Fanátikonan di Deporte Korsou , nos tei atrobe ku kolumna Deporte Kòrsou ku informashon di Beisbòl i Sòftbòl. Liga 40 a sigi djaweps na Suvek Ballpark i Swift ta moviendo serio den direkshon di un titulo den Liga 40 despues di mas di 20 aña. Segun nos ta for di tempu di Raffy Josefa i Wenny Jakobanan aki Swift a logra un título. Tempu di Chucho Maduro, Sergio Leon, Ramon Galmeyer, rumannan Troeman i Hollander den Liga 40. Algun di nan no ta huntu ku nos mas. Organisashon Swift tin hopi historia ruman. Ekiponan mas bieu den Sòftbòl na e momentunan aki ta Swift, Jaws, Cicoza i Navegantes. Despues ta bini Pitufos, Marlins, Baranka, ets. Jaws ta den gran forma ku ekiponan riba tur nivel di hóbennan te ku 60+.
* * * * *
Swift ku picheo di Emilio Velarde a sali brabu i gana dos wega sigí, ganando dos grandi den Liga 40 ku ta Crazy Trigers siman pasá i Baranka e siman aki. Velarde lo bai tira varios wega pa Swift e temporada aki. Velarde a tira pa Swift kaba den Liga 40 na aña 2019 i no tabata efektivo manera komienso di e aña aki. Fernando Rosario i Francisco Alcantara tabata estelar i Velarde tabata mas bien batiadó i a terminá ku average di .565 na 2019. Sòftbòl Liga 40 di e aña aki interesante apesar ku tin 5 ekipo so. Ekipo Navegantes no ta den Liga 40 e aña aki, despues di masha hopi aña di partisipashon. Nos lo sigi Liga 40 djaserka e aña aki.
* * * * *
Un ratu den Grandes Ligas. Kenley Jansen tabata 3 wega ‘blown save’ sigí. Nos a wak e di 3 blown save, aki si mester bisa ku Kenley Jansen tabata di malu mes mes. E wega mester a terminá 3-1 ku rolling pa short. Shortstop di Dodgers Chris Taylor a kue a bala tira pa segunda riba un rust i e segunda base Neuse ta keda si strech pa kue e bala i e den review ta kambia e hugada i dekretá safe na segunda. Despues ta bini un chek swing kaminda bate e pasa masha leu mes i umpire na primera ta dekretá ku e bate no a pasa. Despues a sigi hit pa right ku a hasi e wega 5-3. Ya.. parti di e wega ruman. Bo mester risibi respaldo di bo hungadónan pa sali vensedor i terminá ku bon sifra komo picher. Bo no por poncha tur hungadó ku bo enfrentá.
* * * * *
Liga Streanan di Ayera ta pendiente pa start. E liga ta bai pa su di 25 kampionato. Saludo pa sra. Marlene Obispo di Liga Streanan di Ayera. E intenshon ta pa Solange van Gurp huntu ku su kasá Mompy van Gurp drenta mas den maneho di e liga i yuda e grandinan Marlene i Wilson Obispo. Keda pendiente pa mas detaye den Liga Streanan di Ayera ku ta ON den 2021. Prepará pa bin gosa di tremendo ambiente ku e sabroso pia di galiña i músika di ántes den tremendo ambiente.
* * * * *
Nos tin algún sifra di Liga 50 i Beisbòl Veterano. Ayera nos tabatin e standing di Beisbòl Veterano i awe nos tin algun sifra. Den Liga 50 Sedeney Lourens di Baranka ta lider den bate ku .875 empatá ku Junny Marselia di ekipo Sluggers. Gino Valeriaan di Baranka tin .856 i Geronimo Daflaar tin .833, Wendel van het Kruys tin .714. Daflaar i van het Kruys ta di ekipo Ban Serio ku ta den kabes di Liga 50. Ban Serio, Baranka i Lions ta invikto ku 3-0. Otro ekiponan tin 1, 2 i 3 wega pèrdí, miéntras Catpower tin 4 wega pèrdí. Clifton Ostiana di Artemisia ku ta bèk den Sòftbòl tin 7 RBI empatá ku Sedeney Lourens di Baranka. Galbao Boekhoudt di Ban Serio tin ERA di 0.00. Fernando Rosario di Jaws tin 5 ponche, Johan Cicilia tin 4 ponche. Djasabra 24 di yüli ekipo Ban Serio a keda invikto ku un viktoria riba nan Pitufos. Ekiponan invikto ta Ban Serio, Lions i Baranka.
* * * * *
Den Beisbòl Veterano Isla Crackers (4-0), Jandoret Raiders (4-0) i Santa Maria (3-0). Rodney Michel tin 8 hit den 8 turno pa un averahe di .1000 den 4 wega. Quincy Kook di Isla tin .700, Stanford Landburg tin un averahe di .667 empatá ku Skippy Sambo di Santa Maria. Kelvin Winklaar (Quality) tin 10 RBI, Quincy Kook (Isla) tin 7 RBI, Julius Veeris (Isla) 6 RBI. Edmond Martina (Santa Rosa) 0.00 lider den ERA, empatá ku Emilio Velarde. Xaviero Avastia (Vosama) ta lider den ponche ku 13. Beisbòl 50+ a start djadumingu ku wega entre Jandoret Raiders vs Sigi Hunga. Sigi Hunga a gana ku skor di 11-8. Ekipo The Brothers a laga Bulldogs den tereno.
