Fanátikonan di Deporte Kòrsou , bontardi. . Nos tei atrobe kargá ku informashon di Beisbòl i Sòftbòl. Nos ta bai drenta e último siman kaminda ekiponan por kaba di train pa ta den forma. Tantu Beisbòl Veterano komo Liga 50 ta bai start e wikènt di 26 i 27 di yüni. Torneo di Karibe tambe ta start e siman aki, djasabra, esta dia 26 di yüni ku wega entre Kòrsou i Cuba prime time den Tio Daou Ballpark. Mesun dia tin Virgin Islands kontra di Peru. Beisbòl Veterano ta start djasabra 26 di yüni na Vi Jansen Ballpark i sigiente wikènt ta bai Tio Daou Ballpark i ta pendiente pa masha hopi aktividat.
* * * * *
Djarason siman pasá ekiponan mester a entregá listanan i Dave Kirindongo ta riba lista di Santa Maria Pirates. Dave Kirindongo i Stanford Landburg lo bira e ‘1-2’ di Santa Maria Pirates. Nos a skibi e siman aki ku Santa Maria tin un staf fèrfelu di picheo ku entre otro Didi Gregorius, Dave Kirindongo, Ray Soerka, Emilio Velarde, Amador Nita ets. Beisbòl Veterano lo bira hopi grandi e temporada aki ku spònser nobo ku ta Distribier. Dave Kirindongo no a hunga den Beisbòl Veterano ainda i tabata liber pa por bai kualke ekipo ku e tabata ke sin traspaso. Skèdjel di Beisbòl Veterano a sali djaluna último i skèdjel di Liga 50 di Sòftbòl a bai pa ekiponan for di komienso di luna. Sòftbòl Liga 50 lo tei atrobe na Van Engelen Ballpark den kombinashon di Liga Amstel. Tin algún kambio di último ora den Liga 50 di Sòftbòl.
* * * * *
Bibi Gonet i Eddie Obispo ku tabata den direkshon di Catpower a bai Pitufos. E dos hungadónan menshoná lo bai partisipá pa promé biaha den Liga 50 di Sòftbòl. Edichi Martina a pasa pa ekipo Flamboyan. Kampionato Liga 50 ta dediká na Wim Felicia, Wimbert Hato i Pim Fangman. Ta trata di 3 personahe ku no tin mester di masha introdukshon den Sòftbòl Slowpitch. Wim ta e picher ku mas viktoria, mas kampionato i mas MVP riba su nòmber den Slowpitch. Wimbert Hato komo hungadó di basta aña stret den e deporte i ketu bai aktivo den Liga 60 i den Liga 50 si tin mester. Wimbert Hato tabata den direktiva di Liga 50 na masha hopi okashon riba tur nivel, tantu presidente, sekretario miembro di direktiva.
* * * * *
Pim Fangman ta dirigente organisadó pa basta aña. Den komienso di Liga 50 i Liga 60 Pim tabata aktivo komo hungadó den Catpower. Pim ta gran promotor di Sòftbòl Slowpitch komo presidente di Liga Amstel pa hopi aña i tempu di Amstel su tempu hòmber grandi pa loke ta trata spònser di Slowpitch tantu na Kòrsou komo na Boneiru. Te ainda leu riba 70+ Pim ta aktivo normal na van Engelen Ballpark i ta maestro den e asuntu di bar i inventario na Van Engelen Ballpark ántes Suvek Ballpark. Liga Amstel, Liga 50, Liga 40+ i Liga Van Engelen ta drei normal tras di otro sin niun klase di bruashon pa loke ta trata e bar tur siman aña ’den aña’fó na Van Engelen Ballpark.
* * * * *
E kampionato 50+ Sòftbòl lo drei e sistema aki. Tur 10 ekipo lo hunga kontra otro den promé buelta. Den di dos buelta ekiponan lo keda partí den pul 1, 3, 5, 7, 9 den Pul A i 2, 4, 6, 8 i 10 den pul B. Despues e 4 mihó ekiponan lo bai play-off 1 vs 4, 2 vs 3 i despues final. Tantu semi-final komo final ta serinan mihó di 3. Ban Serio, ekipo super kampion pa 3 aña sigí rumbo pa dinastía, a pèrdè dos grandi ku ta Tico Ramazan i Edmar Cornelia. E dosnan aki a pasa pa Baranka. Ban Serio a haña Barry van het Kruys, Hensley Josephina, Fabiani Orcadio, Sherdon Rombley, Johnny Balentina i Luigi Yanez. E fuente di Ban Serio a bisa nos ku Myron Wijman, shortstop estelar di e ekipo no a bai niun kaminda. Ké mèn, ela keda den Ban Serio parse. Ban Serio lo bai hasi uso di Miro Daal, Nato Anasagasti, Yuyu Pieternella komo picher huntu ku e dos otro pichernan Tucu Martinus i Michelangelo Boekhoudt. Nos ta pendiente pa Torneo Lions. Ekipo Nos Tambe Por a kai afó parse. Nos ta keda te aki pa awe.
