Fanátikonan di Deporte Kòrsou bon dia. Nos tei atrobe ku informashon di Beisbòl i Sòftbòl. Den Beisbòl Santa Rosa a zona un kampanaso riba Wild Cats djaluna último. Sta Rosa a dal Wild Cats 10 pa 8 i hasi e kampionato di Beisbòl Dòbel A hopi interesante. Despues Royal Scorpions a gana Santa Maria 8 pa 2. No tin ekipo invikto mas, Royal Scorpions ku tin 7-1, Wild Cats 6-1, Santa Rosa 4-3 , Firebirds 3-4, Santa Maria Pirates 3-5, Groot Kwartier 3-5, Marchena 0-6.
* * * * *
Liga 50 ta sigi djasabra awor na Van Engelen Ballpark ku 4 wega. Marlins ku tin un start un poko slow, 2-2, lo bini fuerta pa topa Mon Repos Sluggers ku tin 2-4. Otro wega ta Jaws (1-4) vs Lions (5-0). Mas wega ta Flamboyan vs Baranka/Sharks. Esei ta e kandela di djasabra awor. Flamboyan (2-3) i Baranka ku a pèrdè invikto wikènt pasá tin rekòrt di 4-1. Ekiponan invikto ta Ban Serio i Lions ku ta empatá na promé lugá (5-0). E dos ekiponan aki lo hunga djasabra 14 di ougùstùs pa 4’or pm na Van Engelen Ballpark naturalmente. Lions ya a anunsiá Gregory Martijn, miéntras Nelly Jakoba tambe a pidi bala. Ban Serio lo presentá ku nada mas i nada ménos ku Michelangelo ‘Galbao’ Boekhoudt. Kandela mes mes, pero pa otro siman.
* * * * *
Liga Amstel tambe su fanátikonan a kuminsá yega na momentu ku nan a mira hopi outo na van Engelen Ballpark. E outonan ta di esnan di Liga 50 i dimes e hobénnan a kuminsá yega pa wak kiko tin. Van Engelen Ballpark ta un feria kompletu riba djasabra, diferensia masha grandi mes kompará ku djadumingu na momentu ku un liga so ta drei. Beisbòl Veterano a keda kayente na fanátiko tantu riba djasabra komo djadumingu. Manera nos a bisa ayera wikènt aki no tin masha kandela, pero sorpresa por kai. Te ainda úniko sorpresa grandi tabata na momentu ku The Brothers a dal Bulldogs djadumingu 25 di yüli. Ekiponan poné pa klasifiká ta Crackers, Jandoret, Santa Maria, Quality Stars, Bulldogs i Santa Rosa manera tabata e kaso den 2020 i e último añanan den Beisbòl Veterano.
* * * * *
Nos a buska algun informashon di Liga di Nos Tur i ta ekipo Sin Stress ta invikto ku rekòrt di 4-0. Ekipo kampion Un Kara a pèrdè kontra Chilling ku skor di 6-3 djasabra último den Frank Curiel Ballpark. Nos ta pendiente pa e numeritonan. Chilling a drecha pisá i tin varios hungadó di ekipo Nos Goso, entre otro Myriela Carlo, Hemy Bernardus, Sovieny Kleinmoedig. Chilling a sorprendé Un Kara ku tabatin un defensa wankalá djasabra kometiendo 5 eror i tuma 4 kareda shushi. Nan no a yuda e bon picheo di Mairis Obispo. Di otro banda e defensa di Chilling tampoko tabata di kanta makamba, pero a saka e outnan na momentu di bèrdat. E ofensiva di Un Kara a bati solamente 6 hit i Chilling a dal 8 hit.
* * * * *
Manera primintí algún biaha pa siman nos lo bai bèk den Liga Streanan di Ayera ku ta den su 25 kampionato di Sòftbòl Fememino Veterano. Ata algún detaye di 2003 aki, kaminda e liga a start den mei den Frank Curiel Ballpark. Despues di un apertura impreshonante a sigi e wega entre Treasure i Warriors. Treasure dirigí pa Arthur Bonevacia ta gana e promé wega di kampionato. Tur kos tabata dirigí pa Marlene Obispo, trahadó ínkansabel i fundadó di Liga Streanan Di Ayera. Marlene mes ta presidente i Marlene ta den kushina ta prepará galiña pa esnan presente saboriá. Treasure a gana Warriors e dia ei ku ku skor grandi 13-4. Un wega ku manera nos a bisa kaba tabata empatá te den di 4 inning. Robert Ersilia tabata coach den Treasure. Bèk den tempu un ratu ku Liga Streanan di Ayera ku lo sigi djadumingu awor ku weganan na Muizenberg Ballpark.
