Gran final Torneo Hope djadumingu na Van Engelen Ballpark i Survival kampion Classico ABC 40+
WILLEMSTAD- Torneo Hope ta terminá djadumingu awor ku final den 6 diferente kategoría. Ta trata ki di kategoríanan 40+, Soshal Maskulino, COED, Soshal Maskulino+, Soshal Open i Soshal Femenino. E promé wega di final lo ta 40+, miéntras e último final ta Soshal Femenino. Djasabra tin aktuashon di One Flavas aya na Van Engelen Ballpark.
Pa loke ta trata e insidente entre CITCO & SBAB, konhuntamente a manda e siguiente komunikado ku Van Engelen Ballpark ta kompartí. “Djaluna, 1 di mei 2023, tabatin un insidente durante un wega di Sòftbòl entre SBAB i CITCO na Van Engelen Ballpark. Komo konsekuensia di e suseso durante di e wega, SBAB i CITCO a reuní i ta kompartí e sigiente statement. Konsiderando balornan di ‘fair play’ i rèspèt mutuo ku nos ta apresiá komo organisashon, nos ta lamentá e impakto negativo ku esaki a kousa. Komo organisashonnan profeshonal ku tin un bon relashon ku otro, nos lo traha duru pa hasi e relashon aki ainda mihó pa añanan benidero. Moving Forward. Mester bisa aserka ku 4 hungadó a risibí suspenshon pa loke ta trata Hope Tournament 2023.
Survival kampion Classico ABC 40+
ORANJESTAD - Survival a gana Quisquella 15 pa 13 den e gran final i bira kampion Classico ABC 40+. E torneo ku a konta ku partisipashon di ekiponan di Aruba, Boneiru i Kòrsou a tuna lugá na Flatstone Ballpark na Aruba. Survival a gana Baranka ku skor di 13 pa 9 den semi-final riba bataso klave di e veteranísimo Franklin Danies. Danies a dal homerun ku base yen den e inning. Quisquella a sali na di dos lugá, ekipo Leftovers di Aruba a sali number 3 i Baranka di Kòrsou a terminá number 4.
INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis wikènt. Nos ta drenta fin di siman final di Torneo Hope 2023 ku tabata kana bon, pero wikènt pasá tabatin un insidente ku e deslusí e torneo bastante. Aktornan a sinta na mesa i tin solushon. Dirigente/direktivanan di e ekiponan konserní a tuma desishon drástiko pa saka nan ekiponan for di e torneo i tuma medida interno. Van Engelen Ballpark Foundation ku ta organisadó di Torneo Hope tambe a tuma medida.
* * * * *
Nos tin e komunikado di van Engelen Ballpark i mas detaye di e weganan di fin di siman. For di djabièrnè tin weganan di play-off di Torneo Hope, sigí pa djasabra i djadumingu. Djasabra awor tin animashon musikál di e banda One Flavas. No ta konosí si tin banda riba e fecha final ku ta djadumingu 7 di mei. Djadumingu awor tin selebrashon formal di ekipo Pichingolo ku a kumpli 50 aña di eksistensia. Un ekipo ku un historia di bira kampion inkreíbel ku ta imposibel pa igualá. Manera Pichingolo nos no konosé na Kòrsou i otro islanan Hulandes Caribeño tampoko Hulanda.
.jpg)
* * * * *
Direktiva di Pichingolo Nissan/Kia ta hasi un yamada na tur su èks hungadónan, eks dirigentenan, fanátikonan, amigunan i bario di Buena Vista pa djadumingu dia 7 di mei próksimo bin selebrá ku nan 50 aña di eksistensia. E aktividat ta kuminsá 4.30 pm ku un Santu Sakrifisio di Misa na Iglesia di Buena Vista pa gradisí Papa Dios ku pa durante 50 aña a mustra Pichingolo su dirigentenan i hungadónan “E Kaminda”. Lo tin tròli disponibel i despues lo tin ERA. Pichingolo super super eksitoso mes a invitá pueblo di Kòrsou pa selebrá ku nan.
* * * * *
Djasabra ta kandela tin den Liga 50 den Stadion Post 6 ku ta e último djasabra ku lo hunga den Stadion Post 6 pa despues move bèk Van Engelen Ballpark pa un djasbara i despues bolbe wanta en konekshon ku Kopa ABC di e hóbennan ku lo tuma lugá na van Engelen Ballpark. Nos tin informashon i skema di Kopa ABC&S ku ta keda organisá pa ekiponan Swift i Teremoto manera ya a bira un tradishon. Swift ta super kampion di Kopa ABC e último añanan. Mesun wikènt tin Kopa ABC 50+ na Boneiru ku partisipashon di ekiponan Ban Serio i Marlins na Kòrsou. Marlins i Ban Serio lo topa otro djasabra 6 di mei den Stadion Post 6.
* * * * *
Ekiponan ku lo hunga Kopa ABC&S di 17 pa 21 di mei ta entre otro Terremoto, Cicoza, Swift i Dream Team/Thrillers di Kòrsou. Otro ekiponan ta Happy Brothers, Superstars, Sonrisa, Chrush Power, Crusher, Energizer, Controllers i Redskins. Ta trata aki di 12 ekipo repartí den dos pul. Tur ekipo ta hunga 5 wega i ekiponan 1 te 8 ta klasifiká pa despues sigi ku play-off djasabra 20 di mei. Djadumingu 21 di mei ta e fecha final kaminda lo tin Homerun Derby. 12’or i 2or tin semi-final i pa 4’or tin e gran final di Kopa ABC&S 20223.
* * * * *
Skema pa loke ta trata 50+ djasabra ta 10.00 Pitufos – Jaws, 12.00 Marlins – Ban Serio, 14.00 Lions – Catpower, 16.00 Baranka – Sluggers. Ekipo Artemisia tin barwacht i Flamboyan/Tigers ta liber. The Diamond Stars League ta sigi djabièrnè i djasabra na Sam Bunting Ballpark ku 4 wega, dos riba djabièrnè i 2 riba djasabra. Djabièrnè pa 8’or ta The Fighters vs Treasure New Era, sigi pa 9.45 Rising Phoenix kontra Nos Goso (kandela atrobe) i djasabra 6 di mei pa 8’or ta Lady G vs Nos Goso sigi pa Treasure vs Rising Phoenix (otro kandela).
* * * * *
Liga Streanan di Ayera ta sigi djadumingu na Sam Bunting Ballpark. Den e promé wega pa 2’or ta Golden Girls ta topa ku Tur Goso i pa 4’or ta Treasure Plus kontra di Eureka General Construction. Miéntras tantu kampionato di MLB ta sigi aya na USA. Telecuracao lo sigi ku transmishon i for di djasabra awor lo tin komentarista versá den e materia pa splika pueblo di Kòrsou kiko MLB ta kome i bebe. A sigi tambe aktuashon di nos peloteronan lokal dj’aserka. Ozzie Albies ta den gran forma último dianan, miéntras Kenley Jansen ta un poko leshoná. Jonathan Schoop ta sugiendo su averahe poko poko pero sigur. Nos ta keda te aki pa awe.
