Fanátikonan di Extra Inning bon dia. Nos ta pendiente pa konferensia di Prensa Gobièrnu pa habri un tiki mas i pa medio mei deporte lo kuminsá move. Resientemente Norwin ‘Sor’ Moesquit a app nos algun karchi ku entre otro Sor Moesquit mes ariba, Sor Moesquit den Santa Maria Pirates, Wilfred ‘Chapul’ Martiszoon (QEPD) Santa Rosa, Antonio Keller (Wild Cats) i Lonte Balentin Royal Scorpions. Tempu bon di nos beisbòl i segun nos ta medio aña 80. Beisbol tin dushi tempu mes den Stadion di Rif, Sentro Deportivo Kòrsou i Tio Daou Ballpark. Nos ta bai wak ken ta kòrda ki aña beisbòl a sali for di SDK i no a bai mas eiden.
• * * * * *
Siman pasa Bello Mujica a kumpli 80 aña. Un dje gran pichernan di ántes den beisbòl lokal. Bello Mujica a picha den bon tempu ku Santa Maria Pirates i Royal Scorpions sigur. Ela picha for di tempu di Lucky Strike. Un persona di 80 aña lo tabata den su mihó momentu 55 aña pa 50 aña pasá. E tempu ei si... ta hende di mas edat por bisa. Nos a bai chèk serka Kenneth Gijsbertha ku konosé Bello i historia di beisbòl lokal masha bon mes. Ta nos Minister di Finansas Kenneth Gijsbertha a duna nos a tep ku Bello Mujica a hunga den Santa Maria i Royal Scorpions. Sra. Sonia Mujica a duna nos mas detaye di Bello Mujica. Sra Sonia Christiaan- Mujica ta ruman di Bello i Mario Mujica. Mario Mujica ruman di Bello i Sonia tambe a picha den Beisbòl Dòbel A.
• * * * * * *
Mas detaye di tempu di karchi di Beisbòl lokal. Informashon ta mustra ku ta Jorge Sulbaran ku tabatin su kompania di Printing, otro ta bisa ku ta Melvin Roozendaal di ekipo Sorpresa ets. E asuntu di karchi den Beisbòl MLB a start den añanan 50 kaminda den un paki di bals tabata haña e karchinan. Despues di e wega den Beisbòl MLB na 1994 fanátikonan a bisa desapuntá den e manera ku asuntunan a bai den e wèlga i einan e asuntu di karchi a pèrdè popularidat. Karchinan di beisbòl a keda un dje asuntu di kolektá mas popular di tur tempu. Na 2007 a bende un karchi di e Honus Wagner, un dje grandinan di tur tempu pa 2.8 mion dollar.
• * * * * *
Saludo pa Kenneth Gijsbertha, un dje bon ‘centerfielder’ nan di beisbòl tempu di su tempu ku bon brasa i bon spit. Kenneth a retirá for di tempran pa traha espasio pa hóbennan manera Song Sofia, Ray Cijntje i otro prospektonan outfielder ku tabata subi for di hubenil pa Santa Maria Pirates. Den e parti final di añanan 70, Kenneth Gijsbertha promé ku e kumpli 26/27 aña Kenneth a bai den e parti tékniko pa despues bira kampion ku Alpha Zelbo 3 aña sigí na un edat bastante hoben komo manager. Manera nos a bisa gran konosedó di historia di Beisbòl di Kòrsou. Kenneth tambe por skibi un buki manera Hubert Flemming i Orlando Nicolina.
• * * * * *
Algu di Liga 50 den Sòftbòl. Tin indikashon ku Sedeney ‘Spin’ Lourens lo a move pa Baranka/Sharks kaba i Sor Moesquit pa Pitufos. Dirigente di Catpower Pepi Martis a bisa nos ku tur hende a keda pero parse ku e amigunan menshoná a bai Baranka i Pitufos respektivamente. Nos a tende ku Edichi Martina a duna palabra na Catpower pero esei ta rumor. Despues nos lo tuma kontakt ku Edwin ‘Edichi’ Martina pa por haña mas detaye. Edichi Martina a partisipá den un wega di training ku Pitufos algun luna pasá den un wega di training riba Sam Bunting Ballpark.
• * * * * *
Den Sòftbòl Femenino a start ku 50+ den 2019 i tabata un éksito rotundo kaminda Treasure a gana di Tur Goso den final. Naturalmente e direktiva di Liga Streanan di Ayera ta pendiente pa wak kon ta bai para ku e asuntu di Covid aki. Manera semper lo tin e liga 35+ di Sòftbòl Femenino tambe di Liga Streanan di Ayera. Liga di Nos Tur tambe ta wantá. Por lo pronto lo keda ku dos liga den Sòftbòl Femenino Veterano. E otro dos liganan ku a lanta un tempu no tei mas. Nos ta keda te aki pa awe.
