Eks Hungadónan di Blue Hawks a reuní
WILLEMSTAD- Djasabra 1 di aprel èks hungadónan di Blue Hawks a topa otro den bario Monte Carmelo. Vários hungadó di añanan 70, 80 i 90 tabata presente. Hungadónan ku a move pa Hulanda pa hopi aña, entre otro rumannan Dunlop tabata presente. Por a mira hungadónan manera Johannes ‘Didi’ Gregorius, Payo Faneyte, Junny Marselia, Emile Haswell, Junny Obispo, Humphrey Granger, Rudsel ‘Kabayo’ Wilson, Paña Angela, Gerald Dunlop, Aldrich Dunlop, Edsel Zinhagel, Gilmar Velder, Vriendjes Cicilia i otronan.
Emmely Jonis a gana Homerun Derby di The Diamond Stars League
WILLEMSTAD- Emmely Jonis ku a demonstrá tremendo poder na bate a gana e Homerun Derby organisá pa The Diamond Stars League. Emmely Jonis di ekipo Nos Goso a gana Asila Finies (Nos Goso) den e final. E Homerun Derby a tuma lugá djabièrne 1 di aprel na Sam Bunting Ballpark. Djasabra tabatin Wega di Strea i nos ta pendiente pa e resultadonan i numerito. Despues ku práktikamente tur ekipo a hunga promé buelta, nos tin standing i sifranan individual.
STANDING
Rising Phoenix 4-1;
Treasure New Era 4-1;
Nos Goso 3-1;
Mas Goso 2-3;
The Fighters 1-4;
Lady G 0-4.
BATEO
Solange Soliana (Treasure) .615;
Shurela Merkies (Mas Goso) .571;
Emmely Jonis (Nos Goso) .556;
Mirugia Paulina (Rising Phoenix) .556;
Janitza Betrian (Treasure) .538.
RBI
Tanusi Delando (Treasure) 9;
Solange Soliana (Treasure) 8;
Emmely Jonis (Nos Goso) 6;
Janitza Betrian (Treasure) 6;
Joshmaye Chirino (Rising Phoenix) 5.
PICHEO
Emmely Jonis (Nos Goso) 0.00;
Anoushka Delando (Treasure) 0.00;
Minerva Maduro (Treasure) 1.40;
Marie Windster (Rising Phoenix) 1.50;
Jermyda Lake (Rising Phoenix) 1.75.
PONCHE TIRA
Minerva Maduro (Treasure) 4;
Jermyda Lake (Rising Phoenix) 3;
Carlientje Cleopa (Nos Goso) 2;
Miluska Leito (Mas Goso) 2;
Anoushka Delando (Treasure) 2.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bontardi i bon siman. Ya nos ta den luna di aprel. No tabatin masha chiste òf skein di 1 di aprel manera ta kustumber. A bai basta trankil djasabra último. Hopi hende trankil na kas, no tabata dia di trabou i no ta wak medionan di komunikashon mainta tempran. Kosnan simpel manera por ehèmpel solo a sali vierkant awe, wak pariba di bo kas ets. Koi hasi prèt no kos pa spanta hende. En todo kaso weganan di Hope a sigi na Van Engelen Ballpark, weganan di The Diamond Stars League, Streanan di Ayera a sigi na Sam Bunting Ballpark. Torneo Kid Boca Chica a start den gran forma djasabra último na Frank Curiel Ballpark. For di djasabra sorpresa grandi a kai den Torneo Kid Bica Chica na momentu ku ekipo Nos Power a gana e gran ekipo Nos Tambe Por ku skor di 9-0. Einan bo ta mira ku den deporte tur kos por pasa, ta pesei unda ku bo bira na un negoshi horeca, mayoria biaha ta deporte bo ta mira riba televishon i no un pelíkula.
* * * * *
Den kurso di siman nos lo tin tur mas detaye i resultadonan. Wikènt benidero lo no tin wega di Torneo Kid Boca Chica i e fin di siman di 15 i 16 di aprel lo tin e último weganan di buelta regular, semi-final i final. Bon públiko den wikènt na Frank Curiel Ballpark. Nos a pasa djasabra i dal den rumannan Dunlop ku ta na Kòrsou pa entiero di nan tata. Hopi popular e gainan aki ta i nan a hasi pelikula den Beisbòl Little League den añanan ochenta. Gerald Dunlop tabata un super estrea komo picher i batidó i Aldrich ‘Isho’ Dunlop tambe tabata un kos serio. Gerald ta mas grandi ku Isho Dunlop. Quentin Martina ku a kore den gran forma den atletismo tempu di su tempu i a hunga beisbòl den Manhatten Blue Jays i Beisbòl Veterano ku The Bears, ta ruman di e Dunlopnan. Nos a dal den Egbert Jules tambe, Polis penshonadó ku ta biba na Boneiru. Egbert Jules tabata picher estrea di Sòftbòl Faspitch i a hunga den vários selekshon tempu bon di Sòftbòl Maskulino.
* * * * *
Torneo di Beisbòl Veterano Azucar ta start djasabra awor na Tata Beaumont Ballpark na Bonnam. Fin di siman pasá skema a bai pa ekiponan. Timnan ku ta partisipá ta Azucar, Vosama, Santa Rosa i Jandoret den Pul A. The Brothers, Santa Maria, Quality i Marlins ta den Pul B. E torneo lo terminá dia 30 di aprel, ke mèn di 8 pa 30 di aprel lo tin Beisbòl Veterano na Bonnam. Djasabra 29 di aprel lo tin weganan semi-final i djadumingu lo tin e gran final. By the way, Breaking News.. Torneo Azcuar kansela. E notisia a drenta djarason 5 di aprel durante dia. Vários hungadó di Beisbòl Veterano ta partisipá tantu den Torneo Hope i algun den Torneo Kid Boca Chica. Pa fin di luna ya Torneo Kid Boca Chica a terminá. Manera ariba menshoná Torneo Kid Boca Chica, torneo 60+ organisá pa Jaws, lo terminá dia 16 di aprel.
* * * * *
Miéntras tantu Aruba a manda invitá ekiponan kampion i supkampion di Beisbòl Veterano di Kórsou pa e Torneo di Reino 2023 ku lo ta tuma lugá na Hermana Isla Aruba na komienso di novèmber. Ekipo Quality Stars i Santa Maria ta invitá. Na 2022 e invitashon tabata pa Santa Maria i Isla Crackers. Crackers a kanselá na e okashon ei, pero promé ku invitá ekipo Jandoret ku a terminá number 3 na 2022, ya e organisadónan a kanselá e torneo. Den e di dos siman di novèmber òf mei mei di novèmber lo tin Torneo 50+ di Reino organisá pa ekipo The Legends na Kòrsou. Nos no a tende mas detaye di e torneo aki. Parse ku The Legends no ta partisipá mas den 40+, pero den 50+. Vários hungadó di promé ora di The Legends no ta forma parti di e ekipo. Ekipo Attack di Hulanda si lo ta na Aruba ku un dream team. Resientemente nos a menshoná nòmber di e trabukonan ku lo ta ku Attack na Aruba den komienso di novèmber.
* * * * *
Djabièrnè tabatin Homerun Derby di The Diamond Stars League. Emmely Jonis di ekipo Nos Goso a gana e Homerun Derby den un gran final kontra Asila Finies tambe di Nos Goso. Susmaline Rifaela ku ta di Treasure New Era a gana aña pasá. Djasabra mester tabatin wega di Tur Strea di e liga. Nos ta keda te aki pa awe.
