Playoff the Dimaond Stars League ta start djabièrnè 12 di mei
WILLEMSTAD- Djabièrnè 12 di mei play-off The Diamond Stars League ta start na Sam Bunting Ballpark. E ekiponan ku a klasifiká ta 1. Rising Phoenix, 2. Nos Goso, 3.Treasure i 4. The Fighters. E promé wega di djabièrnè 12 di mei 8’or pm ta Treasure vs The Fighters, di dos wega 9.45 pm ta Rising Phoenix kontra Nos Goso. Djasabra Rising Phoenix lo topa ku Nos Goso den e promé wega i despues Treasure/The Fighters.
Resultadonan wikènt pasá
The Rising Phoenix ta gana 2 wega den The Diamond Stars League
WILLEMSTAD- The Diamond Stars League a kontinuá durante e wikènt di 5 pa 7 di mei ku 4 wega ku a tuma lugá na Sam Bunting Ballpark. Djabièrnè dia 5 di mei The Rising Phoenix a gana Mas Goso ku skor di 5 pa 1 i djasabra 6 di mei The Rising Phoenix ta derotá Treasure New Era ku skor di 6 – 0. E otro weganan a terminá ku un viktoria pa The Fighters riba Treasure New Era di 5 pa 3 i den e otro wega Nos Goso a blankia Lady G 7 – 0.
RESULTADONAN
Djabièrnè 5 di mei
The Fighters 5, Treasure New Era 3
The Fighters tabatin 6 hit ku 2 eror. Sevilla Martina a gana. Sonaiska Francisca ku Dalilah Martina, ámbos a bai di 2-1. Judesca Kastaneer a bai di 1-1. Pa Treasure New Era 4 hit ku 5 eror. Minerva Maduro a pèrdè i e mes a bai di 1-1. Susmaline Rifaela tambe a bai di 1-1 i Geslene Kerindongo a bai di 2-2.
The Rising Phoenix 5, Mas Goso 1
The Rising Phoenix tabatin 8 hit ku 2 eror. Janella Comenencia tabata ganadó. Curilma Carolina, Joudinay Wederfoort, Ashantely Giterson ku Johsmaye Chirino, tur a bai di 3-2. Mas Goso a dal 4 hit i nan a hasi 5 eror. Milusca Leito a resultá pèrdèdó. Asila Finies, Arnalda Margarita ku Esterline Lindeborg, tur a bai di 2-1. Milusca Leito a bai di 1-1.
Djasabra 6 di mei
Nos Goso 7, Lady G 0
Nos Goso tabatin 8 hit i nan a hunga sin eror. Carlientje Cleopa a bai ku e viktoria. Myriela Carlo ku Gwendolyn Juliana, ámbos a bai di 2-1. Milady Perreira a bai di 1-1 i Natalie Lourens di 3-2. Lady G a dal 4 hit i hasi 3 eror. Monica Noor a karga ku e derota. Chudella Borgschot ku Nohah Constancia, ámbos di 2-1. Marita Reigina a bai di 2-2.
Rising Phoenix 6, Treasure New Era 0
Rising Phoenix a dal 12 hit i nan a kometé 1 eror. Marie Windster a gana. Soraida Louisa-Molina a bai di 3-2. Curilma Carolina di 4-2 i Sjulivien Martina a bai di 4-3. Pa Treasure New Era 6 hit ku 8 eror. Anushka Delando a pèrdè. Dianara Pieternella a bai di 2-1, Anushka Delando di 1-1 i Ismairy Ignacio a bai di 3-2.
Treasure New Era i Dayanara ‘Una’ Pieternella ta pèrdè 2 wega den wikènt.'
Unidos ta gana Golden Girls 2 pa 1 den Liga Streanan di Ayera
WILLEMSTAD- Djadumingu 7 mei Liga Deseo Streañan Dj’ayera a sigi ku su kampionato kaminda e promé wega, un wega ku tabata bon bringá pa ámbos tim, a bin resultá den un viktoria pa e tim di Unidos riba Golden Girls. Wega number 2 a terminá ku Tur Goso derotando Eureka ku skor di 8 pa 2.
Pa Unidos 2 kareda 4 hit i 1 eror. Miho bate tabata Signaida Antonia di 2-2 i Muriel Simmons di 1-1. Ganadó a resultá Churmelyn Eduarda. Golden Girls 1 kareda 2 hit i 3 eror. Nathalie Elisabeth i Lisa Beaumont, ámbos a bai di 2-1. Pèrdèdó a resultá Mairis Obispo.
Wega number 2, Tur Goso ta gana di Eureka 8 pa 2. Tur Goso a bati un total di 13 hit i kometé 3 eror. Natasha Merselia, Girela Isabella, Annella Baromeo i Joyceline Arnhem, tur a bai di 3-2. Sevilla Martina a gana. Eureka tabatin 2 kareda, 6 hit i 2 eror. Mirugia Bernadina a bai di 3-2 i Amela Benilla di 1-1. Maudrith Faneith a pèrdè.
Djadumingu 14 di mei lo no tin wega, mirando ku ta Dia di Mama. Kampionato lo kontinuá riba djadumingu 21 di mei próksimo.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou. Nos tei atrobe kargá ku informashon di Sòftbòl i Beisbòl.Torneo Hope a yega na su fin ku 6 final kandela. Bon públiko apesar ku no tabatin banda djadumingu riba e fecha final. E organisadónan a opta pa pone e banda riba djasabra i laga djadumingu pa wega di bala i solamente DJ. DJ RO-1 a animá e púbiko presente. Varios final bon bringá i den 40+ ekipo CRU a sali bira kampion den oranan di mainta. E ekipo CRU a start suak pèrdiendo nan promé wega kontra e ekipo Polis i despues a bini bèk gana tur e sigiente weganan. Pèrdè e promé, gana 3 sigí durante e buelta regular, gana semi-final i final. Ke mèn, overall 5 ganá i 1 pèrdí.
* * * * *
Curacao Refinery Utilities (CRU) den nan promé wega no tabatin Orcendo Clemencia, Joel Angelista,
Lindies Maccow, Omar Valies ets. En todo kaso CRU kampion di 40+ despues ku ekipo Polis tabata kampion na 2022. Tabatin un torneo kaminda tabatin partisipashon di 40+ den Stadion Post 6 aña pasá i tabata e ekipo SDKK ku a bira kampion. SDKK tabatin úniko ekipo den Torneo Hope 40+ ku no a klasifiká. Remarkabel ta ku SDKK a sali gana nan promé wega relatívamente fásil 7-0 di MCB i despues a pèrdè tur wega den e buelta regular.
* * * * *
Den otro wega final tempran djadumingu Friday’s Karbon ku tabata gran faborito a keda kòrtiku kontra di The Fire Boys. Friday’s Karbon tabatin hopi superestrea di 40+ ku no ta konta komo aktivo kontra di Fire Boys. Fire Boys tin hungadónan manera Alexander Rodriguez, Emilio Velarde, Ericson Senior, Ryan Emers i Sendric Martha. Alexander Rodriguez so a gana e ekipo Friday’s Karbon bayendo di 3-3 ku 3 homerun i empuhando 4 di e 8 karedanan pa su ekipo gana 8 pa 4. Jurdrick Martha tabata e picher ganadó. Ekipo Friday’s Karbon tabatin Julius Veeris, Ramiro Balentina, Urlich Snijder, Merieldo Trinidad, Rhiency Imperator, Rodney Michel, Carlos Pinedo, Dayron Puriel i Rudney Balentien. Un gran faborito a kai den e final aki.
* * * * *
Belastingdienst a sorprendé Kustwacht den e final. Mester remarká si ku Belastingdienst a pèrdè solamente un wega durante e torneo Hope 2023. Ta Belastingdienst so a ripití komo kampion den nan kategoría. SBAB tabata kampion den 2 kategoría den 2022. Polis tabata kampion den 40+, Onderwijs kampion den Femenino Soshal. Torneo Hope 2023 interesantísimo i ban wak ken lo tuma Hope over den 2023. En todo kaso den e último wega MCB tabata sólido ganando di EWT/Mac Donald ku skor di 7-0. Hungadónan manera Vanessa Winklaar, Natalie Lourens, Tsade Joubert, Asila Finies ets. ku nan eksperensia. MCB a bai final den solamente un kategoría despues ku nan tabata den semi-final den 4 kategoría.
* * * * *
Liga 50 ta kandela djasabra awor ku e wega entre Ban Serio i Baranka. Wega lo sigi den Stadion Post 6 mes, pa despues ku segun skema nobo mester a bai na Van Engelen Ballpark. Weganan ta 10.00 Sluggers – Tigers, 12.00 Catpower – Pitufos, 14.00 Jaws vs Artemisia i 16.00 Ban Serio – Baranka. Di dia 17 di mei pa 21 di mei lo tin Kopa ABC&S na Kòrsou manera ya nos a komentá. Ekiponan ta entre otro Terremoto, Cicoza, Swift i Dream Team/Thrillers di Kòrsou.
* * * * *
Otro ekiponan ta Happy Brothers (Aruba), Superstars (Sint Maarten), Sonrisa (Boneiru), Crush Power
(Aruba), Crusher (Boneiru), Energizer (Boneiru) , Controllers (Sint Maarten) i Redskins (Aruba). Ta trata aki di 12 ekipo repartí den dos pul. Ke mèn 4 di Kòrsou, 3 di Boneiru, 3 di Aruba i 2 di Sint Maarten. Tur ekipo ta hunga 5 wega i ekiponan 1 te 8 ta klasifiká pa despues sigi ku play-off djasabra 20 di mei. Djadumingu 21 di mei ta e fecha final kaminda lo tin Homerun Derby. 12’or i 2’or tin semi-final i pa 4’or tin e gran final di Kopa ABC&S 2023.
* * * * *
Nos tin skema di e ABC&S 50+ ku ta tuma lugá na Boneiru di 17 pa 21 di mei. Marlins i Ban Serio lo representá Kòrsou. Tigers veterano di Sint Maarten tambe lo tei. Di Boneiru solamente Dragons i The Brothers. Ke mèn, 6 tim repartí den 2 pul. Keda pendiente pa mas detaye. Un grandi , Eddy Walle a bai laga nos. Hòmber ku a hasi masha hopi mes mes pa deporte, espesialmente Beisbòl i Santa Maria Pirates. Kondolensia na nos brother George Walle, demas rumannan, yunan i demas famia. Akto di entiero ta djasabra 13 di mei na El Tributo di 1pm pa 3.15pm.
