Fanátikonan di Deporte Kòrsou bondia i felis siman. Nos tei atrobe ku informashon di Beisbòl i Sòftbòl. Liga 50 a sigi djasabra na Van Engelen Ballpark ku 4 wega. Baranka/Sharks a gana Marlins 10 pa 6, Flamboyan a derotá Artemisia 8 pa 6, Mon Repos Sluggers a derotá Jaws 7 pa 5. Ban Serio a blackout Catpower 19 pa 3. Ban Serio, Baranka i Lions ta e ekiponan invikto den Liga 50. Ekipo Pitufos tin 2-1 i tin varios ekipo ku 1-2 miéntras Catpower ta den sótano ku rekòrt di 0-4. Djasabra awor tin algún wega kandela, entre otro Jaws vs Baranka/Sharks, Flamboyan kontra Marlins, Mon Repos Sluggers kontra Lions i Ban Serio vs Pitufos. Den e artikulo nos tin mas detaye i e resultadonan di djasabra último.
* * * * *
Pa loke ta trata Beisbòl Veterano, promé ku e weganan di wikènt pasá solamente 3 ekipo tabata invikto. Isla Crackers, Santa Maria Pirates i Jandoret Raiders tabatin rekòrt di 3-0. Otro ekiponan tin 1,2 i 3 wega pèrdí. Ekipo The Brothers ta den sótano ku rekòrt di 0 ganá i 3 pèrdí. Ekiponan faborito pa klasifiká ta Santa Maria, Quality Stars, Isla, Jandoret, Bulldogs i Santa Rosa. Mesun 6 ekiponan ku a klasifiká kampionato 2020. E aña aki e promé 6 ekiponan lo klasifiká, 6 lo hunga kontra 5. Despues ganadó 6 vs 5 kontra di 4. Na momentu ku sobra 4 ekipo lo bai hunga e play-off di kustumber esta 1 vs 4 i 2 vs 3 den un seri mihó di 3 pa despues hunga e gran final, un seri mihó di 3.
* * * * *
Lidernan den Beisbòl Veterano ta Rodney Michel di Quality Stars ku tin 5 hit den 5 turno pa un average di .1000 despues di 3 wega. Ta sigi Dennis D’Arnault di Isla Crackers ku tin .750 i Quincy Kook di Isla Crackers ku tin .709. Christiaan Santiago di Yesterday tin .667 i Roderick Eustatius ta batiendo .667. Quincy Kook tin 7 RBI, Kelvin Winklaar di Quality Stars tambe tin 7, Julius Veeris di Isla Crakcers tin 5 RBI, empatá ku Jair Quant di Quality Stars ku 5. Sigbert Juliana di Vosama tin 4 RBI. Kuater picher tin un ERA di 0.00 den Beisbòl Veterano, Edmond Martina (Santa Rosa), Orcendo Clemencia (Isla), Michelangelo Celestina (Isla), Signald J. Burnet (The Brothers) i Emilio Velarde (Santa Maria) 0.00.
* * * * *
Xaviero Avastia (Vosama) ta number 1 den ponche tirá ku 13., sigí pa Nelson Reinita di Azucar ku 9, Bryon Kook di Bulldogs tin 8, Lester Victoria di Bulldogs ku 8 i Orsendo Clemencia ku 7 ponche. Wikènt benidero (24/25) no tin masha wega kandela, pero e sigiente wikènt tin entre otro Santa Maria vs Bulldogs, Quality vs Isla Crackers i Jandoret vs Santa Rosa. Den dianan benidero nos tin resultadonan di e weganan ku a tuma lugá e wikènt ku a pasa. Liga 50 di Beisbòl Veterano lo start djadumingu 25 di yüli. 5 ekipo lo partisipá na Liga 50, Jandoret, Vosama, Sigi Hunga, Otrabanda i Yesterday. Pa 2022 ekiponan Azucar i Santa Rosa lo djoin i 50+ di Beisbòl Veterano ta rumbo pa bira algu serio. Den 2022 lo tin djadumingu ku 50+ lo hunga 3 wega na Vi Jansen Ballpark.
* * * * *
Den Beisbòl Dòbel A, Wild Cats a derotá Royal Scorpions ku skor di 3 pa 2 djasabra den Stadion Johnny Vrutaal. Un wege bon bringá kaminda Wild Cats a dal 10 hit. Wild Cats ta mustra fuerte atrobe den 2021 despues ku nan a pèrdè den un final di 7 wega kontra di Santa Rosa. Djadumingu mester tabatin otro kandela entre Santa Maria Pirates i Santa Rosa Indians. Ekiponan lo reforsá segun e kampionato ta move. Wild Cats lo buska nan kètcher Bob Beaumont ku ta na kaminda pa Kòrsou. Bob Beaumont ta hungando na Italia. Shakir Albert ku tambe ta na Italia lo ta rumbo pa Sant Rosa. Parse ku Christopher Pietersz lo no ta disponibel pa Santa Rosa Indians den 2021, si e tei mes probablemente lo ta komo coach. Calten Daal èks profeshonal den Liga Menor ku entre otro Cincinnati, ta ku Wild Cats i lo keda biba na Kòrsou. Nos ta keda te aki pa awe.
