Nos Goso kampion The Diamond Stars League 2023
WILLEMSTAD- Nos Goso a bira kampion di The Diamond Stars League den un wega emoshonante djabièrnè 9 di yüni 2023 den Sam Bunting Ballpark. Nos Goso a gana Rising Phoenix ku skor di 6 pa 4 den di 9 inning (dos extra inning). Un públiko grandi a bai Sam Bunting Ballpark pa mira e wega finalísimo.
Rising Phoenix komo ekipo di kas tabatin hopi chèns pa laga Nos Goso den tereno, pero picheo tremendo di Carlientje Cleopa a saka e outnan na momentu di bèrdat. E wega kompletu tabata un duelo di picheo entre Carlientje Cloepa di Nos Goso i Marie Windster di Rising Phoenix. Ta di dos biaha sigi ku Nos Goso ta logra bira kampion di The Diamond Stars League. Despues di wega tabatin entrega di premio Carlientje Cleopa tabata e picher ganadó i Miriela Carlo a bati di 4-3. Marie Windster tabata e picher pèrdèdó. Den kurso di dianan nos tin mas detaye.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bondia i felis siman. Nos Goso a gana Rising Phoniex 6 pa 4 i bira kampion. Na 2022 ekipo Nos Goso tabata kampion, promé aña di e liga. Ke mèn, Nos Goso ta rumbo pa dinastia. Rising Phoenix a gana Nos Goso na dos okashon durante e kampionato regular. Den play-off 1 vs 2 Nos Goso a gana e seri 2-1 i e seri final tambe 2-1. Ke mèn Rising Phoenix a 4 wega ganá i Nos Goso 4 ganá overall pa loke ta e temporada aki den The Diamond Stars League, pero Nos Goso ta kampion.
* * * * *
Djaweps mester tabatin wega number 3 di e seri semi-final di Liga 40 entre Crazy Tigers i Gamers. Ganadó di e wega aki lo hunga kontra Baranka den final. Ta trata aki di kampionato 2022 di Liga 40 ku a keda suspendé pa motibu di mal estado di tereno, debí ku awaseru a kai formal na 2022 den lunanan, òktober, novèmber i desèmber. Baranka a gana su seri kontra di Crazy Tigers i pasa pa final i Gamers a gana Swift i awor ta kontra Gamers den semi final. E wega aki no bai dor debí na blackout.
* * * * *
Djasabra Liga 50 tabatin algun wega masha interesante na Van Engelen Ballpark ku algun wega kandela tras di otro. Pa 10.00 Lions vs Sluggers, Lions a gana Sluggers. 12.00 ta Jaws vs Marlins (Marlins a gana 7 pa 6) 14.00 Flamboyan Tigers – Ban Serio,(Ban Serio a gana) 16.00 Catpower a dal Artemisia. Baranka tabatin barwacht i Pitufos tabata liber. Lions tin rèkòrt di 2-4 i Sluggers tin 4-2. Kandela mes mes entre Jaws i Marlins, tur dos ekipo tin 4-2. Ban Serio ku rèkòrt di 5-1 i Flamboyan Tigers tin 2-4. E rekòrtnan (standingnan) aki ta promé ku e weganan di djasabra 10 di yüni 2023. Tene kuenta ku Flamboyan tin un tremendo ekipo i na 2022 Jaws mester a lucha pa gana Flamboyan/Tigers den semi-final pa logra yega final kontra Baranka.
* * * * *
Den Beisbòl Veterano ta kandela tin na momentu ku ekipo Quality Stars topa ku Santa Maria Pirates djadumingu. Tur dos ekipo tin rèkòrt 2-0 i un invikto mester kai einan. Otro weganan di wikènt ta djasabra 10 di yüni tabata, 10.30 Marchena Stars – Yesterday, 13.00 Azucar – Isla Crackers, 15.30 Santa Rosa Memories – The Brothers. Djadumingu 11 di yüni 10.30 Jandoret Raiders – Vosama, 13.00 Quality Stars – Santa Maria Pirates, 15.30 Marlins – Otrabanda Veterano. Interes a kuminsá krese bèk pa Beisbòl Veterano. Hopi hóben ku tempu di nan tempu a destaká, ta bèk den Beisbòl Veterano i ta gosando di e ambiente di Beisbòl Veterano.
* * * * *
Skibiendo di Beisbòl Dòbel A, djamars último e picher Je-andrick Lourens di Royal Scorpions a logra un hazaña inkreíbel na momentu ku ela poncha 11 batiadó di Santa Rosa Indians sigí. Je-andrick Lourens a drenta den bòm di e di dos inning pa picha na lugá di Faysal Gregorio i saka e promé batiadó out. Den bòm di e di 4 inning Je-andrick a kuminsá ku su racha di poncha batiadónan di Santa Rosa Indians. E promé ponche tabata pa Ayrton Gijsbertha ku un out den di 4 inning. Despues a sigi ponche pa Aldair Daal. Den bòm di e di 5 inning, Riordan Windster, Swindley Lint, Jurgen Statie ta poncha. Nos ta na 5 ponche sigí. Despues a sigi Rochendrik Alexander, Rutherson Ustasia i Carlton Daal pa yega na 8 sigí. Den bòm di e di 7 inning, Reyhan Fecunda, Terrence Goeloe i Aldair Daal ta poncha pa yega na e gran total di 11 ponche sigí. Despues den di 8 inning a sigi dos base por bola pa Riordan Windster i Swindley Lint, sigí pa ponche pa Ruigino Jonis i einan a kambia e picher Je-andrick Lourens. E picher slengu di 20 aña aki a tira 6 inning sin tuma hit, 2 base por bola i 12 ponche.
* * * * *
E tremendo picher aki ku ta bai kumpli 21 aña dia 27 di yüni benidero a tira 89 lansamentu djamars último di kual 57 tabata straik. Je-andrick a nase na Vlaardingen Hulanda i a kuminsà hunga Beisból ku 12 aña. Ela bai Academy High School i despues Monroe College na New York. Je-andrick ta pendiente kua skol e ta bai sigi. No ta sigur ku Je-andrick tei den luna di òktober pa play-off di Beisbòl Dòbel A. Keda pendiente pa mas informashon di Je-andrick Lourens. Nos te keda te aki pa awe.
