Jaws ta gana den Liga 50 i 60 den Torneo Survivors
WILLEMSTAD – Jaws tabata tremendo djasabra den kontinuashon di Torneo Survivors na Van Engelen Ballpark. Den Liga 50, Jaws ku tremendo picheo di Fernando ‘Paiza’ Rosario i homerun di Jair Josepha, a gana Baranka ku skor di 9 pa 1. Den Liga 60+ Jaws a gana Nos Tambe Por 3-1 i asina klasifiká pa e final di 60+. Nos Tambe Por lo mester topa Los Amigos, i e ganadó lo topa ku Jaws den final ku lo tuma lugá djadumingu 26 di febrüari na Buena Vista Ballpark. Kuart i semi-finalnan den e diferente kategorianan di e torneo lo tuma lugá djasabra 25 di febrüari na Buena Vista Ballpark. Wikènt pasá tabatin weganan den e kategorianan Soshal di Torneo Survivors na Van Engelen Ballpark i nos tin e resultadonan.
Resultadonan
Jaws 3, Nos Tambe Por 1
Jaws a dal 8 hit i hasi 1 eror. Riley Toppenberg a gana i Rudsel Poulina a bati di 2-2. Nos Tambe Por a konektá 4 hit i hunga sin eror. Richenel Rafaela tabata e picher pèrdèdó i e mes a bati di 1-1.
Jaws 9, Baranka 1
Jaws a bati 9 hit i hunga sin eror. Fernando Rosario tabata e picher ganadó. Sigbert Juliana i Cedrix Valies a bati di 2-2. Jair Josepha di 1-1 ku un homerun. Baranka a konektá 6 hit i hasi 2 eror. Kenny Hellement tabata e picher pèrdèdó. Wendell Anthony a bati di 1-1.
Chonchi’s 6, Among Us 3
Chonchi’s a konektá 13 hit i kometé 2 eror. Jeremiah Wansing tabata e picher ganadó i Jeandino Kleinmoedig a bati di 3-3.Verviori Emerenciana a bati un homerun. Among Us a dal 8 hit i hasi 2 eror.
Jean Pierre Rosalina tabata e picher pèrdèdó Jonathan Walle a bati di 3-2.
The New Radiator 5, Keyfin 4
The New Radiator a dal 12 hit i hasi 1 eror. Robert Wanga a gana i Jermian Jansen a bati di 3-3. Rhendeson Tomasa a dal un homerun. Keyfin a konektá 8 hit i hasi 3 eror. Luigien Fluonia tabata e picher pèrdèdó i Jonaikel Castro Arias a bati di 2-2. Demley Martes tambe a bati di 2-2.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon tardi. Nos a drenta siman kaminda tin e marchanan di Karnaval unu tras di otro. Djabièrnè Marcha di Tiner, sigí pa Marcha di Banda Bou djasabra, Gran Marcha djadumingu, Marcha di Despedida Hubenil djaluna i djamars Marcha di Despedida Grandi. Mi lesadónan, amigunan, kòrda bai poko poko, Karnaval ta pasa un bes i bida tin ku sigi normal. Ban pa deporte mesora. Hopi komentario riba e tim di Kòrsou ku a representá nos na Venezuela. Pa nos un bon aktuashon, poko malasuerte i e bateo no tabata oportuno. Den komienso dado momentu, despues di 3 wega hungá, no tabata number 1 den picheo. Nos por tabata number 1 despues di 3 wega ku rekòrt di 2-1. Dado momentu nos mester tabata 4-0, na lugá di esei nos tabata 2-2 ku weganan pèrdí kontra Cuba i Colombia, weganan ku nos tabatin ganá. Nos Sharlon Schoop a sali lider den bateo di tur ekipo pa loke ta trata e buelta regular naturalmente segun un wepsait. Riba otro wepsait tabatin un Colombiano komo lider.
* * * * *
Sharlon ‘Wecho’ Schoop di nos a sali lider den bateo segun nos ku un average di .417. Niun batiadó di e otro 7 ekiponan no tabatin un average mas haltu ku Sharlon Schoop. Na e momentuan aki Sharlon Schoop tin 35 aña i tin hopi adén ainda. Un tremendo infielder ku ta hunga den outfield ku fasilidat. Ku 17 aña Sharlon Schoop a firma ku organisashon di San Fransisco Giants pa despues bai den organisashon di Kansas City Royals. Na 2016 hungando den Tripel A ku Orioles, Sharlon Schoop a hera di subi ku Baltimore Orioles den Big League pa hunga huntu ku su ruman Jonathan. Sharlon a keda den organisashon di Baltimore te ku 2018 pa despues bai hunga na 2019 ku Hulanda. Wecho a bira kampion ku L&D Amsterdam na 2019.
* * * * *
Wecho Schoop tabata den e ekipo di Hulanda na 2011 ku a bira kampion di Mundu na Panama. Schoop a hunga den e ekipo Hulandes den World Baseball Classic na 2017. Un tremendo infielder/outfielder ku bon brasa. Sharlon ta den selekshon di Hulanda pa hopi aña i ta riba roster di World Baseball Classic 2023 pa e ekipo Hulandes. Ta Sharlon so a bati pa average haltu den e ekipo di Kòrsou na Venezuela, leu riba .300. ku un average di .417. Andrelton Simmons a bati .280, Roger Bernadina .278 i Sicnarf Loopstok .235. Ray Patrick Didder .214, Juremi Profar .200 i Wladimir Balentien .200.
* * * * *
Ban pa Slowpitch. Nos tabata presente djasabra na Van Engelen Ballpark pa mira algun wega. Tabatin un wega ku hopi hugada sensashonal entre ekipo Among Us i Chonchi’s. Ekipo Chonchi’s a logra gana ku skor di 6 pa 3 despues di tabata atras kasi durante hinter e wega ku skor di 1-0. E tersera base di Chonchi’s Derviori Emerenciana a dal un homerun di 3 kareda pa bòltu skor i despues Chonchi’s a amplia pa finalmente gana 6-3. Den otro weganan di Soshal Maskulino Speshal ekipo The New Radiator a dal Keyfin 5-4. Among Us ku tabatin Double Header a gana di Dominicanos Act 12-2 i APC/IT.comxpress a dal Wenman 15-0, ke mèn defolt e wega ei parse, no tin sifras di e wega ei.
* * * * *
Den un tremendo partido Jaws a gana Nos Tambe Por ku skor di 3-1. Jaws ta pasa direkt pa final i Nos Tambe Por lo bai topa ku Los Amigos den e wega number 2 kontra number 3. Ekipo Jaws a gana den Liga 50 tambe i nan a sorprendé e ekipo Baranka ganando ku skor di 9 -1. Fernando Rosario a tira e wega kompletu pa Jaws gana. Jair Josepha i Cedrix Valies a dal homerun. E homerun di Cedrix Valies tabata unu den tereno. Djadumingu último no tabatin wega debí na Marcha Hubenil. Wikènt benidero no tin wega debí na wikènt kulminante di Karnaval.
* * * * *
Amstel Bright Premier Cup ta na kaminda i lo start dia 25 di mart. Parse ku ekipo Ban Serio a traha un Dream Team pa partisipá den kategoria Liga 50 di e torneo. Nan lo tin den nan filanan Jair Josepha, Eldred Estanista i Kelvin Winklaar pa bai mustra un show case di poder den e torneo. Tin indikashon ku Ban Serio a mara e 3 hungadónan menshoná kaba. Jair Josepha a konfirmá pa nos ku no tin nada konkreto ainda. Nos ta keda te aki pa awe.
