Lesadónan di Deporte Kòrsou bontardi. Nos tei atrobe kargá ku informashon di Beisbòl i Sòftbòl. Nos tin informashon no ofishal ku Torneo di Karibe no ta tuma lugá mas. Ekiponan a mobilisá pa bisa FEBEKO pa konsentrá mas riba e kampionato lokal mirando e pandemia ku no a terminá ainda i hopi otro aspekto ku por pone ku e torneo lo no bira eksitoso. Ekiponan a para riba tambe ku no ta hunga 12 wega sino 3 buelta i un buelta Round Robbin.
* * * * *
Den Beisbòl Veterano tin varios kambio mas na kaminda. Direktiva di ekiponan a kuminsá mobilisá pa regla nan traspasonan. Den dianan benidero nos tin e kambionan ku ainda ta tumando lugá den Beisbòl Veterano. E kambionan konosí i di menshoná tabata Kelvin Winklaar i Raymond Leonora di Bulldogs pa Quality Stars, Emilio Velarde di Bulldogs pa Santa Maria. Ian Leito di Bulldogs pa Santa Rosa. Bulldogs a pèrdè 4 pila ku tei presente na tur wega. Mas kambio ta Ray Soerka di ekipo Marchena Stars pa Santa Maria. Parse ku Santa Maria tin un bòm pa temporada 2021. E intenshon tababa pa start temporada promé ku 19 di yüni, pero tin varios detaye ku mester keda atendé.
* * * * *
Junny Obispo manager di Quality Stars lo pasa pa Santa Maria PIrates den 2021, anke tur detaye no ta kla ainda. Emile Haswell Sr. lo ta manager di ekipo Quality Stars den 2021. Quality Stars tin algún piska grandi na kaminda i no ta klá ainda ku nan búskeda di hungadó pa 2021. Nan tabata tras di Ramiro Balentina di Santa Maria PIrates, pero Ramiro un dje pilanan di Santa Maria a opta pa keda ku e Piratanan di Santa Maria den Beisbòl Veterano. Ramiro tabata manager kampion ku Santa Maria Pirates na 2018 den Beisbòl Dòbel A.
* * * * *
Beisbòl Liga 50 tambe lo ta ON den 2021 i ainda BEVEKO no a tende nada di ekipo Otrabanda ku aña pasá a anunsiá ku no lo djoin Beisbòl 50+ pa asina forma 5 ekipo. Timnan Jandoret, Yesterday, Sigi Hunga i Vosama ya a konfirmá. Djaweps dia 27 di mei lo tabatin reunión na Klup de Oleander na Weg naar Welgelegen. Keda pendiente pa mas informashon. Den pasado direktiva di BEVEKO a tene varios reunión na e klup menshoná. Manera ya nos a anunsiá na hopi okashon, BEVEKO tin un direktiva nobo enkabesá pa Shendy Cras i varios personahe konosi den Beisbòl manera Dennis Dambruck, Gino Valeriaan, Gibi Denisia, Etienne Kooks i Hensly Benito.
* * * * *
Djaluna nos tabata na Van Engelen Ballpark pa sigi e desaroyonan rondo di e parke. Bou di guia di Sergio Leon, presidente di Fundashon Van Engelen Ballpark, nos a risibí un rekorido na e parke. Nos a pasa Vèlt A i Vèlt B i wak e trabounan ku ta tumando lugá. E batting tunnel banda di tersera base di Vèlt A a keda renobá. Patras di Vèlt A tin 5 batting tunnel, montíkulo kaminda dos picher i dos kèther por tira den bullpen i un lokalidat ku por duna formashon despues di ora di skol. E lokalidat ei ta full ekipá ku aire kondishoná, kushina i baño pa hóbennan.
* * * * *
Liga Amstel, Liga Van Engelen i Liga 40 ta pendiente pa mas ekipo pa hasi e liganan grandi bèk manera nan tabata ántes. Un tempu Liga Amstel tabatin 13 ekipo, Liga van Engelen 10 ekipo i LIga 40 tabata 8 ekipo. E interes pa Slowpitch a baha, debí ku esnan ku tabata hunga e Slowpitch ku amor i dedikashon a pasa pa Liga 50 i Liga 60. Varios tambe ta bai Beisbòl Veterano ku a krese último tempu formal i dado momentu a stòp di tuma ekipo den Beisbòl Veterano i a lanta Liga 50 tambe pa algún hungadó por dibertí trankil djadumingu mainta.
* * * * *
Van Engelen Ballpark lo bira un kos hopi serio ku dos parke ku lus. Ké mèn, den siman por hunga Liga 40 kombiná ku un liga komersial. Djasabra Liga 50 ta hunga pareu ku Liga Amstel. Djadumingu Liga van Engelen lo por kombiná ku e liga komersial. Tin lugá pa bòrchi tambe riba Vèlt B na Van Engelen Ballpark. Interesádonan por tuma kontakto ku Sergio Leon. Keda pendiente pa informashon di otro liganan. Pa loke ta Beisbòl Veterano, reunión general di djaweps lo disidí ki dia lo start. Ta planiá pa start dentro di un luna. Nos ta keda te aki pa awe.
