Fanátikonan di Deporte Kòrsou, bonochi. Deporte a kuminsá move, miéntras Farandula tambe lo bai start. Liganan a kuminsá reuní riba nivel di direktiva pa prepará pa kampionatonan start. Direktiva di Beisbòl Veterano tabatin un reunion ku representante di ekiponan djaweps último na De Oleander. Reunion interesante ku e direktiva nobo pa presentá i mayoria ekipo tabata presente. Ekiponan di Beisbòl Veterano ku no tabata presente tabata Santa Maria, Quality i Marlins. Esnan presente tabata Santa Rosa, Jandoret, Otrabanda, Vosama, Marchena, The Brothers, Azucar, Isla i Bulldogs. Basta desishon klave a tuma lugá pa loke ta trata kampionato BEVEKO 2021.
* * * * *
BEVEKO ku su direktiva nobo tin varios asuntu nobo i pa loke ta trata premionan individual, a pone e kriterianan foi tempran riba papel. Vários traspaso e tuma lugá despues di e reunion ei, entre otro Orsendo Clemencia pa Isla Crackers i Michelangelo ‘Ando’ Cijntje pa Santa Rosa. Tur dos hungadó tabata den Jandoret Raiders i nan a pasa pa otro ekipo. Jandoret ta pendiente di papel di traspaso di Victor Caldera tambe ku a pasa pa Bulldogs. Santa Maria ta e ekipo mas aktivo despues di temporada, mas aktivo ku ekipo Quality Stars. Santa Maria a logra gara dos grandi den pitu aki, kos di siman pasá. Ta trata aki di Dave Kirindongo i Stanford Landburg. Dave ta bai pa su promé aña den Beisbòl Veterano miéntras Stanford a hunga temporada pasá den ekipo Isla. Ray Soerka i Emilio Velarde tambe a bai Santa Maria manera nos a informá na hopi okashon.
* * * * *
4 miembro di direktiva di BEVEKO tabata na reunión siman pasá. Shendy Cras komo presidente, Dennis Dambruck, vise presidente, Gilbert Denisia ku ta direktor di kampionato i Ettienne Kooks (komisario). Gino Valeriaan i Hensly Benito a anunsiá ku nan tin un otro reunión i no por ta presente. A pone atenshon riba miembresía, esta kon un ekipo ta bira miembro di BEVEKO, kódigo di kondukta, sanshon, reglanan di partisipashon na kampionato di BEVEKO, Liga 40, Liga 50, lista di hungadó, traspaso, hungadó liber, responsabilidat di manager i coach, reglanan di wega i klasifikashon i formato di kampionato. E kampionato lo bai un buelta i despues e promé 6-nan ta klasifika. 5 vs 6, un wega. Despues ganadó 5/6 kontra 4 i despues i play-off ta sigi normal manera kustumber. Pa medio fin i medio òktober temporada Beisbòl Veterano a terminá. Desishonan ta tumá kaba i ekiponan ku no a partisipá na e reunión a keda kòrtiku pa loke ta trata nan opinion.
* * * * *
E reunión a dura 3 ora i mei debí ku ta basta detaye tabatin. Tantu regla i detayenan ku tabata tei kaba i otro kosnan. Ekiponan a vota tambe pa picher tambe por haña koredó di kortesía i pichernan tambe por sosegá na kurpa pa bai sigi ku e trabou duru riba montíkulo meskos ku ta e kaso di e kèchernan. Liga 50 tambe ta ON ku 5 ekipo pa temporada 2021. No por a bai masha den detaye pa loke ta trata skèdjel di Liga 50 i kon ta bai hinka e kampionato den otro. Tin un grupo ta bezig ta negoshá ku Tio Daou òf Stadion Johnny Vrutaal pa si akaso mester di espasio pa hunga wega di Liga 50, dos ora, mesun time limit ku 40+ ta hunga.
* * * * *
Ban rápido pa Liga 50 di Sòftbòl ku ta pendiente pa start 26 di yüni na Van Engelen Ballpark. Ekiponan a reuní djaluna 24 di mei i ta pendiente pa reuní dia 31 di mei na e lugá di kustumber. Traspasonan mester ta den promé ku 7 di yüni pa e 15 ekiponan por sinta atrobe pa por start 26 di yuni. Den kaso ku no bini klá ku detayenan, lo start dia 3 di yüli ku Liga 50 na Van Engelen Ballpark. Liga 50 i otro liganan mester pidi pèrmit parse i pone un ‘Crowd Manager’. Liganan ta pensa ku e ekipo ku tin barwacht mes por regla e ‘Crowd Manager’ ku tin mas habilidat pa tene kos bou di kontròl i ‘any time’ gobièrnu por manda kontròl na e lugá. Vários kambio den Liga 50. Tin algún hungadó ku a kambia di ekipo algún biaha kaba. Kambio den pitu ta ku Spin Lourens a bai Baranka i Sor Moesquit a bai Pitufos. Michiel de Roon di Catpower ku tabata na kaminda pa Flamboyan/Tigers a bira bèk pa Catpower. Nonnie de Roon ku tabata kasi den Ban Serio a bira bèk pa Catpower. Nos ta kargá ku mas informashon. Nos ta keda te aki pa awe.
