Sòftbòl i Beisbòl - Lions na Sint Maarten Otrabanda na Medellin i Jaws 50+ ta pasa pa final

Lions 60+ supkampion di Torneo na Sint Maarten

WILLEMSTAD- Ekipo Lions di 60+ a sali pa Sint Maarten dia 9 di novèmber pa partisipá na un torneo organisá pa Cay Hill Tigers. Lions a pèrdè den final ku skor di 4 -2 kontra Cay Hill Tigers i a logra e título supkampion. E ekipo a keiru tambe i dia 10 nan a bai un tour rònt e isla Sint Maarten. Dia 15 di novèmber Lions a sera nan estadia ku un ambiente riba yate pasando na diferente playa i bahia. Riba pòtrètnan por mira grandinan di Lions i nan lema ta: “Ta nos so por”.

Na aeropuerto di Kòrsou saliendo pa Sint Maarten.

‍
Lions supkampion Torneo Cay Hill Tigers.

Trep riba yate pa sera konosí ku playa i bahianan di Sint Maarten.

Jaws ta klasifiká pa final di Liga 50

WILLEMSTAD- Ekipo Jaws ku bon picheo di Paiza Rosario a klasifiká pa final di Liga 50 ganando di ekipo Flamboyan ku skor di 8-3. Jaws lo topa ku Baranka djasabra awor 2’or. Direktiva ta deliberando ku lo hunga djadumingu awor tambe. Ekipo Jaws no ke hunga debí ku nan ekipo di 60+ lo hunga final na mesun ora mientras Baranka no tin problema pa hunga djadumingu awor. Den dianan benidero tin numeritonan i detaye.

Jaws despues di wega. Nan ta den final despues di hopi aña. Nan a gana di Flamboyan 8-3.

Tyron De Palm, Paiza Rosario, Fransje Lambertina i otronan selebrando despues ku último out a kai.

Ekipo Otrabanda di Beisbòl Veterano na Medellin

MEDELLIN- Djabièrnè, 11 di novèmber ekipo di Otrabanda Veterano 40/50 a sali pa Medellin (Colombia). E delegashon ta konsistí di 40 persona ku ta inkluí hungadó i fanátiko biahando den 3 grupo. E ekipo a hunga 2 wega, un wega di Beisbòl i un di Sòftbòl. Tur aña e ekipo Otrabanda ta hasi un biahe pa eksterior. Eksito na ekipo Otrabanda.

Santa Maria Pirates dos ganá 1 pèrdí na Sint Maarten

PHILIPSBURG - Santa Maria te ku djasabra anochi tabatin 2 wega ganá i 1 pèrdí den e kompetensia na Sint Maarten entre Aruba, Kòrsou i dos ekipo Sint Maarten. Djadumingu tin e semi final entre ekiponan ku mihó rèkòrt. Pa 5'or pm Kòrsou lo hunga kontra Aruba.