Kopa ABC&S organisá pa Terremoto i Swift
WILLEMSTAD -Djarason 17 di Mei e di 37 Kopa ABC&S ta start na Van Engelen Ballpark. E torneo di Sòftbòl aki a kuminsá nan aña 1984 i tur aña ela keda organisá na un di e islanan ku ta partisipá ku un interupshon kousá dor di COVID na aña nan 2020, 2021 & 2022.
Despues di 7 aña atrobe ta toka turno na Kòrsou pa organisá e magno evento aki ku ta konta ku partisipashon di: 3 tim di Aruba; Happy Brothers, Crush Power & Redskins, 3 tim di Boneiru:La Sonrisa, Energizer & The Crushers, 4 tim di Kòrsou: Terremoto, Cicoza, Dream Thrillers & Swift. 2 tim di St. Maarten: Controllers & Superstars. E torneo aki ta ser konsiderá komo e World Series di Sòftbòl Slowpitch entre e mihó ekiponan di e islanan ya menshoná.
Manera kustumber Van Engelen Ballpark ta garantisá pa un bon ambiente.Ta spera tur fanátiko di Sòftbòl Slowpitch bin animá nan ekipo faborito i pasa un ratu agradabel mirando weganan di bon nivel. Ekiponan Terremoto i Swift ta apresiá boso aporte pa Softball Slowpitch.
Kopa ABC&S 50+ di 17 pa 20 di mei na Boneiru
WILLEMSTAD – Kopa ABC&S 50+ di 2023 lo tuma lugá na Boneiru di 17 pa 20 di mei. Dos ekipo di Kòrsou, 2 di Boneiru, unu di Aruba i otro di Sint Maarten lo partisipá. Di Aruba lo partisipá ekipo Astros, di Kòrsou, Ban Serio i Marlins. Di Boneiru ekiponan The Brothers i Dragons i di Sint Maarten ekipo Tigers. Lo tin sekshon 60+ i sekshon femenino durante di e torneo. Baranka tabata kampion di e torneo na 2022, pero Baranka lo ta na Punta Cana huntu ku organisashonnan manera Pitufos i Jaws. Pitufos lo bai ku tim di 50+ i 60+ na Punta Cana. Hopi ekipo di Aruba lo ta na Punta Cana tantu den 50+ komo 60+.
The Fighters i Rising Phoenix ta gana den The Diamond Stars League
WILLEMSTAD- The Fighters a gana Treasure 4 pa 3 i despues Rising Phoenix a gana Nos Goso 5 pa 4 djabièrnè 12 di mei den oranan di anochi den Sam Bunting Balpark. The Fighters a terminá number 4 di e buelta regular i a sorpendé Treasure. Rising Phoenix ku a terminá number 1 a derotá Nos Goso pèrtá 5-4. Djasabra 13 di mei ta Rising Phoenix vs Nos Goso pa 8’or i despues pa 10’or ta Treasure New Era vs The Fighters. Tur wega ta tuma lugá den Sam Bunting Ballpark.
Fanátikonan di Deporte Kòrsou bon dia i felis wikènt. Fin di siman ku hopi aktividat riba djasabra i riba djadumingu no tin masha aktividat debí ku ta Dia di Mama. Ekipo Lions di 60+ tabatin final di nan torneo 60+ i a manda e torneo aki djaweps 18 di mei ku ta Dia di Ascencion. Parse ku e final a bira 3 di yüni. Awe nos lo chèk mas detaye. Pa loke ta trata Dia di Ascencion na Kòrsou lo tin Kopa ABC&S di e hóbennan, miéntras ku na Boneiru tin Kopa ABC&S di 50+. Resientemente den e wikènt di Dia di Rei tabatin ABC 40+ ku e ekipo Survival a bira kampion. En todo kaso e wikènt aki tin The Diamond Stars League na Sam Bunting Ballpark. Liga Streanan di Ayera djadumingu na Sam Bunting Ballpark.
* * * * *
Djasabra ta kandela tin den Stadion Post 6, na momentu ku ekipo Ban Serio invikto (4-0) topa ku Baranka (3-0) pa 4’or pm. Nos tin e standing: Baranka 4-0, Ban Serio 3-0, Marlins 3-1, Sluggers 2-1, Jaws 2-2, Pitufos 2-2, Lions 2-3, Flamboyan 1-2, Artemisia 0-4 i Catpower 0-4. Weganan di djasabra awor ta 10.00 Sluggers – Tigers, 12.00 Catpower – Pitufos, 14.00 Jaws vs Artemisia i 16.00 Ban Serio – Baranka. Marlins tin barwacht i ekipo Lions ta liber. Despues di e wikènt aki ekiponan lo tin djasabra 20 di mei liber en konekshon ku ABC&S na Kòrsou i Boneiru. Pa loke ta trata ABC&S na Boneiru e ekipo di Sint Maarten tin problema pa yega, debí na problema ku konekshon.
* * * * *
Torneo Lions ta sigi djasabra awor na Frank Curiel Ballpark ku 4 wega. Nos no a risibí e resultadonan di wikènt pasá. Final di e torneo ta Dia di Ascencion. Kampionato Liga 60 ta pendiente pa start ku partisipashon e aña aki di 8 ekipo. Te ku 2018 tabatin 6 ekipo. Na 2018 a bini Nos Tambe Por aserka i a bira 7 ekipo. Tabata tim di Chan Schoop i Frank Curiel ku a djòin kargá ku hungadónan di ántes Bou di Palu (Wochi Balentina) i Curioso (Chan Schoop). E tempunan ei tabata ekipo Amigos ku tabata kampion dos aña sigí (2016/2017), despues ku nan a basha e super kampion Jaws abou pa dos aña sigí. Jaws tabata kampion 4 aña stret promé ku Boy Evertsz i su amigunan di Amigos pone rèspèt den e liga. Na 2018 Jaws a bira kampion, na 2019, 2020 i 2021 ekipo Nos Tambe Por i na 2022 tabata Jaws atrobe.
* * * * *
Swift ta bai pa nan di 5 título sigí den Kopa ABC&S. Nan a bira kampion na 2016, 2017, 2018 i 2019. Na 2015 ekipo Cicoza a bira kampion na Aruba i nan lo ta fuertísimo atrobe pa logra nan título bèk. Swift a gana na 2008 pa 2010, 2011 Calabas a bira kampion i na 2015 tabata Cicoza. Ke mèn Swift ta super kampion e último añanan. Un tempu ekipo Astros tabata komandá i a bira kampion di 1989 te ku 1994, ke mèn 6 aña sigí. Despues tabata Swift ku a gana nan promé título di ABC na 1995. By the way, Terremoto di Chai Curie ta e promé kampion di Kopa ABC na 1984. Bou di Palu di Wochi Balentina tambe a bira kampion na un okashon di Kopa ABC, esei ta na aña 1988. Hopi espektativa pa e kopanan ABC&S tantu na Korsou komo na Boneiru.
* * * * *
Kenley Jansen di Boston a yega wega salbá number 400 i ta na di 7 lugá di tur tempu tras di Mariano River (652), Trevor Hoffman (601), Lee Smith ((478), Francisco Rodriguez (437), John Franco (424), Billy Wagner (422). Chèns ta grandi ku Kenley lo bai na di 5 lugá e temporada aki mes. Ta su ekipo Boston mester wanta e weganan i keda dilanti den e weganan pa Kenley por haña un chèns di drenta den di 9 inning i salba mas wega. Mester bisa ku Craig Kimbrel ku ainda ta aktivo ta pegá ku Kenley ei ku 397 wega salbá. 17 di novèmber 2004 Kenley a firma ku Dodgers komo kècher i na 2009 Kenley a kambia di kècher pa picher. 23 di yüli 2010 Kenley a subi MLB komo picher di relevo i sobrá ta historia. Na 2022 Kenley a firma pa un aña ku Atlanta Braves i sali liber den wega salbá ku 41 i un ERA di 3.52. E aña aki ku Boston, Kenley tin 9 wega salbá i un ERA di 0.77. Rekta a subi di 93 mia pa 97/99 mia. Cutter a bira 94/95. Kenley a nase 30 di sèptèmber 1987, ke mèn e tin 35 aña. Master Kenley!!
