pa Intermediate tambe. Di Intermediate no ta sigur ainda, pero Junior si a keda konfirmà pa Kòrsou siman pasá. Senior League lo tuma lugá pa 25 di yüni pa 2 di yüli i Junior League 16 pa 23 di yüli. Kòrsou ta grandi atrobe i ta propagandá Kòrsou atrobe ku ta un isla bon organisá por tuma sede i otro retonan sin miedu.
* * * * *
Ku otro palabra, tantu den Senior komo Junior Kòrsou lo keda representá pa e dos mihó selekshonnan di Kòrsou. Mas mucha ta haña chèns di kompetí internashonalmente. Den Junior nos lo haña basta hungadó ku a kompetí den World Series di Little League na 2022, entre otro Davey Jay Rijke, D-Shawn Bonifacio, De Caster, Winklaar, K-Shore Hinkel i otronan. Tin chèns ku ta den Interemdiate nan lo hunga den 2023. Hungadónan manera Alexander Provacia, Jay-dlin Wiel sigur dos mas ku a hunga den e selekshon di Williamsport 2022 lo tin atrobe den Little League.
* * * * *
Van Engelen Ballpark Foundation ta pendiente pa pone lus riba parke B tambe. Ke mèn anochi tambe lo por tin wega riba 2 parke. En bes di 30 wega pa wikènt lo por hunga 40 pa 45 wega pa wikènt riba e parke. Tremendo parke pa organisá kompetensia di Sòftbòl Internashonal ku partisipashon di hopi tim. Ta awa no mester kai duru pa kualke torneo por sigi den gran forma riba e parke. Torneonan Little League manera entre otro Torneo FABB por krese formal otro aña ku partisipashon di mas ekipo i wega riba tur dos tereno den weganan di anochi tambe. Otro parke ku lo bai bai haña muchu mas moveshon ta Sabana Ballpark. E parke lo risibí yerba artifisial i lusnan nobo. Nos ta keda te aki pa awe. By the way selekshon di Kòrsou di Sòftbòl Fememino a gana US Virgin Islands (ekipo di kas), 9-0 djabièrnè anochi i e selekshondi British Virgin Islands djasabra mainta ku skor di 8-0. Kòrsou ya a klasifika pa e final ku lo tuma luga djadumingu 4or aya na Sint John US Virgin Islands.
