Baranka ta pika dilanti den final i djadumingu 2’or finalisimo 60+
WILLEMSTAD- E finalnan di Liga 50 di tantu Beisbòl komo Sòftbòl ku a keda suspendé wikènt pasá a sigi e wikènt aki ku mesun skèdjel. Wikènt aki tin gran final di Sòftbòl Slowpitch 50+, 60+ i Beisbòl Veterano. Djasabra 26 di novèmber ekipo Baranka a pika dilanti den e seri final ganando di Jaws ku skor di 9 pa 6. Keny ‘Refuse to Lose’ Hellement tabata e picher ganadó. Wega number 2 ta djadumingu 4 di desèmber den oranan di mainta na Sam Bunting Ballpark. Wega number 1 tambe a tuma lugá na Sam Bunting Ballpark
Djasabra, 3 di desèmber den Liga 50 na Vi Jansen Ballpark. Jandoret Raiders a gana Otrabanda ku skor di 12 pa 1 i klasifiká pa final di Beisbòl 50+. E wega entre Yesterday i Sigi Hunga a keda suspendé i lo tuma lugá djadumingu 4 di desèmber pa 11’or am.
FINALISIMO 60+
Wega di 60+ si a sigi djadumingu 27 di novèmber i ekipo Nos Tambe Por a gana e wega kontra Jaws ku skor di 6-5. Djadumingu 4 di desèmber pa 2’or tin e wega finalísimo. Den e promé wega Jaws a gana Nos Tambe Por ku skor di 7-1.
Bèk den tempu ku ekipo Marchena di 1987
WILLEMSTAD- Resientemente nos a publiká un pòtrèt kaminda un ekipo di Marchena Hardware a bai Sint Louis. Nos a risibí un pòtrèt di e tim ku varios di e hungadónan ku a biaha pa Sint Louis pa mira wega di Cardinals. Na aña 1986 Wim a bai Hulanda na Eindhoven ku 3 ekipo. 2 ekipo Marchena i Muebles Kennedy ku tabata Alpha Zelbo Hubenil.
INFORMASHON DI SÒFTBÒL I BEISBOL
Fanátikonan Deporte Kòrsou bondia i felis siman Nos ta den un wikènt kargá ku weganan di final di Liganan 50 i 60. Djaweps mester tabatin wega di Liga 40 na Van Engelen Ballpark entre ekiponan Gamers i Crazy Tigers. E wega a keda suspende pa motibu di mal estdo di tereno. Ta trata aki den semi-final di Liga 40 Sòftbòl, pa despues e ganadó bai topa ku Baranka. Hopi Sòftbòl mes den fase final aki, miéntras tantu Futbòl ta sigi aya na Qatar. Fanátikoan di Alemania a keda desepshoná ku nan ekipo no a logra klasifiká. Alemanaia a gana ku skor di 4-2, pero a keda afó pa diferensia di gol. Ekipo Spaña ku a sali brabu ganando Costa Rica den e promé wega 7-0, a keda na di dos lugá den nan pul, esta Pul E ku solamente 4 punto, mesun kantidat di punto ku Alemania, pero a klasifiká pa motibu di average di gol. Ekiponan popular na Kòrsou ku ta Brasil, Hulanda, Argentina i algun Francia. Saludo pa Jimmy Plaate ku ta Francia semper. Francia tambe a sali duru, pero a sali na promé lugá ku 6 punto i no 9 punto fásil manera tur hende a spera. Djasabra Hulanda a gana USA 3-1 i despues Argentina a gana Australia 2-1. Hulanda lo bai topa Argentina den kuart final. USA i Australia ta eliminá naturalmente.
* * * * *
Den siman nos a risibí e tristu notisia ku un gran hungado di Slowpitch German Nieuw a fayese. German alias Sigo Nieuw tabatin 75 aña i tabata biba na Hulanda. Lo dera Sigo Nieuw na Hulanda. E tabata hunga den Gasora Giants, Jaws i ekipo Forti tempu di su tempu den Sòftbòl i hopi popular den añanan 80 i 90 aki na Kòrsou. Gasora Giants tabata hunga na Liga Un i Tur na Post 6 i Jaws tabata na Suvek Ballpark ku awor a bira van Engelen Ballpark. Kondolensia i forsa na amigu i famianan di e defuntu, espeshalmente Feti Curie ku ta gran amigu di Sigo Nieuw.
* * * * *
Nos ta bai hasi un komparashon di e ekiponan Nos Tambe Por i Jaws. Durante kampionato regular Nos Tambe Por a dal Jaws na dos okashon. Den play-off Jaws a gana Nos Tambe Por den e wega entre number 1 i 2 i Jaws a pasa pa final dirèkt. Despues Nos Tambe Por a bini bèk i a logra empatá e seri despues ku Jaws a bolbe gana e promé wega. Hopi hende mes ta spera djadumingu awor na Frank Curiel Ballpark. Nos Tambe Por tin average kolektivo di .376, picheo ku ERA di 1.66 i un defensa di .972 ku ta tremendo. Ekipo Jaws un average di .365, un picheo ku ERA di 1.99 i defensa di .955. Nos Tambe Por tin ventaha leve pa loke ta trata sifra tantu den bateo, picheo komo defensa. Durante kampionato regular Nos Tambe Por tin 2 ganá i 0 pèrdí. Den play-offnan Jaws tin 2 ganá i 1 pèrdí.
* * * * *
Djarason nos a papia di e hungadónan ku a bai Sint Louis na 1987 pa wak weganan di Cardinals e tempu ei ku a gana World Series. Ata nòmber di e hungadónan di Muebles Kennedy (u15) e tempu ei. Sigmar Mensing, Sepherine (Dugel) Adriana, Gregory Bito, Edmiro ‘Pancho’ Chirino, Gerald Statie, David Martie, Renato Da Costa Gomez, Elston Hanson, Michel Fayad, Judry Balentina, Agustin Diaz, Sherilles Inecia, Eugene Hooi, Linsley Laker, Richard Kramers i Milton Maduro. Manager tabata Ricardo Rojas asistí pa coach Artur Da Costa Gomez. Recordar es vivir. Gregory Bito i Renato Da Costa Gomez ta aktivo ainda den Beisbòl Veterano i Liga 50. Nos ta keda e aki pa awe.
