Resumen Slowpitch
Un Kara kampion Liga di Nos Tur 2022
WILLEMSTAD- Un Kara a gana dos wega pèrtá di ekipo Sin Stress wikènt pasá i bira kampion di Liga Di Nos Tur pa di 4 aña konsekutivo. E weganan a terminá ku skor di 12-10 i 6-5. Djabièrnè 4 di novèmber, e wega a terminá 12-10 i djasabra 5 di novèmber, Un Kara a laga Sin Stress den tereno ganando 6-5. Tantu djabièrnè komo djasabra tabatin bon públiko na Frank Curiel Ballpark. Isonette Polonius tabata MVP di e final i ekipo Un Kara a bari den premio. Den bateo hungadónan di Un Kara tabata 1,2,3. Den picheo number 1 i 3 i den homerun number 1.
Wild Cats kampion di Beisbòl Dòbel A
WILLEMSTAD - Wild Cats a gana e seri kontra Santa Maria 4-1 i bira kampion di Beisbòl Dòbel A 2022. Santa Maria a gana e promé wega dia 1 di novèmber ku skor di 8-4. Despues Wild Cats a gana e siguiente 4 weganan sigí ku skornan 12-6, 13-3, 12-9 i 5-1. Picher Shairon ‘Shai’ Martis a gana 2 di e 4 weganan final pa Wild Cats. E último wega ku tabata 10 di novèmber a keda suspendé for di e di 5 inning i Wild Cats a bira kampion riba e fecha menshoná. Rojean Cleofa di Wild Cats tabata MVP di e final.
Resumen Beisbòl Veterano
Quality Stars kampion Beisbòl Veterano 2022
WILLEMSTAD- Quality ku viktoria di 15-4 riba Santa Maria Pirates a titulá kampion di Beisbòl Veterano 2022 djadumingu 13 di novèmber. Un públiko grandi tabata presente na Vi Jansen Ballpark i despues por a gosa i baila riba ritmo di ERA. Quality a pèrdè e promé wega ku skor di 16-6 a bini bèk i gana e dos siguiente weganan 11-1 i 15-4. Hayzem Martina a gana tur dos wega di final i bira MVP di e seri final. Despues di e wega final tabatin entrega di premio na Vi Jansen Ballpark promé ku ERA kuminsá toka. Minister di Desaroyo Ekonómiko i Turismo sr. Cijntje, èks presidente di BEVEKO tabata presente i a entregá e kopanan.
Kampion: Quality Stars;
Supkampion: Santa Maria Pirates;
MVP final: Hayzem Martina (Quality Stars);
Terser Lugá: Jandoret Raiders;
Kampion Bate: Lo a Tjong (Santa Rosa Memories);
Kampion Picher: Amador Nita (Santa Maria Pirates) 8-0;
Lider di Homerun: Kelvin Winklaar (The Brothers) 4 homerun.
INFORMASHON DI SÒFTBÒL I BEISBÒL
Fanátikonan di Deporte Korsou, bon dia. Awe nos ta sigi ku resumen di eventonan deportivo den Sòftbòl i Beisbòl ku a hala atenshon durante aña 2022. Nos tin e kampionnan den 2022 i den kolumna loke a resaltá den 2022. Nos ta bai pa algun notisia ku a hala atenshon. Ekipo Jaguar Chilling a organisá un tremendo kompetensia di karioki entre hungadó i téknikonan di Sòftbòl Femenino Veterano di Slowpitch. Den Beisbòl Veterano Quality Stars a gana Isla Crackers den un tremendo wega ku skor di 2-1 den luna di sèptèmber. Baranka a zona Swift 24-2 den Liga 40 den luna di sèptèmber. Baranka ya ta den final di 40+ pendiente di su kontrinkante ku ta entre Gamers i Crazy Tigers ku lo hunga play-off semi-final manera aña start. Baranka a dal Jaws tambe durisimo 17-0 den mesun luna di sèptèmber.
* * * * *
Yubi Everts Batting Tunnel a organisá nan tradishonal kompetensia fundraising aya na Jandoret. Sòftbòl Femenino Fastpitch a sigi move den gran forma. Ekipo Souax a bira kampion den Klase A, pero den Dòbel A Pichingolo a bira kampion despues ku nan tabatin dos wega ganá i 1 pèrdí. Ekipo Souax ku tabatin un dream team a hala tras debí ku nan no tabatin mas hungadó i ekipo Pichingolo a gana wega number 4 den e seri pa defolt i bira kampion Sòftbòl Femenino Dòbel A pa defolt. Den pasado tambe tabatin un kaso aki kaminda ekipo Pichingolo a bira kampion segun nos riba ekipo Soto.
* * * * *
Den luna di òktober Raffy Jozefa, un dje grandinan a bai sosegá. Extra Inning a dediká varios página riba dos dia sigi riba e karera impreshonate di e super hungadó di Beisbòl aki. Varios ekipo di Beisbòl Dòbel A a buska hungadónan for di Aruba i Hulanda pa kompetí fuerte den play-off. Ekipo Santa Maria a buska Jonaikel Acosta for di Aruba (Hulanda), Hulandesnan Koen Postelmans i Scott Prins ku a yuda e ekipo menshoná yega semi-final komo ekipo number 2, pa despues gana Royal Scorpions i yega final. E ekipo Santa Maria ta kai vensí 4-1 den e seri final kontra di Wild Cats. Na Aruba ekipo Aruba Juniors a bira kampion di un ABC 60+. Ekiponan di Aruba, Boneiru i Kòrsou a partisipá den e 60+aki. Di Kòrsou a partisipá Los Amigos i Sluggers. Di Boneiru, Bonaire Stars ku a bira supkampion. Play-off sistema nobo den MLB a start ku varios Yu di Kòrsou den akshon, entre otro Kenley Jansen i Jurickson Profar. Albies tabata leshoná i no a mira akshon. Finalmente Houston Astros a bira kampion Mundial den komienso di novèmber.
* * * * *
Flamboyan Tigers a dal Marlins duru i klasifiká pa play-off Liga 50. Ekipo Nos Goso, i spònser pa Gai Lihe ta entregá unifòrm nobo na hungadónan. Baranka ta swip ekipo Ban Serio pa bai final di Sòftbòl Liga 50. Despues ekipo a bai warda 3 siman pa topa e ganadó di ekipo Jaws i Flamboyan Tigers. Finalmente Jaws ta gana e seri 2-1 i bai topa Baranka den final. Baranka na komienso di desèmber a swip ekipo Jaws den un wikènt pa bira kampion di Liga 50 pa di dos aña sigí. Clase Aparte a entregá unifòrm nobo na hungadónan na Around The Clock. E ekipo ta moviendo den gran forma den Liga van Engelen i a terminá aña 2022 na di dos lugá pendiente di e play-off ku lo bai tuma lugá den 2023.
* * * * *
Curacao Baseball Week a start den gran forma ku promé dia di klínika i Konferensia di Prensa. Despues pa motibu di awaseru konstante i mal estado di tereno e tradishonal evento a keda kanselá. Wild Cats a bira kampion di Beisbòl Dòbel A ganando di Santa Maria den wega number 5 di e seri ku a bai 5 inning. Tabata di dos wega ku a keda suspendé promé ku 9 inning pa motibu di awaseru. E último wega a terminá ku skor di 5-1.
* * * * *
Ekipo Otrabanda a bai dal un keiru Medellin, miéntras Lions a bai Sint Maarten. Ekipo Jaws a pasa pa final di Liga 50 pa despues kita e título for di Nos Tambe Por den un wega finalísimo den luna di desèmber. Despues di Jaws 60+, tabata e ekipo Jandoret Raiders 50+ ku tabata e último kampion di temporada 2022 den Sòftbòl i Beisbòl. Nos ta keda te aki pa awe.
