Amstel Bright Premier Cup ta sigi ku último weganan di buelta regular
WILLEMSTAD- E popular Torneo Amstel Bright Premier Cup ta sigi e wikènt aki ku e último weganan di buelta regular den kasi tur divishon. Liga 50 ta start ku play-off entre 6 ekipo djadumingu 12 di mart. E otro divishonman lo hunga buelta regular djadumingu pa otro siman start ku play-off.
Nos a risibí un skèdjel di 3 wega ku a keda kanselá pa motibu di awaseru i ku a tuma lugá riba djaweps 9 di mart riba vèlt A. Pa 19.15’or Banco di Caribe vs Coca Cola; 20.45 Belastingdienst vs OMNI i 22.15 Happy Brothers vs Wenman. Nos ta pendiente di e resultadonan aki.
Djabièrnè tin 3 wega na Van Engelen Ballpark sigí pa kasi 30 wega mas den wikènt. Nos tin resultado di tur e weganan di siman pasá.
MODIFIED
Swift 5, Cicoza 3;
Sugar Bucaneros 8, Terremoto 0;
Swift 6, Terremoto 0;
Dream Team 3, Sugar Bucaneros 2.
LIGA 50
Jaws 4, Jandoret Raiders 2;
Marlins 7, Ban Serio 4;
Flamboyan 11, Sluggers 1;
Marlins 7, Sluggers 4;
Jaws 8, Lions 0.
COED
SBAB 11, MCB 3;
Corendon/Karakter 7, CITCO 5;
SBAB (2), 15, SOAB 5;
SOAB 12, Lab de Med 11.
The Diamond Stars League 2023 a start
WILLEMSTAD- The Diamond Stars League 2023 dediká na 3 baluarte a start djabièrnè 3 di mart na Sam Bunting Ballpark. E kampionato ta dediká na Vivienne Warner, Sherly Martina i Shudeska Florentina. E 3 baluartenan menshoná tabata tei foi komienso di Sòftbòl Femenino Veterano, esta Liga Deseo di Streanan di Ayera. Durante e apertura tabata presente Marlene Obispo fundadó di Liga Streanan di ayera i Percy Gijsbertha ku tabata tei foi komienso di e liga. Despues di apertura ofishal tabatin dos partido i djasabra tambe tabatin dos wega. Nos tin pòtrèt di apertura i keda pendiente di resultado di e 4 weganan.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bondia. Nos ta pendiente di desaroyonan di Amstel Bright Premier Cup. Awe nos tin tur resultado di weganan di wikènt pasá. Den Liga 50 ta solamente dos ekipo lo kai afó i despues kosnan ta bai sinta. Despues e promé 6 ekiponan lo hunga dia 12 di mart ku ta djadumingu awor. E 3 ganadónan i mihó pèrdèdó ta sigi pa semi-final djasabra dia 18 di mart. Dia 19 di mart ta final den kasi tur kategoría. Einan lo tin e gran final den tur e kategoríanan. Soshal, Soshal Corporate, COED, COED Corporate, Modified i Liga 50 naturalmente.
* * * * *
Hulanda kargá hungadónan di Kòrsou i Aruba adebutá den World Basebal Classic ku viktoria di 4-2 djarason 8 di mart kontra Cuba, 12’or di mèrdia ora di Tapei i 12 ’or di anochi ora di Kòrsou. Hulanda a gana Pana tambe djarason 9 di mart. ku skor di 3-1. Nos tin un tremendo ekipo ku Big Leaguernan manera entre otro Xander Bogaerts, Jonathan Schoop, Jurickson Profar, Didi Gregorius, Andrelton Simmons i Kenley Jansen.
* * * * *
Jurickson Profar, Didi Gregorius i Andrelton Simmons ta pendiente di un kontrakt ku ekiponan di Grandes Ligas. Kenley Jansen ta na kampamentu di Boston Red Sox i lo djòin e selekshon na momentu ku nos klasifiká i sigi pa Hapon pa e sigiente buelta. Ozzie Albies lo no hunga WBC. Den e buelta ei 8 di e 20 ekiponan lo sigi pa e asina yamá kuartfinal. Hulanda huntu ku Chinese Taipei ta faborito den e grupo aki pa sigi pa e buelta di 8. Den e grupo aki Grupo A, tin Hulanda, Taipei, Cuba, Panama i Italia. Nos ta hunga djarason, djaweps, djasabra i djadumingu. Interes ta grandi na islanan ABC pa wak e weganan ku lo keda transmití via Televishon Direct i Glenn Thomas lo tin reportage pa Telecuracao algun biaha pa dia.
* * * * *
Djarason tabatin reunion general di Beisbòl Veterano na Centro Medico Aesculapius ku ta keda na Schout bij Nacht Doormanweg 47. Direktiva lo baha i mester bini sanger nobo. E puntonan di agenda di e reunion ta: Establesé korum, konfirmashon notulonan di reunion general di 23 di mart 2022, presentashon i aprobashon relato finansiero di 2022, desishon pendiente relashoná ku kampionato Liga 40 2022, retiro di miembronan di direktiva aktual, presentashon kandidatonan pa elekshon di direktiva nobo BEVEKO. Elekshon/votashon direktiva nobo i turno liber. Segun inmformashon direktiva a baha. Tur tim a haña ku ta lastima debí ku nan tabata tremendo.
* * * * *
Ban spera ku mas lihe posibel lo bini un direktiva nobo pa kampionato i otro detayenan por sigi den Beisbòl Veterano. Ta trata di un reunion pa ekiponan di Liga 40 i ekiponan di Liga 50. Liga 40 tin 12 ekipo miéntras Liga 50 tin 5 ekipo. Tin indikashon ku Liga 50 lo bira 6 ekipo i ku un kombinashon di Santa Maria i Azucar lo djoin. Santa Rosa Memories pa basta aña ta pendiente di mas hungadó di 40+ p’asina e grupo di semper por hunga nan Liga 50 trankil. Hungadónan manera Momon Martina, Shendy Cras, Farley Girigorie, Cedric Antonia, Ian Leito, Remy Cicilia, Jair Quant, Ando Cijntje, Egbert Polonius, Geronimo Daflaar, ets ta den Liga 50.
* * * * *
Amstel Bright Premier Cup ta sigi e wikènt aki den tremendo ambiente aya na Van Engelen Ballpark. Hopi hóben a haña trabou despues ku nan a reforsá ekiponan komersial den torneonan manera Amstel Bright i Hope. Ayera mester tabatin reunion di Torneo Hope 2023 na Klup Suvek. Probablemente lo tin mas reunion promé ku e torneo terminá. Torneo Amstel Bright ku ta hunga promé ku Torneo Hope ta terminá dia 19 di mart na Van Engelen Ballpark. Probablemente lo tin show formal riba e fecha final. Na 2020 i na 2022 tabatin e banda Gentz na e final di Torneo Amstel Bright. Nos ta kòrda ku na 2020 tabatin e gran final di e torneo ku animashon di Gentz, su sigente dia a kuminsá tuma medida en konekshon ku COVID-19. Torneo Hope i otro torneonan a keda kanselá aña 2020.
* * * * *
Tene kuenta ku despues di Torneo Hope ta 3 liga tin pa terminá nan kampionato di 2022 riba e parke. Liga 40, Liga Amstel i Liga van Engelen. Liga 50 tambe lo start despues di Torneo Hope. Liga 50, Beisbòl Veterano, Liga 60 lo start. Miéntras tantu nos a tende ku The Diamond Stars League a start na Sam Bunting Ballpark i Liga Streanan di Ayera tambe a start. Djabièrnè nos tin mas detaye. Nos ta keda te aki.
