Lesadonan di Deporte Kòrsou felis dia. Nos tin varios informashon di Liga 50 di Sòftbòl ku ta bai start dia 26 di yüni. Ké mèn, Beisbòl Veterano i Sòftbòl 50 ta start riba mesun fecha. Varios kambio den Liga 50 i nos a menshoná varios durante simannan ku a pasa. E últimonan ta Skippy Sambo i Vriendjes Cicilia di Catpower pa Marlins. Farley Lard tambe ta den Marlins basta tempu kaba, miéntras Papo Antonia lo debutá den Marlins e kampionato aki. Sigur 4 hungadó di kaliber ku lo yuda Marlins rumbo pa titulo. Marlins ta dirigí pa Roy Jakoba ku asistensia di Erwin ‘Junny’ Marsden.
* * * * *
Djaluna tabata último dia di entrega di lista di Liga 50 di Sòftbòl. Hopi ta pendiente di e lista di Catpower ku tin hungadónan nobo, entre otro Bibi Gonet i Eddie Obispo. Lio Rosa tei for di 2020 den Catpower. Nonnie i Maichiel de Roon a keda den Catpower pa 2021 despues ku tur kos tabata klá pa move pa otro ekipo. Myron Wijman a keda den Ban Serio despues ku e tabata den direkshon di Marlins. No ta konosí ainda kua tim Edichi Martina a bai den 2021. Segun nos Edichi ta agente liber ainda. Ekipo Baranka/Sharks a move mes mes den offseason i a haña varios hungadó. Nos a tende ku Bibi Gonet i Eddie Obispo a bai Pitufos. Edichi Martina a move pa Flamboyan. Tur e hungadónan aki lo ta den nan promé aña di Sòftbòl 50+
* * * * *
Baranka lo tin Kenny Hellement ku a kumpli 50 aña temporada 2020. Baranka tin Spin Lourens, Dennis Dambruck, Denley Marten i Tico Ramazan pa temporada 2021. Jaws a haña Lesley Fer i Cedrix Valies. Fer tabata den ekipo Sluggers i Valies den Baranka/Sharks. Flamboyan tambe tin varios hungadó nobo. Baby Alcantara a move di Lions pa Flamboyan i varios hungadó mas i nos ta pendiente pa mas detaye. Liga 50 lo hunga riba djasabra riba tereno A na Van Engelen Ballpark i na mes momentu Liga Amstel riba tereno B. Kampionato lo drei un buelta kompletu, despues lo parti ekiponan den pul. Ké mèn 9 wega + 4 den pul ta bira 13 wega. Lo pone tur ekiponan bèk den un pul pa saka e mihó kuater pa sigi pa play-off semi-final i final.
* * * * *
Direktiva nobo di BEVEKO ta moviendo den gran forma riba un nivel hopi profeshonal. Miembronan ta risibí nótulonan di reunion anterior via mail. Tin algún kambio di regla pa loke ta Beisbòl Veterano 2021, entre otro ku por manda koredó di kortesia pa pichernan. Ekiponan a vota pa hunga un buelta so i despues play-off entre 6 ekipo, usando e sistema di FEBEKO, esta 6 vs 5, despues e ganadó kontra 4, sigí pa e tradishonal play-off semi-final. Lo tin varios wega na otro tereno, ánke Vi Jansen lo keda e sede prinsipal di Beisbòl Veterano. Direktiva ta pendiente pa nòmbernan na ken kampionato lo ta dediká. Verney Jansen a keda di aserká Kenley Jansen pa sponsering di bala pa Beisbòl Veterano. Distribier, Amstel Bright lo ta spònser di Beisbòl Veterano den 2021. Dia 26 di yüni Kopa di Karibe entre 4 pais ta start na Tio Daou Ballpark. Ekipo Firebirds a gana di selekshon Veterano relativamente fasil ku skor di 9-2. Nos lo tin mas detaye di e wega. Nos ta keda te aki pa awe.
