Kampionato Beisbòl Veterano 2023 a start djasabra i final di The Diamond Stars League ta start djabèrnè 2 di yüni
WILLEMSTAD- Djasabra 27 di mei 2023, temporada di Beisbòl Veterano a start na Vi Jansen Ballpark. E kampionato a start den oranan di mainta i den oranan di atardi tabatin e apertura ofishal. E apertura tabata promé ku wega entre Jandoret Raiders i Isla Crackers.
MC a yama e dos ekiponan i representante di e otro ekiponan di Beisbòl Veterano. Minister di Enseñansa, Siensia, Kultura i Deporte sr. Sythree van Heydoorn a subi tereno huntu ku e direktiva nobo di Beisbòl Veterano enkabesá pa Gilbert Denisia. Despues di a skucha himno, tabatin palabra di e veteranisimo Reggie Taylor ku a bai den historia kon Beisbòl Veterano a start.
Presidente di Beisbòl Veterano sr. Gilbert Denisia a hiba palabra pa despues entregá un plakat na Reggie Taylor. Despues a sigi palabra di Minister van Heydoorn ku lo hasi su esfuerso pa yuda Beisbòl Veterano. Minister Van Heydoorn a tira promé bala ku Reggie Taylor komo batiadó i Jeffrey Martina komo kècher di e ekipo di kas Jandoret Raiders i alabes MC di e apertura. Despues di e apertura Jandoret Raiders a gana di Isla Crackers ku skor di 9 pa 6.
Rising Phoenix ta swip The Fighters i pasa pa final di The Diamond Stars League
WILLEMSTAD- Rising Phoenix ta swip The Fighters i klasifiká pa final di The Diamond Stars League. Rising Phoenix a gana The Fighters ku skor di 10 pa 4 djabièrnè i 11 pa 1 djasabra na Sam Bunting Ballpark. Rising Phoenix lo topa ku Nos Goso den final ku ta start djabièrnè awor pa 8’or pm den Sam Bunting Ballpark. Djasabra lo tin wega number 2. Den kaso di empate lo hunga e wega finalísimo djabièrnè 9 di yüni.
MAS INFORMASHON DI BEISBÒL I SÒFTBÒL
Fanátikonan di Deporte Kòrsou, bon dia i felis wikènt. Pa loke ta trata The Diamond Stars League ekipo Rising Phoenix a swip the Fighters i pasa pa final di e liga. Djabièrnè Rising Phoenix a gana ku skor di 10 pa 4 i djasabra 11-0 pa eliminá The Fighters. E seri aki a bai relatívamente fásil i awor ta bai pa e gran final djabièrnè awor (awe, 2 di yüni) na Sam Bunting Ballpark. Rising Phoenix lo topa ku Nos Goso den e gran final. Den e promé seri ekipo Nos Goso a gana Rising Phoenix 2-1 pa pasa pa final dirèkt a base di e sistema page. Rising Phoenix a gana Nos Goso na dos okashon durante e temporada regular.
* * * * *
Baranka a gana Marlins ku skor di 9 pa 6 i keda invikto den Liga 50. Baranka su rekòrt a bira 6-0 i Marlins a kai na 3-2. Den otro wega ekipo Ban Serio a dal Pitufos 17-9. Dado momentu Pitufos tabata ganá 8-5, pero Ban Serio ku un bateo resio di 17 hit ku 2 homerun a bòltu e skor. Jair Josepha a debutá komo shortstop i terser bate di ekipo Ban Serio i a bati di 3-2 i filea bon. E asuntu ku Jaws a subi Jair Josepha debí ku ela duna palabra no a resultá. Jair a manda un karta ku ela firma ku elo hunga pa Ban Serio. Manera nos a skibi djabièrnè, masha tempu un hungadó ku ta riba dos lista ta wòrdu yamá pa direktiva i e hungadó ta disidí ku kua tim e ta bai hunga.
* * * * *
Den e otro weganan di Liga 50 , ekipo Flamboyan a nòkout Artemisia ganando 15-5 i Sluggers a dal Catpower 22-13. Sluggers ku ta bou di maneho Glenn Pieternella i Rensley Martis ta moviendo den gran forma den 2023. Sluggers tin rekòrt di 4-1 i ta na di dos lugá empatá ku Ban Serio. Standing kompletu ta Baranka 6-0, Ban Serio 4-1, Sluggers 4-1, Jaws 3-2, Marlins 3-2, Pitufos 3-3, Flamboyan 2-3, Lions 2-3, Artemisia 0-6 i Catpower 0-6. Fransje Lambertina di Jaws ta lider den bateo ku .846 sigí pa Kelvin Winklaar di Ban Serio ku tin .800. Gerald Zimmerman di Sluggers a pasa Rombley pa liderato den RBI den Liga 50. Gerald Zimmerman a bati di 4-4 ku 5 RBI den e wega di djasabra último. Sherdon Rombley (Ban Serio) i Myron Wijman (Baranka) tin 11 RBI.
* * * * *
Eithel Brunken di Flamboyan tin un ERA di 2.80 sigí pa Edison Sambo di Jaws ku tin 4.0. Kenny Hellement ta keda lider den ponche tirá ku 13. Kenny Hellement a start 5 di e 6 weganan di Baranka i Gino Valeriaan a start e otro wega. Baranka ta sólido den 2023 atrobe i ta rumbo pa nan di 3 título. Nan lo haña resistensia pisá di entre otro Ban Serio, Jaws, Marlins, Pitufos i Flamboyan. Tene kuenta ku Sluggers e tamporada aki. Weganan pa djasabra awor ta 10.00 Marlins – Tigers, 12.00 Ban Serio – Sluggers, 14.00 Catpower – Baranka i 16.00 Jaws – Lions. Barwacht lo ta den man di Pitufos i Artemisia ta liber.
* * * * *
Kampionato di Beisbòl Veterano a start djasabra último na Vi Jansen Ballpark. For di den oranan di mainta tabatin weganan i pa 3’or promé ku e wega entre Jandoret Raiders i Isla tabatin e apertura ofishal den presensia di Minister di Enseñansa, Siensa, Kultura i Deporte, sr. Sithree van Heydoorn. Reggie Taylor a hiba palabra i a pasa den historia di Beisbòl Veterano. Tambe a para ketu na tur esnan ku a bai nos dilanti ku tabatin hopi di haber ku Beisbòl Veterano, entre otro rumannan Piña, Modesto Zinhagel i Eligio Acosta. Tabatin spich di presidente nobo di Beisbòl Veterano ku ta Gilbert Denisia i naturalmente di Minister di Enseñansa.
* * * * *
Despues di e apertura Jandoret Raiders a gana Isla Crackers ku skor di 9-6, Santa Rosa Memories a dal Marlins 9 pa 2. Azucar a nòkout Marchena Stars 11-1. Djadumingu Vosama a gana Veteranos Otrabanda 9 pa 5, Santa Maria Pirates a dal Yesterday 16 pa 5. Quality Stars a gana The Brothers 4-0. Liga 50 di Beisbòl Veterano lo start den di dos buelta.
