Resumen 2022 kampion den diferente kategoría Torneo Hope 2022
WILLEMSTAD – Nos ta sigi ku resumen di torneo, liga i kampionatonan di Beisbòl i Sòftbòl ku a tuma lugá den 2022 manera ya a bira un tradishon. Torneo Hope 2022 a yega na su final djadumingu 22 di mei dilanti un públiko grandísimo na Van Engelen Ballpark. Agrupashon musikal Gentz a animá te den oranan lat di anochi. Mayoría di e weganan final tabata basta pèrtá i e públiko presente a gosa un bòl. Ekiponan Polis, UDC/CDC, MCB, SBAB, Onderwijs i Belastingdienst a bira kampion. Den oranan di mainta riba e fecha ariba menshoná, ekipo Polis a gana MCB den e kategoría 40+ ku skor di 4-2.
Den e siguiente wega, den kategoría Soshal Plus UDC/CDC a gana di Damen. MCB a gana di SBAB den COED. Despues SBAB a gana FDDK den kategoría Challenger Maskulino 8 pa 2. Onderwijs a gana SBAB 8 pa 0 den e kategoría Soshal Femenino i den e último wega ekipo Belasting a gana di Brandweer 4 pa 2 den e kategoria Soshal Maskulino. Entrega di premio a tuma lugá riba e fecha final, debí ku tabatin muchu hende na e parke i riba òrdu di Polis a duna konseho pa tene e entrega di premio riba otro fecha. E entrega di premio e tuma lugá e siguiente djabièrnè 27 di mei na Van Engelen Ballpark.
INFORMASHON DI SÒFTBÒL I BEISBÒL
Fanátikonan di Deporte Kòrsou, bondia. Awe nos ta sigi ku e resumen di notisianan importante di Sòftbòl Slowpitch i Beisbòl. Den e artikulonan nos ta relatá di e kampionnan i den informahson di Beisbol i Sòftbòl riba notisianan ku tabata importante i ku a zona den 2022. Den publikashon anterior nos tabata mas o ménos den luna di febrüari 2022 riba algun informashon di Slowpitch. Den luna di febrüari Junny Obispo a keda anunsiá komo manager di Isla Crackers den 2022. Isla Crackers a sali duru, despues nan a kai un tiki i finalmente nan a terminá number 4 den e kampionato di Beisbòl Veterano. Nan a pèrdè dos wega sigi kontra ekipo Quality Stars den play-off semi-final. Manera ta konosí ekipo Quality Stars a bira kampion ganando e seri di 3 wega ku 2-1 kontra Santa Maria Pirates. Santa Maria Pirates a gana e promé wega pa nòkout i despues a pèrdè dos wega sigí.
* * * * *
Nos tin algun informashon di Little League tambe. Den luna di febrüari un tremendo wega di Little League entre Santa Maria i Marchena Braves a keda empatá na 0. Tabata un duelo di picheo entre Ziano Schoop i Davey Jay Rijke. Davey Jay Rijke despues tabata e máksimo estrea di playoff entre Pariba, Pabou i Willemstad, estrea na Punta Cana den Little League Kopa di Karibe i super estrea den Mundial na Williamsport kaminda Kòrsou a bira supkampion di Mundu. Den febrüari nos tabatin ku Yurendell de Caster a bira agente liber despues di basta aña ku Wild Cats. Yurendell a bai Santa Maria Pirates despues. E traspaso no a bai asina fásil i tabata algun ‘scaramouche’ promé ku e traspaso tuma lugá.
* * * * *
Den febrüari ekipo Un Kara a presentá unifòrm nobo i despues nan a logra bira kampion di Liga di Nos Tur den e parti final di aña. Swift a selebrá 50 aña di eksistensia dia 23 di februari. Despues di Santu Sakrifisio di Misa e ekipo a bai Larry pa selebrá huntu ku veterano, spònsernan i e hóbennan. Nos a skibi kaba den Torneo Bright ku a hunga di 4 pa 26 di mart. Issachar Pereira i Bryan Biegel a pasa di Firebirds pa ekipo Marchena Braves. Diamond Stars League a start na Sam Bunting Ballpark den luna di febrüari. Pitufos a selebrá 40 aña di eksistensia dia 28 di febrüari. By the way, nos tin informashon ku Jair Josepha lo sali di Isla Crackers i bai ekipo Marchena Stars i reorganisá e ekipo. Ekipo Los Amigos a selebrá 20 aña di eksistensia na kas di Maal Jonis den Koraal Specht.
* * * * *
Liga Soraida Juliana a start 4 di mart ku un direktiva kompletamente nobo. Dos selekshon a bai hunga Latino Americano na Puerto Rico i bini bèk komo kampion den luna di yüli. E kampionato tabata dediká na Isonette Polonius super star di nos Sòftbòl ku a studia via scholar ship i logra su master den dos diferente estudio. Rayshaendell Michel ta firma ku Wild Cats. Dennis Gustina a firma ku Marchena Stars. E dos firmanan menshoná ta den luna di mart 2022. Torneo Hope a start djabièrnè 1 di aprel. E torneo tabata organisá pa Van Engelen Ballpark Foundation.
* * * * *
Curtje Doran, Kevin Moesquit i Yurendell de Caster ta firma ku Santa Maria PIrates. Dylan Harms ta pasa di Santa Rosa Indians pa Wild Cats. Ekiponan 50+ na Kòrsou a kuminsá prepará pa Kopa ABC, miéntras Marlins ta anunsiá Kopa ABC 50+ ku partisipashon di ekiponan di Aruba, Boneiru i Kòrsou. Marchena Braves ta firma Ramses Jamanika. Pitufos ta bira kampion di torneo 60+ den nan promé partisipashon di Liga 60 na Kòrsou. E torneo ta organisá pa Jaws i tabata dediká na Kid Boca Chica, un dje fundadónan di Jaws. By the way Jaws Liga 60 tin un direktiva nobo pa aña 2023 / 2024. Presidente ta Bramford Hasham i manager nobo ta Rudsel Poulina. Djabièrnè nos lo bini ku mas detaye di e direktiva nobo di Jaws Liga 60. Nos ta keda te aki pa awe.
