Fanátikonan di Extra Inning, bon dia. Nos tei atrobe ku informashon di Sòftbòl i Beisbòl. Djaluna tabatin konferensia di prensa en konekshon ku Torneo di Karibe di Beisbòl ku lo konta ku partisipashon di Paisnan Peru, Cuba, Virgin Island i Kòrsou. Djabièrnè pa 5.30 tin meet & greet na Bugs Bunnny na Mahaai. Nos tin hopi aña sin mira un torneo internashonal riba nivel di Senior. For di 2014, tur aña nos tabatin torneonan di Little League na Kòrsou ku esepshon di aña 2020 ku tabatin e pandemia COVID-19.
* * * * *
Na 2021 tabatin varios kampionato Latino Americano i Karibe programá, pero tur a keda suspendé atrobe pa Williamsport pa motibu di Covid. Mester bisa mesora ku lo bai tin algún torneo Latino Americano organisá pa Curacao Little League Foundation di spònser pa entre otro RBC Royal Bank ku ta na kaminda. Fin di yüli lo tin Minor, Little i Intermediate na Kòrsou. Na Aruba, selekshonnan di Kòrsou lo partisipá den Junior i Senior. Den luna di òktober lo tin Sòftbòl Little League Internashonal na Kòrsou probablemente den divishon Senior.
* * * * *
Fechanan di Minor, Little i Intermediate ta 26 di yüli pa 2 di ougùstùs. Sòftbòl Junior ta dia 4 pa 10 di òktober. Puerto Rico i Aruba lo tei sigur den Sòftbòl i den e kategorianan di Beisbòl tambe. Tur tres liganan di Kòrsou lo partisipá na e weganan. Nos ta pendiente pa e fechanan di play-off di Kòrsou. Little League a la karga i den wikènt tabatin weganan di Torneo Kenley Jansen. Ta for di 12 di yüni weganan di Torneo Kenley Jansen a sigi den kategoríanan Junior i Senior.
* * * * *
Den Junior League ekipo Sint Michiel bou di direkshon di Edmar ‘Boy Motor’ Cornelia ku rekòrt di 15-2 sigí Marchena ku tin 12-3 i Santa Maria 10-2. E super prospekto Curley Martha ta lider den bateo. Den Senior League tambe Sint Michiel ta den kabes (14-1) i akinan otro hungadó di Sint Michiel ta lider den bateo ku ta Mairoshendrick Martinus ku average di .576. Mairoshendrick tambe ta pendiente pa firma profeshonal un ora pa otro.
* * * * *
Nos ta bai pa Beisbòl Veterano kaminda skèdjel a sali pa ekiponan. Kampionato di Beisbòl Veterano ta start djasabra awor na Vi Jansen Ballpark ku 3 wega. Lo sigi djadumingu ku 3 wega atrobe na Vi Jansen Ballpark manera ta kustumber. E kampionato lo sigi den wikènt di 3 i 4 di yüli na Vi Jansen Ballpark pa despues bai Tio Daou Ballpark dianan 10 i 11 di yüli. E wikènt ei lo ta un wikènt di fiesta, kaminda lo tin varios atrakshon i apertura ofishal. Ta pendiente pa transmishon tambe via diferente plataforma. Spònser (Distribier) Amstel Bright tambe lo ta presente.
* * * * *
Weganan di e wikènt aki den Beisbòl Veterano ta djasabra 26 di yüni 10.30 Quality Stars – Marchena Stars, 13.00 The Brothers – Isla Crackers, 15.30 Jandoret Raiders – Marlins. Djadumingu 27 di yüni ta 10.30 Santa Maria Pirates – Vosama, 13.00 Yesterday – Veteranos Otrabanda 15.30 Azucar – Bulldogs. Lo ldeterminá home team durante e weganan. Pa di promé biaha lo skor weganan via e sistema Game Changer, ké mèn, nos lo ta up to date ku e resultado i sifranan di Beisbòl Veterano. Reglanan tambe a bai pe ekiponan. Shendy Cras ta presidente di Beisbòl Veterano Kòrsou i tin un bon tim su tras ku dirigentenan manera Dennis Dambruck, Gino Valeriaan, Gilbert Denisia, Etienne Kooks i Hensly Benito.
* * * * *
Sòftbòl Liga 50 tambe ta ranka sali temporada 2021 djasabra awor na Van Engelen Ballpark. Liga Amstel tambe lo start pareu ku Liga 50, ke men ta kandela ta bai tin kargá ku públiko na Suvek Ballpark. Djasabra 26 di yüni 10.00 Catpower – Jaws, 12.00 Artemisia – Sluggers, 14.00 Ban Serio – Flamboyan, 16.00 Lions vs Pitufos. Promé kandela di kampionato 2021 lo ta Ban Serio vs Flamboyan. Nos ta kòrda e wega di aña pasá kaminda Flamboyan a gana Ban Serio 11 pa 8. E wega tabata empatá bayendo último inning i Flamboyan a nota 6 kareda den nan último chèns i Ban Serio a kontestá ku 3 kareda i keda kòrtiku. E standing promé ku para e kampionato di temporada 2020 tabata Ban Serio 5-2, Flamboyan 5-3, Jaws 5-3, Marlins 5-3, Pitufos 4-3, Artemisia 3-3, Baranka Sharks 3-5, Lions 3-5, Catpower 2-4 i Sluggers 2-6. Nos ta keda te aki pa awe.
