Fanátikonan di Extra Inning, felis dia i felis siman. Beisbòl Veterano ta kla pa start fin di luna. Den e reunión di djarason 9 di yüni na De Oleander, ekiponan a vota pa start dia 26 di yüni enbes di un siman promé ku ta dia 19 di yuni. En konekshon ku Dia di Tata, ekipo nan a pidi i vota pa start un siman despues i direktiva a bai di akuerdo. E sigiente siman probablemente lo tin un apertura ofishal na Tio Daou Ballpark kombiná ku hopi aktividat. Lo tin un plataforma digital pa transmishon di e wega di apertura bibu for di probablemente Tio Daou Ballpark. Den 2021 lo tin mayoría di wega atrobe na Vi Jansen Ballpark, pero lo move ku algún wega pa otro parkenan na Kòrsou, entre otro Tio Daou Ballpark.
* * * * *
Distribier (Amstel Bright) lo ta spònser di kampionato di Beisbòl Veterano. E kampionato lo karga nòmber Kampionato Beisbòl Veterano Amstel Bright. Manera nos a splika anteriormente, e kampionato lo bai un buelta i despues e promé 6-nan ta klasifiká. 5 vs 6, un wega. Despues ganadó 5/6 kontra 4 i despues play-off ta sigi normal manera kustumber. Pa medio fin i medio òktober temporada Beisbòl Veterano ta terminá. Tur ekipo ku esepshon di Yesterday tabatin representante na reunión di djarason último na e reunión general.
* * * * *
Ekiponan di Beisbòl Veterano ta moviendo brabu mes rumbo pa komienso di kampionato. Varios kambio grandi a tuma lugá i djarason varios dirigente di e ekiponan a entregá traspasonan. Ekiponan ku risibi hungadó mester paga e tim ku a pèrdè e hungadó 75 florin i e ekipo ku risibi hungadó mester paga 75 florin na BEVEKO. Ké mèn, un ekipo nobo lo mester paga 150 florin pa kada hungadó nobo òf mihó bisá hungadó ku bini di un otro ekipo di BEVEKO. Ekiponan hopi aktivo den traspaso di hungadó tabata Santa Maria i Quality Stars.
* * * * *
Santa Maria Pirates tin un ekipo ku un profundidat serio den picheo. Santa Maria lo tin Didi Gregorius, Raymond Soerka, Sabalo Estanista, Roy Philips, Dave Kirindongo, Emilio Velarde ets. Emilio Velarde, Raymond Soerka, Dave Kirindongo ku ta e hungadónan nobo di Santa Maria, ta move defensivamente den tereno tambe. Bulldogs ta e ekipo ku a pèrdè mas hungadó ku tabata regular. Emilio Velarde, Kelvin Winklaar, Raymond Leonora i Ian Leito. Bulldogs a risibí e kètcher Victor Caldera for di Jandoret Raiders. Na final di e kolumna nos lo tin mas di e kambionan ku a tuma lugá.
* * * * *
Rignald Martina, un dje gran pichernan di Beisbòl Dòbel A i Beisbòl Veterano a bai bèk ekipo Santa Rosa Memories despues di tabata un aña ku e ekipo Marchena Stars. Rignald Martina lo retirá den e ekipo di Santa Rosa Memories, pero nos fuente no a bisa ku ta despues di temporada 2021 òf despues. Santa Rosa Memories lo tin Ando Cijntje i Ian Leito tambe den 2021. Ando Cijntje a bini for di Jandoret Raiders i Ian Leito tabata den Bulldogs di 2010 pa 2020. Ian Leito tabata práktikamente un dje fundadónan di Bulldogs i un dje hungadónan klave i ehemplar di e ekipo.
* * * * *
Laga nos bai un ratu pa Liga 50 di Sòftbòl. Varios ekipo a reforsá formalmente, entre otro Marlins ku a risibí dos batiadó resio di poder i hopi trayektoria. Skippy Sambo i Vriendjes Cicilia a move di Catpower pa Marlins i ya a train ku Marlins. Dos refuerso pisá huntu ku Farley Lard ku ya a move un wega di training i varios training ku ekipo Marlins. No ta konosi ku Spin Lourens a bai Baranka. Sor Moesquit si a move pa Pitufos i e shortstop di 2021, e Dominikano Carlos Madera, a move Catpower. Tin rumor ku Madera a bai Pitufos bèk den pitu aki. Ray Soerka a bai Flamboyan ánke tin otro vershon ku Soerka ta den Catpower ainda. Keda pendiente pa mas informashon di Liga 50 Sòftbòl ku ta pendiente pa start pa fin di luna na Van Engelen Ballpark.
* * * * *
Mas kambio promé ku nos terminá e kolumna. Zimmerman di Azucar a bai Santa Maria. Jurien Martina i Gregory Bito di Quality Stars pa Marchena Stars. Alcides ‘Ali’ Juliana di Otrabanda pa Santa Rosa. Jair Josepha i Lovera a bai Quality Stars. Jair tabata den Marchena Stars i nos no ta kòrda den kua ekipo Lovera a hunga den 2020. Nos ta keda te aki pa awe.
