Jaws ta pika dilanti den play-off final di Liga 60+ i klasifiká pa final di Liga 50
WILLEMSTAD- Jaws, ku picheo di e veteranísimo Higor Kirchner, a gana ekipo Nos Tambe Por ku skor di 7-1 i pika dilanti di e play-off final Liga 60+. E wega a tuma lugá djadumingu 20 di novèmber dilanti un públiko grandísimo den Frank Curiel Ballpark. Higo Kirchner 74+ a picha fásil i dominá e ekipo Nos Tambe Por durante 7 inning largu. Jaws a nota 7 kareda di kual 2 tabata limpi riba homerun di Fransje Lambertina. Wega number 2 di e seri ta sigi djadumingu 27 di novèmber na Frank Curiel Ballpark. Si tin empate den e seri, e wega lo sigi djadumingu 4 di desèmber.
NUMERITONAN
Jaws 7, Nos Tambe Por 1
Jaws a dal 6 hit i hunga sin eror. Sandy Reina ku Andrewi Does, ámbos a bai di 1-1. Hubert Perozo, Fransje Lambertina ku Elvin Regina, tur a bai di 2-1. Fransje Lambertina a konektá 1 homerun. Nos Tambe Por tabatin 5 hit ku 2 eror. Siegfried Lopez a bai di 1-1. Marvin Wijman, Javier Muñoz i Jeromin Williams, tur a bai di 2-1.
Jaws rumbo pa final kontra Baranka
WIILEMSTAD – Ekipo Jaws ku bon picheo di Paiza Rosario a klasifiká pa final di Liga 50 ganando de ekipo Flamboyan ku skor di 8 pa 3. Jaws lo topa ku Baranka djasabra awor 2’or. Skèdjel ta kla i weganan ta djasabra na Van Engelen Ballpark 2'or i djadumingu 11'or na Sam Bunting Ballpark.
INFORMASHON DI SÒFTBÒL I BEISBÒL
Fanátikonan di Deporte Kòrsou, bontardi i felis siman. Mundial di Futbòl a start ayera na Qatar ku partisipashon di 32 ekipo. Apesar ku ta Beisbòl i Sòftbòl nos ta skibi, nos lo dal ratu ratu riba loke ta pasa na Qatar. Ekipo di Hulanda ku masha hopi fanátiko aki na Kòrsou a sali gana di Senegal ku skor di 2-0 den Grupo A . E wega tabata 12’or ku ta nèt den break i ta spera ku masha hopi lo yega trabou lat despues di break. Hulanda a kai den Pul A huntu ku Ecuador, Qatar i Senegal. Brasil ta den Pul G huntu ku Serbia, Kamerun i Swisa. Nos tei huntu ku boso den e Mundial aki. Dos sorpresa grandi a kai. Djamars Saudi Arabia a sorprendé Argentina 2-1 i djarason Hapon a dal Alemnia 2-1. Den tur e dos weganan aki e ekipo ku a pèrdè a sali i haña un pinalti.
* * * * *
Nos ta bai mesora pa Sòftbòl. Ekipo Jaws dilanti un bon públiko aya na Van Engelen Ballpark a gana di Flamboyan relatívamente fásil ku skor di 8 pa 3. Ku e viktoria aki ekipo Jaws a pasa pa final di Liga 50 despues di basta aña. Un tempu Jaws tabata manda den Liga 50 birando kampion masha hopi aña sigí. Despues a bini manera un medio kiebro, kaminda Kid Boca Chica i algun hungadó a bai lanta Sharks i despues algun hungadó a bolbe bai pa lanta Ban Serio i laga Kid Boca Chica ku Sharks. E hungadٕónan di Jaws ku a bira 60+ a kousa estrago den nan promé añanan den 60+ birando kampion na sigur 5 okashon sigí.
* * * * *
Jaws ku bon picheo di Fernando ‘Paiza’ Rosario a dal Flamboyan/Tigers ku a presentá mas o ménos kibrá. E tim tabata falta algun hungadó i dirigente. Jaws mester bai hunga kontra Baranka den final di Liga 50 djasabra i djadumingu awor. Djasabra lo hunga na Van Engelen Ballpark i djadumingu lo hunga 11’or na Sam Bunting Ballpark. Ekipo Jaws a protestá fuertemente djasabra despues di wega i a bisa ku nan tin wega den kategoría 60+ na mesun momentu. Ekipo Jaws 60+ a enfrentá Nos Tambe Por djadumingu den e promé wega di e gran final i otro siman lo tin wega number 2 entre Jaws i Nos Tambe Por. Diskushonnan tabata kayente i Jaws a para ariba ku nan lo no hunga. By the way, Souax a pèrdè pa defolt den final di Sòftbòl Femenino Dòbel A i Pichingolo a bira kampion pa di 40 biaha tirando un bala (un lansamentu pa defolt).
* * * * *
Den pasado nos a papia ku Taffy de Jongh, un dje grandinan di Pichingolo, ku a splika nos kon kosnan a bai durante añanan. Ela menshoná si ku e éksitonan aki no por logra nan su so, e tim ku ta konsistí di Chape Bernardus i Cecil Garcia, semper tei ora bo mester di algu. Reynold Bloem ku no ta aktivo pero si bo mester di un fabor, un hòmber di kontakto, tal i tal kos ku mester bai hasi, den tim di mucha muhé no ta tur kos ta kos di papia. Último añanan Ralph Pereira, un persona ínkansabel. E tin masha energía mes, Ralph ta inkansabel mes. Despues a bini Pin Wijman, Nònò Noor, Nathaly Lourens i otronan. Bo ta konfrontá ku basta pida pida kos durante e añanan. E tempu nan aya tabata buska mucha te na Fuik pa bin trein i hiba bèk ora di wega tambe. Sin e gainan ei i sin e kontribushon di e hungadónan, Pichingolo lo no a logra e kampionatonan impreshonante. Xaverianen i Sithoc tambe tabatin algun rekòrt, pero esaki ta leu i ta impreshonante. Taffy a bira manager di Pichingolo na 1974. Promé ku esei Taffy tabata coach i Regulo Montero (QEPD) tabata manager. Na 74/75 a pone Taffy de Jongh na lugá di Regulo Montero. Angel Keep a apuntá Taffy de Jongh komo manager.
* * * * *
En todo kaso biniendo bèk riba Jaws vs Baranka den final, ta sali riba un batata kayente ei sin e final kuminsá. Pa loke ta trata Beisbòl 50+, lo tin play-off final pareu ku Sòftbòl 50+. Weganan di Beisbòl Veterano 50+ lo ta semi-final djasabra i final djadumingu. Play-off di Liga Amstel tambe a start djasabra na Van Engelen Ballpark. E seri entre e grandinan, esta Cicoza i Thrillers di spònser pa Kòki riba Blòki, a empatá. Santa Maria Pirates di Beisbòl Dòbel A ta den un torneo aya na Sint Maarten. Santa Maria mester a hunga semi-final kontra di Aruba i den e otro wega di semi-final tabata selekshon di Sint Maarten kontra un otro ekipo di Sint Maarten.
