Fanátikonan di Deporte Kòrsou, bon dia. Liga Pabou ku ta biniendo fuerte bèk den Beisbòl Little League a klasifiká den tur tres kategoría, esta Minor Little i Intermediate i bira kampion den tur 3. Djaluna Den Tio Daou Ballpark, Pariba a gana Pabou den Senior 12-7 i djarason Junior Pabou a gana Junior Pariba 12 pa 6. . Weganan bálido pa e Klasiko di Junior/Senior entre Aruba i Kòrsou ku lo tuma luga na Aruba e wikènt aki na Post Chiquito. Debí ku e skèdjel ta pèrtá na Aruba, Kòrsou lo hunga kontra Kòrsou aki na Kòrsou mes.
* * * * *
Nos ta bai un ratu pa Slowpitch. Den Liga 50 e ekipo Lions, e revelashon di Liga 50 den 2021 a nòkout Baranka 14 pa 3 djasabra na Van Engelen Ballpark. Gregory Martijn tabata hermétiko komo picher i a plama 8 hit den 5 inning i tuma solamente 3 kareda. Felix Ibañez tabata den gran forma di 3-3. Sandy Marceli di 3-2 ku 5 kareda empuhá. Den otro wega Flamboyan/Tigers a nòkout Jaws 17-0. Flamboyan Tigers a pone nan rekòrt na 2 ganá i 3 pèrdí. Gilbert Keller, motor tras di Flambyan Tigers mes a tuma bala i picha pa Flamboyan gana. Vernon de Lanooi a dal homerun (grandslam) pa Flamboyan. Hungadónan manera Stanley Palm (3-3), Egbert Polonius, Michel Daou, Vernon de Lanooi tabata presente, ké mèn Flamboyan tabata kompletu.
* * * * *
Ban Serio a gana Artemisia 14 pa 6. Luigi Yanez tabata presente i a bati di 4-2. Galbou Boekhoudt picher ganadó a empuhá 3 kareda. Sherdon Rombley tambe na wega pa Ban Serio ku tin un tim hopi serio. Fabiani Orcadio tambe tabata na wega i a bati di 3-2. Willy van Thijs tabata di fiesta den wikènt i no a bai wega di Ban Serio. Mon Repos Sluggers a nòkout Catpower 13-2. Catpower tin rekòrt di 0-5 den e kampionato aki di Liga 50. Lider den bateo di Liga 50 ta Albert Pieternella di Ban Serio i Sedeney Lourens di Baranka ku tin .800. Wendell van het Kruys (Ban Serio) ta lider den kareda empuhá ku 9. Lesley ‘Le’ Martina (doño di Artemisia) ta lider den ERA KU 1.24. Fernando Rosario tin 5 ponche tirá.
* * * * *
Den Liga 40 di Sòftbòl, Swift a sigi gana derotando ekipo Jaws pa medio di nòkout 15-5. Crazy Tigers a dal Baranka 13-11. Baranka un tempu super kampion a sali pèrdè dos wega sigí. Baranka no ta kontando ku picheo di Kenny Hellement i a drei ku nèt 9 hende, sin shortfield den e wega menshoná. By the way, na momentu ku nos tabata serando e kolumna aki, nos a risibí e resultadonan di e dos weganan kandela ku nos a menshoná. E ekipo Jandoret Raiders a gana Sta Rosa Memories 8 pa 6 i Isla Crackers a gana Quality Stars ku skor pèrtá di 5 pa 4, Yesterday a gana Azucar. Vosama a dal Otrabanda 7 pa 2 den Beisbòl 50+
* * * * *
Liga Di Nos Tur a sigi djasabra último i nos no ta hañando resultadonan di e liga aki. Liga Streanan di Ayera a start den 50+ djadumingu último na Muizenberg Ballpark. E skorer prinsipal a tuma kontakto ku nos i resultadonan lo ta up to date. Promé ku e wega di e siman aki , Riordan Windster (Santa Rosa) tabata lider den bateo ku .478 empatá ku Swindley Lint (Santa Rosa ) i Jonathan Martijn (Santa Maria). Rojean Cleofa di Wild Cats ta lider den RBI ku 12. Sherwenne Antersijn picher di Santa Maria ta lider den ERA ku 0.00. Temesh Lourens di Royal Scorpions ta lider den ponche tirá.
