Marlins ku dos viktoria den wikènt i SBAB impreshonante den Torneo Amstel Bright
WILLEMSTAD- Ekipo Marlins a gana di Ban Serio i di Sluggers den wikènt i terminá e promé buelta ku rekòrt di 2-1. Marlins a sorprendé e ekipo Ban Serio ganando ku skor di 7 pa 4 djasabra i a gana di Sluggers djadumingu. Den e parti di COED, ekiponan di SBAB ta bayendo den gran forma. SBAB tin dos ekipo di COED den e Amstel Bright Premier Cup.
SBAB COED 1 tin rèkòrt di 2-0 i SBAB COED 2 tin rèkòrt di 1-0. Den e kategoria Modified ekipo Swift ta komandá relativamente fásil ku rèkòrt di 3 ganá i 0 pèrdí. Djasabra Swift a gana di Cicoza ku skor di 5 pa 3 den un tremendo partido. Swift a dal 4 homerun den e wega menshoná. Homerunnan di Jersely Cicilia, Julio de Rosario, Julio Cesar i Richene Martina.
Reunion general Beisbòl Veterano tabata djarason 8 di mart
WILLEMSTAD- Djarason 8 di mart tabatin e promé reunion di Beisbòl Veterano di 2023. Presidente di Beisbòl Veterano (BEVEKO) Shendy Cras a manda e konvokashon for di djamars siman pasá ku puntonan di agenda, p’asina ekiponan por prepará nan mes pa e reunion. Manera ta konosí, direktiva aktual ku a hasi un tremendo trabou durante dos aña, lo baha pa laga trabou pa otronan.
Puntonan di agenda ta: Establesé korum, konfirmashon notulonan di reunion general di 23 di mart 2022, presentashon i aprobashon relato finansiero di 2022, desishon pendiente relashoná kampionato Liga 40 2022, retiro di miembronan di direktiva aktual, presentashon kandidatonan pa elekshon di direktiva nobo BEVEKO. Elekshon/votashon direktiva nobo i turno liber.
Fanátikonan di Deporte Kòrsou, bon dia i felis wikent. Nos a sera un fin di siman (wikènt pasá) den gran forma ku moveshon sin fin riba Van Engelen Ballpark pa loke ta trata Amstel Bright Premier Cup. Evento bon organisá pa ekipo Cicoza ku sostén di Pim Fangman ku ta un dje grandinan di Slowpitch ya pa basta aña kaba. Ta for di komienso di añanan 2000 Pim Fangman a kuminsá move duru den Slowpitch pa loke ta trata e parti organisatorio. Tempu ku Liga 50 a start na Cirilo Chirino Ballpark, Pim Fangman a move un pa dos aña den e ekipo Catpower. Un tempu Pim Fangman a organisá Super Cup i tabata fundadó di Liga Amstel huntu ku entre otro Rudsel Martina.
* * * * *
Un tempu kampion de Los Kampiones organisá pa Johnny Isabella tabata bastante popular. Torneo Amstel Bright, despues a bira Amstel Bright Premier Cup e promé añanan tabata Torneo Polar. Na 2017 e torneo a kambia di spònser i bira Torneo Amstel Bright. E torneo mas popular despues di Torneo Hope pa loke ta trata Sòftbòl Komersial. Pa otro siman tin reunión di Torneo Hope ku tur ekipo ku tin interes di partisipá. E torneo ta pinta di bira grandísimo atrobe manera ta e kaso tur aña. Van Engelen Ballpark Foundation ta organisadó di Torneo Hope 2023.
* * * * *
Nos ta pendiente pa reunión entre BEVEKO i timnan, pa wak kiko ta bai pasa den 2023 den Beisbòl Veterano. Ekiponan ta pendiente pa wak ku tin torneo warm-up. Na 2022 ekipo The Brothers a organisá un torneo i Santa Maria a titulá kampion. Den e kampionato ofishal Santa Maria a bira supkampion i ekipo Quality Stars a bira kampion. Den pasado ekiponan Jandoret Raiders, Azucar, Groot Kwartier, Santa Maria, The Bears, Santa Rosa i Bulldogs a yega di organisá torneonan di Beisbòl Veterano. Santa Rosa a organisá Torneo Warm-up na dos okashon. Na un okashon na Tio Daou Ballpark i na aña 2012 na Tata Beaumont Ballpark na Bonnam.
* * * * *
Aña 2014 Jandoret Raiders a organisá torneo di Beisbòl Veterano na Heintje Kool Ballpark, kaminda ekipo Vosama a bira kampion ganando Jandoret Raiders den final. Jandoret a partisipá ku dos tim den e torneo ei, Jandoret Raiders A i B. Vários ekipo ku a partisipá den e torneo ei no ta eksistí mas den Beisbòl Veterano. Ekiponan manera Eagle, Surprise i The Bears. Den e torneo ei algun hungadó di Bulldogs a forma ekipo Streanan 88, ku tabata hungadónan ku a hunga den selekshon Hubenil na aña 88, enkabesá pa Hensley Josephina. Den Vosama ku a bira kampion e tempu ei tabatin dos picher estrea ku tabata Orsendo Clemencia i Xaviero Avastia. Pa loke ta trata e kampionato regular e aña ei, ekipo Jandoret a bira kampion ganando di Vosama den final den dos wega kandela ku a terminá 3-1. Tur dos wega di final a terminá 3 pa 1.
* * * * *
Ban pa Amstel Bright Premier Cup ku ta moviendo den gran forma na Van Engelen Ballpark. Djasabra den oranan di mainta, esta promé ku 12’or tabatin dos wega kandela den Liga 50. Ekipo Jaws supkampion di Liga 50 di 2022, supkampion di Liga 50 Torneo Survivors, a faha formal pa gana di Jandoret Raiders ku skor 4 pa 2. Fernando ‘Paiza’ Rosario tabata e picher ganadó den un duelo feros ku Edison Sambo ku a reforsá Jandoret pa e torneo aki. Paiza Rosario i Edison Sambo ku ta forma e one-two di Jaws, a klasifiká Jaws komo number 1 di kampionato regular di Liga 50 den 2022. Cedrix Valies ku ta bèk ku Jaws tabatin un doblete klave den e wega aki i a bati di 3-2.
* * * * *
Den e sigiente wega di djasabra último, ekipo Marlins a sorprendé e ‘Dream Team’ Ban Serio ganando ku skor di 7 pa 4. Gilbert Henrietta, èks estelar di Marlins ku a reforsá Marlins den Amstel Bright Premier Cup aki, a tira wega kompletu pa Marlins. Di e 3 grandinan nobo di Ban Serio ta solamente Kelvin Winklaar tabata presente. Te ku djasabra ei situashon a pèrta den e pul menshoná. Ekipo Flamboyan Tigers ku a gana Sluggers 11 pa 1 tin rèkòrt di 2-1, Ban Serio tin rèkòrt di 1-1. Marlins tambe tin 1-1. Ban Serio lo topa ku Sluggers i Marlins tambe lo topa ku Sluggers.
