Baranka kampion Liga 50 i iSin Stres ta titulá kampion Torneo Internashonal na Aruba
Baranka kampion ta swip Jaws i bira kampion Liga 50
WILLEMSTAD- Baranka ku dos viktoria sigí den final a gana Jaws pa bira kampion den Liga 50. Baranka a gana Jaws ku skor di 9 pa 6 djasabra 3 di desèmber i djadumingu Baranka a derotá Jaws 11-8. Kenny Hellement tabata e picher kabai di Baranka ku a tira den tur dos wega. Den e promé wega Kenny a tira 7 inning kompletu ku 6 ponche riba e ekipo di Jaws komo picher habridó. Den e di dos wega Kenny a relevá Gino Valeriaan ku a bira e picher ganadó. Emeric Agatha tabata kayente na bate pa ekipo Baranka i a bira MVP di e final. Ela dal homerun den tur dos wega pa manda Baranka dilanti.
Sin Stres ta titulá kampion Torneo Internashonal na Aruba
ORANJESTAD - Durante wikènt ku a pasa tabatin un Torneo Internashonal Femenino Veterano ku a tuma lugá na Aruba. Partisipantenan na e torneo aki tabata un ekipo di Hulanda, Un Kara, Sin Stres ku Chilling di Kòrsou i e ekipo Sweet Devils di Aruba. E ekipo di Hulanda a gana Sin Stres. Den un wega ku Sin Stres mester a hunga kontra Un Kara ku ta kampion di Liga Di Nos Tur na Kòrsou, Sin Stres a sali ganadó i a klasifiká pa semi-final. Den semi-final Sin Stres a hunga kontra Chilling i nan a gana Chilling ku skor di 4-1. De e forma aki Sin Stres mester a enfrentá e ekipo di Aruba Sweet Devils den final. Den e wega aki tambe Sin Stres a sali viktorioso derotando Sweet Devils ku skor di 11 pa 8 i asina ey Sin Stres ta titulá kampion di e Torneo.
INFORMASHON DI SÒFTBÒL I BEISBÒL
Fanátikonan di Deporte Kòrsou bondia. Nos ta den desèmber i aktividatnan deportivo a baha drástikamente. Ta solamente final di Beisbòl Veterano 50+ tin djadumingu awor pa 2’or pm na Vi Jansen Ballpark, kaminda ekipo Jandoret Raiders lo topa ku Sigi Hunga. Ekipo Sigi Hunga a traha un ‘dream team’ pa trata na kibra e racha di 4 aña sigí di Jandoret Raiders den Beisbòl Veterano Liga 50+. Jandoret Raiders ta kampion 2017, 2019, 2020 i 2021. 2018 no tabatin kampionato di Beisbòl Veterano Liga 50+. Ekipo Yesterday no a presentá djadumingu último pa e wega di semi-final kontra di Sigi Hunga. E wega a keda suspendé djadsabra i mester a hunga e wega di nobo djadumingu 4 di desèmber.
* * * * *
Hopi ekipo ta serando aña kaba den luna di desèmber aki. Ekiponan Curacao Super Stars 60+ a sera aña, ekipo Marlins di Beisbòl Veterano tambe a sera aña. Awe nos tin entrega di premio di ekipo Baranka ku a bira kampion di Liga 50 pa di dos aña sigí. Baranka a gana ekipo Jaws 9-6 djasabra i 11-8 djadumingu pa bira kampion na Sam Bunting Ballpark. Tantu e wega di djasabra komo e wega di djadumingu a tuma lugá na Sam Bunting Ballpark. Emeric Agatha tabata MVP di final e biaha aki. E kampionato a terminá mesun fecha ku a terminá na 2021. Aña pasá e último wega tabata dia 4 di desèmber i e aña aki 4 di desèmber atrobe. Na 2021 tabata riba un djasabra i e aña aki riba un djadumingu.
* * * * *
Miéntras tantu kampionato Mundial di Futbòl ta sigi aya na Qatar. Djabièrnè Braisl a perde kontra di Croatia i Hulanda a kai vensí kontra Argentina. Djasabra Maroko a dal Portugal i Francia a derotá. Djamars 13 i djarason 14 di desèmber tin e semi-final i e gran final lo ta djadumingu dia 18 di novèmber pa 11’or ora di Kòrsou. Kandela e dianan aki den Futbòl. Weganan di Sòftbòl i Beisbòl a terminá, pues ta nèt bon.
* * * * *
Selekshon di Kòrsou a kai vensí ku skor di 11-10 djamars kontra di Virgin Islands aya na Bahamas. Einan nos selekshon tabatin rekòrt di 2 ganá i 1 pèrdí. Nos a bini di un viktoria impreshonante kontra di Puerto Rico ganando 7-1 djadumingu. Djaluna nos a gana Bahamas 12-10 i djamars nos a kai vensí. Mester remarká ku despues di promé wega nos picheo a bira tuma hopi kareda den dos wega sigí. Despues di e dos viktorianan ei nos a pèrdè 3 wega sigi. Virging Islands 11-10, Cuba 8-7. despues Cuba atrobe 4-2 den play-off 2 kontra 3. Nos a terminá e buelta regular ku rekòrt di 2-2. E standing final promá ku play-off tabata Cuba ku tin 3-1 Puerto Rico 3-1, Curacao 2-2, Bahamas 1-3,Virgin Islands 1-3.
* * * * *
Nos a risibí algun pregunta kon ta pará ku weganan na Van Engelen Ballpark. E tereno ta saturá debí na hopi awaseru ku a kai den luna di novèmber i desèmber i a para tur wega pa 2022. Ke mèn, Liga van Engelen, Liga Amstel i Liga 50 lo sigi den 2023. Naturalmente ta pendiente di algun torneo ku normalmente sa tuma lugá na Van Engelen Ballpark, entre otro Torneo Survivors i Torneo Amstel Bright. Torneo Hope tambe ta pendiente pa tuma lugá promé ku start ku e liganan. Kosnan lo ta hopi pèrtá den komienso di aña pa loke ta trata torneonan. Torneo Survivors lo start den Stadion Post 6 i Buena Vista Ballpark pa terminá na Van Engelen Ballpar den yanüari/febrüari 2023.
* * * * *
Den Beisbòl Veterano tin kampion nobo, den Liga 60 tin un kampion nobo, Liga 40 lo tin un kampion nobo pa 2023, pero di kampionato 2022. Den Liga 50 Baranka a ripití, pero remarkabel ta ku no a parti premionan individual na final di kampionato. Stanley Palm (Flamboyan Tigers) a terminá komo kampion bate ku average di .679, produkto di 19 hit den 28 turno. Lider di homerun tabata Richenel Candelaria di Flamboyan ku 5 homerun. Kampion picher tabata Fernando Rosario di Jaws ku 10 ganá i 1 pèrdí. Otro kampionato eksitoso ku algun ‘scaramouche’ den lat di tereno ku ta hunga òf ta laga di hunga riba djadumingu. Nos ta keda te aki pa awe.
