Sòftbòl i Beisbòl - Baranka ta gana Marlins i keda na promé lugá den Liga 50

WILLEMSTAD- Baranka a gana Marlins relatívamente fásil ku skor di 19-12 djasabra den kontinuashon di Liga 50 na Van Engelen Ballpark. Ku e viktoria aki Baranka ta keda na promé lugá ku rekòrt di 14-1. Den e otro weganan di wikènt Sluggers a gana Catpower 13-9, Flamboyan a gana Artemisia 21 pa 6. Den e último wega di djasabra Ban Serio a dal Pitufos 13-4. Nos tin resultadonan i den kolumna nos tin algun sifra.

Baranka sólido ku 14 ganá i 1 pèrdí. Rumbo pa di 3 título sigí den liga 50.

Sluggers 13, Catpower 9
Sluggers a dal 12 hit i hasi 2 eror. Robert Silberie tabata e picher ganadó. Victor Hernandez a bati di 3-3. Victor Hernandez, Ivan Constancia i Gilbert Adriana a bati un homerun.
Catpower a bati 11 hit i kometé 1 eror. Machiel de Roon tabata e picher pèrdèdó. Wendell van het Kruys a bati di 3-3, inkluyendo 2 homerun. Richard Campagnard i Frensel Esclodina, ámbos a dal un homerun.

Raymond Lieuw tersera base di Sluggers den akshon.

Baranka 19, Marlins 12
Baranka a dal 21 hit i hunga sin eror. Curtley Valeriaan a gana e wega. Sedeny Lourens, Fisel Pereira i Edmar Cornelia a bati di 3-3. Myron Wijman a dal 2 hit den 2 turno. Sedeney Lourens a dal 2 homerun, Gregory Reina i Myron Wijman a dal un homerun.
Marlins a dal 13 hit i hunga sin kometé eror. Anthony Pieter tabata e picher pèrdèdó. Irving Sambo a bati di 3-3. Dudley Penso i Aldrin Visser di 1-1. Gilford Schmidt a konektá un homerun.

Flamboyan Tigers ku viktoria fásil pa nòkout 21-6 riba Artemisia.

Flamboyan Tigers 21, Artemisia 6
Flamboyan a dal 25 hit i hasi 3 eror. Ji Kuang Li tabata e picher ganadó. Rudolph Garmers a bati di 4-4. Stanley Palm a bati i 3-3. Richenel Candelaria i Gilbert Juliet a bai di 4-3. Rudolph Garmers, Gilbert Juliet i Stanley Palm, tur a bati un homerun. Artemisia a bati 8 hit i kometé 4 eror. Wederfoort tabata e picher pèrdèdٕó. Quincy Maduro a bati di 2-2.

Ban Serio 13, Pitufos 4
Ban Serio a konektá 13 hit i hunga impekabel. Norman de Roon tabata e picher ganadó. Jair Josepha a bati di 3-3. Jair Josepha, Albert Pieternella, Kelvin Winklaar i Luigi Yanez a dal un homerun.
Pitufos a bati 6 hit i hunga sin kometé eror. Johan Cicilia tabata picher pèrdèdó Richenel Juliana a dal 3 hit den 3 turno, Johan Cicilia a bati di 1-1.

Pitufos a kai vensi kontra di Ban Serio.

Norman De Roon picher ganadó pa Ban Serio.

‍

MAS INFORMASHON DI SÒFTBÒL I BEISBÒL

Fanátikonan di Deporte Kòrsou felis siman. Nos selekshon Junior a kai vensí ku skor di 8-3 kontra di Chinese Taipei. E Chinesnan tabata fuerte i un homerun ku base yen, no sperá den di 5 inning a habri e wega. Nos tabatin e wega wanta te na e momentu ei ku skor di 1-0 ku e ekipo Chinese Taipei dilanti. E selekshon a bini bèk Kòrsou djaluna. Nan a keda bon risibi na airport pa ministernan di Kòrsou. Bon trabou di un selekshon ku a lucha masha hopi mes pa yega te einan. For di play-off entre Pariba i Pabou, pasa den basta trans den Latino Americano i bira kampion. Na Taylor nan a gana dos wega i pèrdè solamente un wega. E wega final entre Asia Pacific i Michigan Region mester a tuma lugá djadumingu 20 di ougùstùs pa 12’or di mèrdia. Asian Pacific a gana Michigan ku skor di 6-0 i bira kampion di Mundu.

‍
* * * * *
Remarkabel ta ku e ekipo di Kòrsou Junior a yega final internashonal invikto i e ekipo Asia Pacific a yega e final internashonal ku rekòrt di 2-1. Nos tabatin 2-0 promé ku e wega final. Bon trabou di manager Ludson Roberto i su crew ku a lucha hopi pa hiba e tim te na final internashonal. E tim tabata falta dos hungadó super klave ku ta e shortstop Timothy Mogen i otro grandi ku ta Sherrintley da Costa Gomez. Respektivamente terser i kuarto bate di e ekipo. Un ekipo sin su terser i kuarto bate regular, ku ta shortstop i senterfielder estelar. Pabien Junior League Liga Pabou i Pabien Kòrsou.

‍
* * * * *
Nos ta bai pa Slowpitch. Ekipo Baranka ta sigisólido den Liga 50 ku viktoria di 19 pa 12 riba Marlins. Baranka ta drei zetá i ya ta kla pa e play-off ku nan rekòrt di 14-1. Falta 5 wega mas pa terminá e buelta regular, ku mèn mas o ménos 6 pa 7 djasabra mas. Segun skema e último weganan lo ta dia 30 di sèptèmber i play-off ta programá pa start dia 7 di òktober na Van Engelen Ballpark. Despues di weganan di djasabra último e standing ta Baranka 14-1, Ban Serio 12-2, Jaws 10-4, Marlins 9-4, Lions 6-7, Pitufos 6-7, Sluggers 6-7, Flamboyan 5-8, Catpower 1-14 i Artemisia 0-14. Ekiponan Lions, Pitufos i Sluggers tin un chèns chiki di klasifiká. Nan ta tres wega atras i mayoría ekipo falta 5 pa 6 wega.

Ban Serio huntu ku un gran fanatiko. sr. Anthony Martines.

‍
* * * * *
Pa loke ta trata e resultadonan di Liga 50, Baranka a gana Marlins 19-12, Sluggers a derotá Catpower 13-9, Flamboyan a zona Artemisia 21-6 i Ban Serio a dal Pitufos 13-4. Djasabra 26 di ougùstùs ta pa 10.00 Jaws – Lions, 12.00 Baranka – Catpower, 14.00 Sluggers – Ban Serio i 16.00 Flamboyan – Marlins. Lidernan den Liga 50 ta, Kelvin Winklaar (Ban Serio ) ku avg. di .706. sigí pa Gilbert Juliet (Tigers) ku tin .676., Emeric Agata (Baranka) ku tabatin hopi ratu lider tin .667 i Rombley (Ban Serio) tin .636. Sherdon Rombley ta lider den kareda empuhá ku 29 sigí pa Sedeney Lourens (Baranka) ku tin 27 i Fisel Pereira (Baranka) 25.

‍
* * * * *
Sherdon Rombley i Sedeney ‘Spin’ Lourens ta empatá den homerun ku 10. Den picheo Curtley ‘Gino’ Valeriaan (Baranka) tin un ERA di 3.71, sigí pa Edison Sambo (Jaws) 4.50 i Kenny Hellement (Baranka) 4.50. Kenny Hellement ta lider den ponche tirá ku 29. Nonnie de Roon (Ban Serio ) ta na di dos lugá ku 20 i Edison Sambo number 3 ku 12 ponche. Liga 50 interesante en konekshon ku klasifikashon na di 4 lugá i naturalmente e lideran individual.

‍
* * * * *
Play-off di Beisbòl Dòbel A a start djarason 23 di ougùstùs ku wega entre Santa Rosa Indians ku a klasifiká number 1 kontra e ganadó di Santa Maria. Den un tremendo wega ekipo di Santa Rosa a gana 2-1 ku tremendo picheo kombiná di Jordan Lucas i Hershelon Juliana. Ekipo Marchena a kai afó kontra di Santa Maria den e wega di wild card. Ekipo Marchena na 2018 a klasifiká pa play-off semi-final despues di a eliminá e ekipo di Groot Kwartier. E aña ei tabata e ekipo Royal Scorpions ku a keda afó for di e grandinan. Ekipo Wild Cats, Santa Rosa, Santa Maria i Royal Scorpions tin basta aña ta dominá den e promé kuaternan di Beisbòl Dòbel A. Djaweps 24 di ougùstùs den wega entre Wild Cats i Royal Scorpions, ekiponan ku a finalisá na di 2 i di 3 lugá respektivamente, Royal Scorpions a dal Wild Cats durísimo i sorprendente ku skor di 18 pa 4. Nos ta keda te aki.