************* Breaking News **********
Kòrsou ta dal Puerto Rico (Guayama) 11-1 i pasa pa final
YABUCOA – Selekshon di Kòrsou Pabou ku tremendo picheo Ferreras i homerun di Jaydlin Wiel ta gana di Puerto Rico (Guayama) i klasifiká pa final di kampionato di Karibe di Beisbòl Little League. E picher Juan Ramon Ferreras tabata den gran forma atrobe ku tremendo picheo tumando solamente un hit. Jay-dlin Wiel a bati di 2-1 i Yaedon Lourens Martie a bati di 2-2.
Jay-Dlyn Wiel ta anunsiá komo picher habrido mayan ku e otro picher Hemir Helmijr den relevo. E wega ta programa pa start 1.30 pm djasabra 15 di yüli 2023.
WILLEMSTAD – Baranka a terminá promé buelta invikto ku rekòrt di 9 ganá i 0 pèrdí. Djasabra último Baranka a dal Flamboyan Tigers ku skor 12 pa 2 i kaba promé buelta komo number 1. Den otro wega ekipo Pitufos a gana di Sluggers 19-14 den un wega di hopi kareda. Djasabra awor buelta number 2 ta start.
Baranka 12, Tigers 2
Baranka a konektá 17 hit i hunga sin kometé eror. Gino Valeriaan tabata e picher ganadó . Sedeney Lourens i Edmar Cornelia a bati di 3-3. Fisel Pereira, Gregory Reina i Myron Wijman a bati di 2-2. Myron Wijman a dal dos homerun. Edmar Cornelia, Dennis D’Arnaut, Sedeney Lourens i Fisel Pereira a dal un homerun.
Tigers a bati 5 hit i hasi eror. Eithel Brunken tabata e picher pèrdèdó. David Rodriguez a bati di 1-1.
Pitufos 19, Sluggers 14
Pitufos a dal 15 hit i kometé 2 eror. Orsendo Clemencia tabata e picher ganadó. Sharlon Louisa a bati di 3-3, Jurwin Duggan i Sidney de Windt a bati di 2-2. Sharlon Louisa a dal 2 homerun.
Sluggers a konektá 15 hit i hasi 4 eror. Eldert Bakker tabata e picher pèrdèdó.Rylan Capella a bati di 3-3. Aegidio Juliana tabatin un homerun.
Baranka Acoya kampion Liga 40
WILLEMSTAD- Fin di yüni 2023, Baranka a dal Crazy Tigers 20 pa 9 i bira kampion Liga 40. E wega a tuma lugá na Van Engelen Ballpark i tabata wega number 2 di play-off final di kampionato 2022. E play-off a keda suspendé aña pasá pa motibu di hopi awaseru i mal estado di tereno. Baranka a gana wega number 1 di e final ku skor di 10 pa 6. Na final di e wega Baranka a selebrá den tereno i despues tabatin entrega di premio tantu na ekiponan komo individual.
NUMERITONAN
Baranka a skor na 20 okashon, dal 18 hit i kometé 2 eror. Picher ganadó tabata Railison Gijsbertha i Merieldo Trinidad a bati di 4-3. Eldred Estanista a bati di 2-2. Charlton Merite i Merieldo Trinidad a dal un homerun.
Crazy Tigers nota 9 kareda, bati 13 hit i hasi 1 eror. Sharlon Hanst tabata e picher pèrdèdó i Roderick Zimmerman a bati di 3-3.
PREMIASHON
Baranka Acoya kampion Liga 40 di 2022.
Crazy Tigers sup kampion.
Gamers di 3 lugá.
Railison Gijsbertha MVP di final.
Tyron Hollander kampion bate 21-17 = .810
Dave Kirindongo lider di homerun ku 9.
Kenny Hellement kampion Picher 5-0.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia i felis siman. Fin di siman pasa tabata kargá ku moveshon den práktikamente tur liga. Liga 50 a terminá ku buelta number 1 i Baranka a keda invikto ku un viktoria fásil riba Flamboyan/Tigers ku skor di 12-2. Den e otro wega un wega Pitufos a dal Sluggers ku skor di 19-14. Pa loke ta trata e liderato den bateo i picheo tur detaye a keda praktikamente meskos.
%20copy.jpg)
* * * * * *
Nos ke manda palabra di deskanso pa Donald Beer’ Adelina ku fayesimentu di su mama. Beer ta pasando den momentunan duru, fin di luna di yüni, Beer su ruman muhé ku a bini Kòrsou pa wak su mama a fayesé i awor Beer su mama a fayesé. Entiero tabata djarason 12 di yüli. Donald Adelina un pelotero/dirigente masha soshal ku a guia hopi ekipo di Slowpith na gana título. Beer ta eks honronero di nos Beisbòl Dòbel A i hungadó ku a bai Gary Indiana ku selekshon di Senior League na aña 1983 ke men 40 aña pasá. Deskanso i forsa na Beer Adelina i famia.
• * * * * *
E siman aki a dera Chetan Cosntancia ku ta mama di Gè, Sela i Mayris Constancia ku ta gran fanátikonan di deporte i di Jandoret Raides. Gè pa hopi tempu tabata hungadó di Jandoret Raiders i Mayris gran fanatiko di Royal Scorpions i awor di Jandoret Raiders. Rudson ‘Ton’ Robert eks picher slengu estrea ta subrino di Chetan. Gran famia deportivo i antes tantu Randall ‘Gè’ Constancia komo su ruman Bubu tabata hunga futbòl i vòli tambe, tempu Jandoret tabatin un tim di vòli di spònser pa Smith International.
* * * * *
Standing den liga 50, despues di buelta number 1 ta lo sigiente. Baranka 9-0, Ban Serio 8-1, Marlins 7-2, Jaws 5-4, Lions 5-4, Sluggers 4-5, Pitufos 4-5, Flamboyan 2-7, Catpower 1-8 i Artemisia 0-9. Mesun hungadónan ku nos a pone siman pasá ta lidernan individual. No a bini masha kambio, Emeric Agatha ku ta yegando Kòrsou for di Salvador ta keda lider ku avg. di 722. E no a hunga e último dos weganan ku Baranka. Kelvin Winklaar di Ban Serio ta lider den RBI ku 21, sigí pa Sherdon Rombley ku tin 20 RBI, Gerald Zimmerman di Sluggers tin 17 RBI. Fisel Pereira di Baranka ta number 4 ku 16 RBI. Gino Valeriaan di Baranka ta lider den ERA ku 3.67 i Kenny Hellement tambe di Baranka ta lider den ponche tirá ku 16. Kenny Helement no a picha e wega di djasabra último i ta keda lider ketu bai. Kenny ta poncha e batiadónan kontrali manera ta Fasptitch òf ta Beisbòl tin.
• * * * * *
Djamars 11 di yüli tabatin e di 93 wega di Strea di Major League Baseball ku a tuma lugá na Seattle (Washington). Liga Nashonal despues di a perde 9 aña sigi a gana ku skor di 3 pa 2. Managernan tabata Rob Tomson di Philadelphia di representashon di Liga Nashonal i Dusty Baker di Houston Astros den representashon di Liga Americana. Ta di 3 biaha ku e suidat Seattle ta sede di wega di strea. Promé biaha tabata na aña 1979 den Kingdome i na 2001 tabata Safeco Field ku na 2019 a bira T-Mobile Park. Hopi kambio i detaye a hasi drecha den bisendario di e parke pa loke ta trata transporte pa fanatikonan ta bon sirbí.
• * * * * * *
Ekipo popular na Kòrsou Atlanta Braves tabatin 8 hungadó den wega di Strea i Texas Rangers tin 6. Dado momentu tabatin kuadro kompletu di hungadó di Taltna durante e wega. Ta for di 1933 tin All Star i Liga Americana ta tin 47-43 pèrdí promé ku e wega i awor a bira 47-44. Liga Nashonal e yega di gana di 1972 pa 1982 ku tabata e racha, Liga Americana tin di 1997 pa 2009 pa loke ta trata rachanan. Na 2002 tabatin un empate i na 2020 e Al Stars Game a keda suspendé pa motibu di pandemia Covid-19.
