Resumen Slowpitch 2022 Baranka kampion 50+ Swift i SBAB kampion Bright Premier Cup
WILLEMSTAD- Awe Deporte Korso ta start ku relatá deportenan Sòftbòl Slowpitch i Beisbòl durante aña 2022. E promé torneo ku a ranka sali tabata Torneo Amstel Bright yama Bright Premier Cup. E torneo a terminá djasabra 26 di mart na Van Engelen Ballpark. Ekiponan Baranka (50+), Swift (Modified), SBAB (Soshal), Among Us (Soshal Open), EWT Centrum (COED Corporate) i Chonchies (COED Open) a bira kampion i risibí nan trofeo di spònser pa Amstel Bright. E finalnan tabata SBAB 5, Selikor 4 (Soshal Corporate), Baranka 8, Raiders 7 (50+), EWT/Centrum/ Amigoe 9, SBAB 3 (COED Corporate).
INFORMASHON DI SÒFTBÒL I BEISBÒL
Fanátikonan di Deporte Kòrsou, bondia i felis fin di siman. Awe nos ta kuminsá repasá e aña ku ta pasando den Sòftbòl Slowpitch i Beisbòl Veterano. Nos lo bai bèk den e liga-, torneonan i ekiponan ku a bira kampion. Mester menshoná ku e aña aki 3 liga ku ta hunga na Van Engelen Ballpark no a konosé un kampion. Ta trata aki di Liga Amstel, Liga van Engelen i Liga 40. Debí ku Van Engelen Ballpark no por wanta e palu di awaseru ku a kai den novèmber i desèmber, a disidí di para tur aktividat riba e parke. Liga Amstel i Liga 40 ya a start ku play-off i Liga Van Engelen tabata pendiente pa start ku play-off.
* * * * *
Nos a kuminsá aña 2022 kaminda varios tim tabata habri aña i sera aña. Baranka 50+ a sera aña i a honra vários hungadó na kas di Gino Valeriaan. Ekipo Unidos a sera aña na kas di Boy Constancia aya na Boca Sami. Ekiponan Royal Magic i The Champs a stòp ku Beisbòl lokal. Ta trata aki di dos ekipo di Klase A den nos Beisbòl ku no tin ekipo den Dòbel A. E ekiponan aki a hunga kontra otro den 2021 pa asina esun ku gana e seri subi pa Dòbel A. Ekipo The Champs a gana e seri, pero mester a reforsá ku un gran kantidat di hungadó di Dòbel A konforme palabrashon ku direktiva di FEBEKO. Einan The Champs a hala atras for di Klase A i a resultá tambe ku e ekipo Royal Magic Suffisant no kier a sigi mas.
* * * * *
Varios kambio na kaminda den Beisbòl Dòbel A den 2022, entre otro ku Jeremy ‘Loko’ Lucas a pasa di Royal Scorpions pa Santa Rosa. Loko Lucas tabata un de pilanan den Royal Scorpions pa hopi aña. Un bon picher ku ta dominá i mas bien un lider den dugout. Loko Lucas a djòin su ruman Jordan Lucas den e ekipo di Santa Rosa. Roderick Bernadina despues di hopi moveshon i bai bin a keda Royal Scorpions i Idion Martina di ekipo Santa Rosa a pasa pa Royal Scorpions. Dennis Gustina di Royal Scorpions tabata pendiente pa move pa otro ekipo i finalmente ela bai Marchena Braves despues ku hopi ekipo tabata tin interes den e velos centerfielder aki.
* * * * *
Un liga nobo di Sòftbòl Femenino a start den 2022. Ta trata aki di Diamond League ku a start i move den gran forma i lástimamente e final e keda disidí pa defolt. Den luna di yanüari moveshonnan a kuminsá den Little League tambe i fechanan pa torneonan di Karibe i Latino Americano a bira konosí for di yanüari. 2022 a resultá un tremendo aña pa Little League na momentu ku nos a bira kampion regional den 4 kategoría. Minor, Little, Intermediate i Junior. Senior League ku nos tabatin un super tim no a logra bira kampion. Nos selekshon Little a bira kampion Internashonal i a sali supkampion di Mundu den luna di ougùstùs. Nota interesante den luna di yanüari ta ku Marioshendrik Martinu, yu di e hungadó konosí den Slowpitch i Beisbòl Veterano Mairon Martinus, a firma ku e organisashon di Dodgers di Los Angeles.
* * * * *
Wild Cats ta firma picher Gavanee Virginie ku tabata den Royal Scorpions i ekipo Marchena Braves ta firma picher Jerson Rosalina. Joshua Leito a firma ku organisashon di New York Yankees. Shurendy Valeriano picher èks Royal Scorpions a firma ku Santa Maria Pirates. Urlich Snijders veterano kètcher a bira agente liber i despues ta firma ku Wild Cats. Ekipo Wild Cats a bira kampion den luna di òktober. Dia 5 di febrüari tabatin apertura ofishal di Beisbòl Little League. Tabata un apertura hopi trankil, debí ku e tempu ei ainda tabatin medidanan pa ku Covid. E apertura a tuma lugá den e parti kaminda transmishon ta tuma lugá i umpire i skorernan ta reuní na Tio Daou Ballpark. Kenley Jansen tabata presente i a hiba palabra i tambe entregá gran kantidat di bala na Curacao Little League Beisbòl manera ela primintí.
* * * * *
Den Sòftbòl Slowpitch nos tin ku Michelangelo ‘Galbao’ Boekhoudt a pasa pa Marlins i dr. Jerry Booi di Ban Serio lo bai stòp ku Slowpitch. Jerry Booi no a pasa masha banda di tereno den 2022. E ekipo a yega play-off i pèrdè den dos wega stret ku Baranka ku despues a bira kampion. Tin rumor ku Jerry Booi tei bèk den 2023. Nos lo sigi ku resumen di e kampionnan i repasá 2022 den e dianan benidero.
