Resultado Final Torneo Survivors/The Greatest 2023
WILLEMSTAD- Torneo Survivors/The Greatest a resultá un éksito rotundo. Djadumingu 26 di febrüari tabatin 5 wega final despues ku riba djasabra tabatin weganan di semi-final. Ekiponan Nos Tambe Por, Baranka, Among Us, Selikor i ADC a bira kampion. Awe nos tin ganadónan di premio individual i vários pòtrèt.
PREMIONAN
LIGA 60:
Kampeon: Nos Tambe Por;
Hungadó mas Balioso: Percy Schoop;
Sup Kampeon: Jaws;
Kampeon Picher: Riley Toppenberg di Jaws 3 ganá 0 pèrdí;
Kampeon Bate: Cedric Curiel di Los Amigos Ave 667 (6-4);
Kampeon Bate: Erickson Liberia di Jaws Ave 667 (6-4);
Kampeon Homerun: Emile Haswell di Nos Tambe Por 1 Homerun.
LIGA 50:
Kampeon: Baranka / Sharks;
Hungadó mas Balioso: Kenrick Hellement;
Sup Kampeon: Jaws;
Kampeon Picher: Edison Sambo di Jaws 2 ganá 0 pèrdí;
Kampeon Bate: Joseph Everon di Baranka Ave 667 (6-4);
Kampeon Homerun: Jair Josepha di Jaws 2 Homerun.
Maskulino Speshal:
Kampeon: Among Us;
Hungadó mas Balioso: Jason Kleimoedig;
Sup Kampeon: Chonchi’s;
Kampeon Picher: Jeremiah Wansing di Chonchi’s 3 ganá 0 pèrdí;
Kampeon Bate: Urny Floran APC /IT /Dot Ave 857 (7-6);
Kampeon Homerun: Jason Kleinmoedig di Among Us 3 Homerun.
Soshal Maskulino:
Kampeon: Selikor;
Hungadó mas Balioso: Ruwel Matrona;
Sup Kampeon: SBAB;
Kampeon Picher: Jeremy Lucas di SBAB 3 ganá 0 pèrdí;
Kampeon Bate: Zjurdiëne Laken di Brandweer Ave 714 (7-5);
Kampeon Homerun: Jonathan Matos de Leon di ADC 2 Homerun.
Coed:
Kampeon: ADC;
Hungadó mas Balioso:
Sup Kampeon: SOAB;
Kampeon Picher: Robert Wanga di SOAB 2 ganá 0 pèrdí
Kampeon Bate: Robert Wanga di SOAB Ave 800 (5-4);
Kampeon Bate: Jersino Fluonia Ave 800 (5-4);
Kampeon Homerun: Terrence Goeloe di SOAB 2 Homerun.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bonochi. Nos tei atrobe den fin di siman aki kargá ku informashon di Sòftbòl Slowpitch i Beisbòl. Ambiente total na tantu Van Engelen Ballpark komo Buena Vista Ballpark. Na Buena Vista tabatin final di Torneo Survivors den 5 kategoria. Realmente weganan kayente so ku a terminá pa un kareda di diferensia i den e último partido den e wega entre ADC i SOAB kaminda ADC a hala kita bai laga SOAB i gana 16 pa 7. The Greatest/Survivors su dirigentenan tabata hopi kontentu ku tur kos a bai bon ku esepshon di un insidente di agreshon di umpire. Liga i dirigentenan lo bai aktua ku man duru kontra hungadó, dirigente i coachnan ku ta hasi nan mes kulpabel na agreshon, tantu verbal komo físiko. Awe den kurso di dia dirigentenan di Amstel Bright Premier Cup a manda un mensage kla kla pa tur hende i ta bai tuma medida hopi serio.
* * * * *
Miéntras tantu direktiva di BEVEKO ku ta bai baha ta pendiente pa e promé reunión den luna di mart aki. E promé reunión lo tuma lugá djarason 8 di mart. E direktiva aki lo baha sigur sigur i nos a tende di moveshon pa bini ku un otro direktiva. Sra. Xiomara Sedney, èks miembro di direktiva ku un tempu a guia Beisbòl Veterano den gran forma na momemtu ku un presidente a baha bai, ta dispuesto pa salba e Beisbòl Veterano i wak un tim ku por yuda e ramo di deporte aki ku ta hopi popular mes aya na VI Jansen Ballpark. Ta pendiente tambe pa moveshonnan ku ekiponan di Hulanda tantu riba nivel di 40+ komo 50+ den luna di novèmber. Ekipo Legends ya ta hasiendo tramitenan pa organisá un torneo 50+ Beisbòl entre ekiponan di Hulanda i Kòrsou medio novèmber. Ta buskando ekiponan di Aruba, Boneiru i Sint Maarten ku ke partisipá.
* * * * *
Moveshonnan pisá den ekiponan di Beisbòl Veterano. Azucar a anunsiá manager i general manager pa kampionato 2023. Manager lo ta e popular kantante èks pelotero Clarck Zalm, miéntras general manager di Thierry Goeloe ku ta utility di e ekipo Azucar. Azucar ta un di e ekiponan ku mas tempu den Beisbòl Veterano. Naturalmente ekipo Otrabanda ta esun ku tin mas tantu tempu, sigí pa Yesterday i Vosama. Santa Rosa Memories a drenta Beisbòl Veterano mas o ménos na 2005, un òf algun aña despues di Vosama. Na momentu ku ekipo Legends di Hulanda organisá su torneo 50+ riba nivel di Reino aki na Kòrsou, e interes pa 50+ di Beisbòl lo subi dimes.
* * * * *
Djasabra último nos a papia ku Andley Simmons, ruman di Andrelton Simmons. Andley, un tremendo picher i batiadó slengu ta rumbo pa ekipo Yesterday kaminda su tata ta coach i èks hungadó. Hopi ekipo tabatin interes den Andley Simmons, pero e versatil hungadó aki a skohe pa Yesterday kaminda su tata ta miembro i despues ta wak kiko ta kiko. Pa loke ta trata Marchena Stars, no tin masha informashon. Fin di aña pasá nos a tende ku Jair Josepha lo bira general manager i manager di ekipo Marchena Stars. Santa Maria ta moviendo den silensio i nan ta hasiendo lo máksimo pa mantené nan manager i kuarto bate ku ta Dave Kirindongo.
* * * * *
Skibiendo di Santa Maria, djabièrnè awor Santa Maria ta selebrá e echo ku 60 aña pasà e ekipo a keda fundá. Un organisashon sumamentu eksitoso ku un tempu tabata kue titulonan unu tras di otro. Na 2018 e ekipo a logra nan último título di Beisbòl Dòbel A. Djabièrnè 3 di mart pa 7’or di anochi lo tin un Santu Sakrifisio di Misa na Misa di Santa Maria. Pa 8’or lo tin un enkuentro soshal na Frank Curiel Ballpark, serka Frank Curiel na Kaya Frank Curiel. Frank Curiel ta un dje fundadónan di Santa Maria Pirates. Tin un torneo di 60+ e wikènt aki na Frank Curiel Ballpark.
* * * * *
Tin un programa kompletu pa loke ta e fecha 3 di mart, kaminda Frank Curiel lo hiba palabra i lo honra algun baluarte. Despues di e parti ofishal tin músika resepshon/brindis durante e parti soshal. Djasabra tin weganan di T-ball, weganan di Minor League i Little League i tambe weganan di Sòftbòl Veterano. Djadumingu tin weganan di Minor i Little League. Lo tin un wega entre Nos Tambe Por i Lions den kategoria 60+. Nos ta keda pa awe.
