Informashon di Sòftbòl i Beisbòl di 5 di yanuari 2023
Fanátikonan di bondia , felis aña ainda. Tur kos bon pa tur nos lesadónan den 2023. Nos lo tei den gran forma den 2023 kargá ku informashon di Sòftbòl i Beisbòl manera tabata e kaso den añanan anterior. Nos ta pendiente di informashon i notisia di torneonan ku tradishonalmente ta start den komienso di aña, manera entre otro torneo Survivors, torneo FABB di Little League. Ta torneonan ku den pasado tabata tuma lugá na Van Engelen Ballpark. Organisadónan di Torneo Survivors/The Greatest a saka invitashon pa ekiponan.
* * * * *
Liganan ku normalmente sa tuma lugá na Van Engelen Ballpark ta pendiente pa terminá den 2023. Ta trata aki di Liga 40, Liga Amstel i Liga Van Engelen. No ta konosí ku ta terminá e liganan aki manera aña kuminsá òf den luna di mei despues di final di Torneo Hope 2023. No ta konosí ainda kua organisashon òf empresa lo organisá Torneo Hope den 2023. Liga 50 ku ta hala bon fanátiko for di 2020 na Van Engelen Ballpark ta kla pa 2023 i tin hopi reto e aña aki. Baranka tin dos aña sigí kampion i ta rumbo pa dinastia. Ban Serio un tempu super kampion i èks dinastia lo bini duru bèk pa rekobrá e título. Parse ku dr. Jerry Booi lo tei bèk komo general manager/manager di Ban Serio.
* * * * *
Ekipo Marlins di 50+ a sera aña djabièrnè 30 di novèmber den tremendo ambiente. Práktikamente tur hungadó di 2022 lo keda pa 2023 i e ekipo tin dos piska grandi ku lo djòin e ekipo. Dos batiadó di poder i bon fileadó, ánke tin grandinan di 50+ duru tras di e hungadónan aki. Vários konosí den Sòftbòl Slowpitch lo kumpli 49 i 50 aña i ta rumbo pa Liga 50. Esnan di 49+ lo por hunga den torneonan, entre otro Amstel Bright Cup i Kopa ABC 50+. E aña aki Kopa 50+ lo tuma lugá na Boneiru den luna di mei, e wikènt di Asunshon den luna di mei benidero. For di e luna aki nos lo tin e informashonnan. Naturalmente nos ta pendiente di informashon di Kopa ABC di hóbennan i di 60+ tambe. 60+ tin e tradishonal torneo di selebrashon Kopa Himno i Bandera na Aruba alrededor di mart i Dia di Himno i Bandera den luna di yüli.
* * * * *
Beisbòl Veterano Kòrsou probablemente lo tin un direktiva nobo. 50+ ta spera ku e direktiva nobo lo sigi ku organisashon di e kampionato, p’asina e 50+nan por sigi move trankil den nan liga manera tabata e kaso último 4 añanan. For di 2017 tin 50+ di Beisbòl Veterano i ta na aña 2018 no tabatin kampionato di Beisbòl Veterano 50+. Jandoret Raiders a gana tur e kampionatonan 50+ organisá pa BEVEKO i ekiponan ta loko pa traha un ‘Dream Team’ pa para e racha di Jandoret Raiders. Siman pasá nos a papia ku Sabalo Estanista, ku a bisa ku ta bai tin un tim duru pa para e racha di Jandoret Raiders den 2023. Ta Santa Maria Pirates ku entre otro Sabalo Estanista a para e racha di Jandoret Raiders 40+.
* * * * *
Vários hóbennan di 40+ kla pa subi Beisbòl Veterano. Tin rumor ku mayoría lo bai ekiponan Santa Maria, Quality Stars i Isla Crackers, ekiponan ku a terminá number 1, 2 i 3 di buelta regular di kampionato 2022. Hopi hungadó nasé 1982 i 1983 ku a militá den e selekshon ku na 1999 a hunga e kampionato Latino Americano di Senior League den Little League Ballpark. By the way, kiko ta pasando ku Little League Ballpark ku na 2015/2016 a keda di desmantelá pa traha un stadion nobo, super moderno. Esnan den e fundashon ta bisa ku ta riba Gobièrnu nan ta warda durante años pa e pèrmit bini kla pa start ku e parke nobo nobo i moderno.
* * * * *
Nos a sali duru awe kargá ku informashon i nos lo sigi ku informashon kayente den e dianan benidero. Nos lo tei 3 biaha pa siman i ora tin kosnan kayente nos lo tei mas biaha pa siman. Segun dianan ta bai nos tin artíkulo tambe huntu ku e kolumna aki. Fuentenan, kòrda nos tei pa e informashonnan eksklusivo i kayente manera ta e kaso último dékadanan ku nos ta kubri Beisbòl i Sòftbòl. Nos ta keda aki pa awe. Te mayan ku Poder di Dios.
Ultimo kampionnan di 2022 ku nos no a logra pone den nos resumen den wepsait Deporte Kòrsou
Resumen 60+
Jaws ta laga Nos tambe Por den tereno i bira kampion di Liga 60+
WILLEMSTAD- Jaws riba homerun di Raimy Pastor i bon bateo di Fransje Lambertina ta laga Nos Tambe Por den tereno den Tie Break pa bira kampion di Liga 60 di temporada 2022. Fransje Lambertina a konektá hit pa senter pa laga Nos Tambe Por den tereno, miéntras Raimy Pastor tabatin homerun di 3 kareda pa bòltu skor di 6-5 pa 8 pa 6. Den e último chèns di ekipo Nos Tambe Por, nan a empatá wega na 8 kareda, pero Jaws a bini bèk pa laga Nos Tambe Por den tereno. Despues di wega tabatin entrega di premio.
Kampion: Jaws;
Supkampion: Nos Tambe Por;
Di tres lugá: Pitufos;
Kampion bate: Fransje Lambertina (Jaws);
Kampion picher: Wim Felicia (Nos tambe Por);
Lider di homerun: Elston Constancia (Pitufos).
Baranka kampion ta swip Jaws i bira kampion Liga 50
WILLEMSTAD- Baranka ku dos viktoria sigí den final a gana Jaws pa bira kampion den Liga 50. Baranka a gana Jaws ku skor di 9 pa 6 djasabra 3 di desèmber i djadumingu 4 di desèmber Baranka a derotá Jaws 11-8. Kenny Hellement tabata e picher kabai di Baranka ku a tira den tur dos wega. Den e promé wega Kenny a tira 7 inning kompletu ku 6 ponche riba e ekipo di Jaws komo picher habridó. Den e di dos wega Kenny a relevá Gino Valeriaan ku a bira e picher ganadó. Emeric Agatha tabata kayente na bate pa ekipo Baranka i a bira MVP di e final. Ela dal homerun den tur dos wega pa manda Baranka dilanti.
Jandoret Raiders a gana Sigi Hunga i titulá kampion di Beisbòl Veterano Liga 50
WILLEMSTAD- Djadumingu 11 di desèmber 2022 tabatin e wega final di Beisbòl Veterano Liga 50 ku a tuma lugá na Vi Jansen Ballpark entre Jandoret Raiders i Sigi Hunga.
Jandoret Raiders ku picheo di Raylan Capella a derotá e ekipo Sigi Hunga ku skor di 13 pa 4 i asina ei a tituláִ kampion di Liga 50 pa di 5 bia konsekutivo. Mester menshoná ku Jandoret Raiders Liga 40 ya tin e rekòrt di 5 titulo kampion siguí. Nan a titulá kampion aña 2014, 2015, 2016, 2017 i 2018. Djadumingu e ekipo di Jandoret Raiders Liga 50 tambe ta pone un rekòrt titulando kampion aña 2017, 2019, 2020, 2021 i awor 2022. 2018 no tabatin kampionato di Beisbòl Veterano Liga 50+.
PREMIONAN:
Jandoret Raiders kampion.
Sigi Hunga supkampion.
Otrabanda di 3 lugá.
Raylan ‘Tutu’ Capella MVP di final 50+.
Kampion bate Sury Mathilda di Otrabanda.
Kampion picher Clifton Ijziek di Jandoret Raiders.
Lider di homerun di Beisbòl Cedrix Valies di Yesterday
