Jandoret Raiders a rekordá 27 aña di eksistensia djadumingu 15 di yanüari
WILLEMSTAD- Djadumingu dia 15 di yanüari 2023, Jandoret Raiders a rekordá e echo ku 27 aña pasá e ekipo a keda fundá. Den oranan di mainta hungadó- i fanátikonan a bai misa di Jandoret pa gradisí Dios pa tur e añanan di eksistensia aki. Durante di Sakrifisio di Misa, Pastor Pedro Manuel di Jandoret a dediká palabra na e ekipo Jandoret i a benshoná e hungadónan presente. Despues di misa hungadó i fanátikonan a move pa Holiday Bar Restorant na Jandoret pa sigi selebrá. Raiders a logra mas ku 20 título durante su eksistensia, esei debí na un tremendo union. Fanátikonan di Jandoret a gradisí Dios pa a kuida e ekipo tur e añanan i asina por a sera mas amistat, trese famianan huntu, trese e bario di Jandoret huntu i naturalmente tur e títulonan i momentunan bon. Jandoret Raiders tradishonalmente ta bai misa di Jandoret durante kampionato.
INFORMASHON DI SÒFTBÒL I BEISBÒL
Fanátikonan di Deporte Korsou, bondia i felis siman. Nos ta drenta e wikènt kaminda Sòftbòl Slowpitch lo kuminsá move ku weganan di Torneo The Greatest/Survivors. Ekiponan di Soshal Maskulino, Soshal Plus, Liga 50+, Liga 60+ i COED. E torneo ta start djasabra awor 21 di yanüari na Stadion Post 6 i Buena Vista Ballpark. Despues e torneo lo move pa Van Engelen Ballpark. Nos ta pendiente pa e skèdjel di e torneo. Remarkabel ta ku 3 ekipo di 50+ so a inskribí i ta pendiente di un ekipo mas pa forma 4 ekipo.
* * * * *
Selekshon òf ekipo di Kòrsou ta den full training pendiente pa partisipashon di Serie del Caribe ku lo tuma lugá di 2 pa 10 di febrüari den Stadion La Rinconada i Stadion La Guaira na Venezuela. Nos profeshonalnan ta duna un show kompletu na Tio Daou Ballpark. Wladimir ‘Coco’ Balentien ta demonstrando su poder deskomunal meskos ku Jonathan Schoop. Cedane Rafaela ta un kos serio tantu den shòrt komo den outfield. Varios otro Big Leaguer i profeshonal mustrando ku nos lo bai gana algun wega otro luna na Venezuela. Parse ku Cedanne Rafaela no a risibí pèrmit di Boston Red Sox pa hunga den Seri Del Caribe.
* * * * *
E aña aki tin varios torneo internashonal di Slowpitch pendiente, entre otro torneo di e hóbennan, torneo 50 i 60 ku ta bai tuma lugá na Punta Cana alrededor di 18 di mei. Ta e torneo grandi ku a start na Aruba aña 2022 i ku ta sigi na Punta Cana den 2023. Den mesun dianan tin Kopa ABC 50+ na Boneiru i ABC&S. Ta pendiente tambe pa Kopa ABC&S di hóbennan ku segun nos mester tuma lugá na Kòrsou. Kòrsou tabata na turno pa organisá e Kopa ABC na 2020 na Kòrsou, pero debí na Covid-19 e torneo a keda suspendé na 2020 i na 2021. E sekuensia di organisashon di Kopa ABC pa hóbennan ta Aruba, Kòrsou, Sint Maarten i Boneiru pa loke ta trata sede. Swift tin 4 aña sigí kampion despues ku Cicoza a gana e título na 2015 na Aruba. Promé ku esei tabata Calabas ku a gana na Aruba na 2011. Di 2011 pa 2019 Swift tin 7 título di Kopa ABC.
* * * * *
Den Beisbòl Veterano, ekipo Jandoret Raiders a kumpli 27 aña dia 15 di yanüari. Djadumingu último hungadó i fanátikonan a bini huntu na Misa Mama di Bon Konseho na Jandoret, pa despues sigi huntu na restorant na Jandoret. Ekipo fundá na 1996 pa despues bira kampion mesora den Liga Trai Seru mesun aña. A sigi títulonan na Boneiru, 3 título di Liga Un i Tur. 2 kampion di Torneo na Aruba. Kampion di Reino di Beisbòl Veterano na Kòrsou i 10 titulo, 5 di 40+ i 5 di 50+ di kual tur tabata sigi. Jandoret pronto lo kuminsá move pendiente kampionatonan di Beisbòl Veterano. Jandoret Raiders a move di Sòftbòl Slowpitch pa Beisbòl Veterano na aña 2012. Pabien na tur hungadó, dirigente i fanátiko di ekipo Jandoret Raiders.
* * * * *
Jamdrick Cornelia, yu di Edmar Cornelia i nietu di Boy Motor Tata Cornelia a firma djarason ku organisashon di New York Mets. Prome Minister Pik Pisas tabata eibanda i ela saka un portret ku Jamdrick Cornelia. Ultimo tempu hungadónan ku a firma komo picher ta profeshonal i ta moviendo bon, entre otro Jayden Estanista yu di Eldred Estanista ku tabatin un ERA di 2.01 den sukursal di Phillies di Philadelphia. Yzreel Burnet tambe a picha bon, pero no hopi inning. En todo kaso Jamdrick Cornelia ta un picher slengu ku tabatin bon aktuashon ku Wild Cats Dòbel A kontra ekiponan grandi den 2022 i a hunga den kasi tur selekshon di su edat den Little League komo picher i outfielder. Na Aruba den luna di òktober Jamdrick a picha tremendo i einan skoutnan di New York Mets a sera man riba Jamdrick.
* * * * *
Eddy Isabella infielder subrino di Vernon Isabella tambe a firma. Eddy Isabella ku tambe a hunga kasi tur selekshon di Liga Pabou lo firma ku organisashon di San Francisco Giants. Jayden Felicia ku na mart awor lo kumpli 17 aña tambe ta pendiente pa firma profeshonal. Jaden Felicia ta yu di e gran picher di Sòftbòl Slowpitch Willem ‘Wim’ Felicia. Djaluna 16 di yanüari hiba Eusebio ‘Chebu’ Juliana gran eks coa ch di Little League na su ultimo luga di sosiegu. Hopi hende na entiero pa hiba Chebu na su último lugá di sosiegu. Nos ta keda te aki pa awe.
