Fanátikonan di Extra Inning, bon dia i felis wikènt. Nos tei atrobe kargá ku informashon di Beisbòl i Sòftbòl. Algún hungadó di Beisbòl Veterano ta pendiente pa tira un wega kontra di ekipo Firebirds di Beisbòl Dòbel A. E wega lo tuma lugá dia 13 di yüni den Tio Daou Ballpark. E wega lo start nèt 4.30’or pa kaba 6.30’or. Ora nochi sera si, doló di kabes pa e veteranonan. Beisbòl Veterano no sa hunga anochi. Na Aruba si Veteranonan 40+ ta hunga beisbòl anochi normal. Nos a yega di wak un wega di Sòftbòl Liga 50 pa loke ta trata ABC Liga 50 anochi den Stadion Post 6. Doló di kabes grandi pa e 50+nan i hopi di e 40 +nan tambe. E wowonan a kuminsá bai atras.
* * * * *
By the way, Liga 40 mester di mas tim pa start kampionato ku 7 òf 8 tim. 6 ekipo lo kompetí fuerte den Liga 40 di Sòftbòl e aña aki na Van Engelen Ballpark. Nos a tende ku ekiponan Jaws i Navegantes a kai afo. Pronto Vèlt B lo tin lus i posibilidat tei pa organisá un Liga Komersial banda di e Liga 40. Ekiponan ku lo kompetí den Liga 40 ta Crazy Tigers, Baranka, Swift, Gamers, Jaws i Navegantes. (Ayera nos a tende ku e dos últimonan aki a kai afo). Liga van Engelen tambe mester di mas ekipo, mièntras Liga 50 ta ninga ekiponan. Liga Amstel tambe tin lugá pa mas ekipo. Nos no sa kon a para ku e asuntu di Crowd Manager na Van Engelen Ballpark durante weganan.
* * * * *
Bèk pa Beisbòl Dòbel A, kosnan ta kayente entre direktiva di FEBEKO i representante di ekiponan. Kampionato di Karibe ta ON di 26 di yüni pa 3 di yüli. Ekiponan Cuba, Panama i Puerto Rico lo ta na Kòrsou. Parse ku Virgin Islands lo remplasa Panama. Pa 10 di yüli e kampionato lokal lo start i ta pendiente pa hunga 3 buelta. Siman pasá nos tabatin un entrevista ku Jedrek Magdalena ku ta presidente di FEBEKO tokante e Torneo di Karibe i e kampionato di Beisbòl Dòbel A. Ekiponan a sigi move pa buska hungadónan. Algún desishon a kai den reunion general, entre otro ku no ta permití hungadónan profeshonal hunga. E asuntu di draft tambe a wanta un ratu. Nos ta pendiente pa un komunikado ofishal di FEBEKO.
* * * * *
Ekipo Firebirds ku lo hunga kontra selekshon di Beisbòl Veterano ta full den training. E wega ei ku lo tuma lugá djadumingu 13 di yüni, lo ta un fundraising i entrada ta 5 florin. Yega tempran debí ku ta un kantidat di hende por drenta i mester bisti tapapoka. Firebirds a haña masha hopi hungadó i ta sigur ku nan lo por drenta den e promé 4-nan. Ta 6 ekipo ta klasifiká den Beisbòl Dòbel A. Firebirds a haña hungadónan manera Shair Lacrus, Laishenel La Cruz, Nathan Macaya, Jerseley Cicilia, Jurickson Fecunda, Aldrich Isenia, Anthony Cijntje, Renny Swalef, Giles Martis, Jonathan Thielman, Norangelo Jacobus i Sorick Liberia. Hungadónan ku a bai ta Marlison Brunken, Mairion Brunken, Draydon Evelina, Madison Ortega i Aldrin Anastacia a stòp.
* * * * *
Hungadónan di Beisbòl Veterano ku ta pendiente pa kompetí vs Firebirds ta Payo Anderson, Johnny i Ramiro Balentina, Orcendo Clemencia, Roderick Eustatia, Raylan Francisca, Didi Gregorius, Emile Haswell Jr.,Rydell Isabella, Dave Janga, Jair Josepha, Dave Kirindingo, Stanford Landburg, Raymond Leonora, Hayzem Martina, Rodney Michel, Dayron Puriel, Raymond Soerka, Merieldo Trinidad, Emilio Velarde, Julius Veers, Earl Virginia, Emile Haswell Sr i Kelvin Winklaar. E selekshon a train djamars i djaweps bou di mando di Johnny Balentina, Emile Haswell Sr. i Carlos Pineda.
* * * * *
Den Liga 50 tin algún traspaso pegá. Catpower parse ta na bida i ta kompletu pa apertura di kampionato. Djaluna 31 di mei tabatin reunion atrobe entre ekiponan i direktiva. Liga 60 ta pendiente pa start temporada 2021. Dianan 2, 3 i 4 di yüli tin wega di 60+ internashonal na Frank Curiel Ballpark entre ekiponan di Kòrsou i di Aruba. Nos lo dal Rudy Brunken un ‘call’ pa mas detaye. Djadumingu a start e tradishonal Torneo Warm-up 60+ organisá pa ekipo Lions. E torneo ta tuma lugá na Frank Curiel Ballpark. Den kurso di dianan nos lo tin mas detaye. Den MLB tabatin weganan kandela wikènt pasá entre Yankees/Boston i Dodgers/Atlanta. Jonathan Schoop kayente mes siman pasá. Jacob de Grom, picher estelar di New York Mets, un kos hopi serio tirando 100 mia riba un rust manera nada no pasa. Batiadónan sa ku ta ‘fastball’ ta bini gewon 100,101 i 102 mia konstant inkreibel. Un ERA di 0.56 despues di 10 start. Kosnan ku a pasa 100 aña pasá den Beisbòl MLB. De Grom tabata tremendo atrobe djabièrnè 11 di yüni kontra di San Diego, 0 kareda permiti atrobe i 10 ponche. Nos ta keda te aki pa awe.
