Semi-final i final di Torneo Survivors lo tuma lugá dianan 25 i 26 di febrüari

WILLEMSTAD- Semi-final i final di Torneo Survivors /The Greatest lo tuma lugá dianan 25 i 26 di febrüari na Buena Vista Ballpark. E torneo mester a terminá djasabra último, pero esei no a logra, debí ku masha hopi wega a keda suspendé pa motibu di awaseru. Den kategoria 50 i 60 ekiponan Jaws a bai final direkt, pendiente di nan kontrinkantenan ku ta bai hunga semi-final. Pa loke ta trata Soshal Maskulino i Soshal Maskulino Speshal, 2 ekipo di kada pul a klasifiká.  Ekiponan SOAB i ADC lo topa otro den final di COED ku ta programá pa tuma lugá djadumingu 26 di febrüari pa 5.30 pm na Buena Vista Ballpark. Nos tin mas resultado di weganan di djasabra último.

ADC 11, Coca Cola 7 (Soshal Maskulino)
ADC a dal 14 hit i hasi 2 eror.  Gilliard Reinita a gana i Lattif Correa a bati di 2-2.  Javier Mardenborough a bati un homerun.  Coca Cola a dal 10 hit i  kometé 3 eror. Redien Martines tabata e picher pèrdèdó.  Edwin Thielman i Sigmond Melfor a bati di 3-2. Jowel Thielman i Redien Martines a bati di 1-1. Sigmond Melfor i Eugene Ferero a bati un homerun.

ADC 10, Lab de Med 2 (COED)
ADC a konektá 15 hit i hasi 3 eror. Jermaine Esprit tabata e picher ganadó. Adelbert Toppenberg a bati di 2-2. Gilliard Ijziek a konektá un homerun. Lab De Med a bati 6 hit i hasi 3 eror. Eldric Duggan tabata e picher pèrdèdó. Chaunice Maduro i Aldair Adamus a bati di 3-2.

‍

Fanátikonan di Extra Inning, bon dia. Djamars tabata  e gran dia di San Valentino. Antes tabata e dia pa bo mustra bo enamorado(a) kuantu bo ta apresié ku un regalo òf un kariño. Despues e kos a bira Dia di Amistat, di amigu(a), di kolega, ke men mas hende pa un regalo/kariño, mas moveshon, mas komersio i mas trabou.  En todo kaso mi ta spera ku tur nos lesadónan a disfrutá. Basta konosí den deporte ta hasi aña riba Dia di San Valentino. Nelly Jakoba (Lions/Aqualectra/ Nos Tambe Por), Omar Valies (Yesterday), Michelond Maduro (SDKK), Leonel ‘Grandi’ van het Kruys (Groot Kwartier Stars, veteranísimo), Nico Dunker (músiko), Gerty Ignacio, Tilsaimy Melfor pelotero i Ritmo Martina (un dje grandinan).

* * * * *

Torneo Survivors ta sigi despues di Karnaval. Nos a risibí un mensahe di e organisadónan ku ta drenta djaluna. “Survivors/The Greatest ta manda boso e skèdjel dje weganan di semi-final i final. Ta tuma un break wikènt aki i selebrá Karnaval. E siguiente siman si nos ta spera di por kaba e torneo. Danki na boso tur ku a sa di karga ku nos pa e kambionan di skèdjel ku ta tin, ya ku awaseru no ta den nos man. Nos ta spera boso dia 25 i 26 di febrüari 2023. Weganan ta tuma lugá na Buena Vista Ballpark, debí ku ta pendiente pa start ku Torneo Amstel Bright na Van Engelen Ballpark.”

‍

* * * * *

Ekiponan ku a klasifiká ta Nos Tambe Por, Los Amigos i Jaws den Liga 60. Ekipo Jaws a pasa dirèkt pa final. Den 50+ a klasifiká Baranka/Sharks, Mon Repos Sluggers i Jaws. Ekipo Jaws a pasa akinan tambe dirèkt pa final. Jaws ta pinta di bira un kos serio den 50 i 60+ aña 2023.  Final di Liga 60 lo ta djadumingu 26 di febrüari pa 10’or i final di 50+ lo ta 12’or naturalmente na Buena Vista Ballpark. Pa 2.30’or lo tin final di Soshal Maskulino Speshal, pa 4’or Final di Soshal Maskulino i pa 5.30’or lo hunga final di COED ku ya ta disidí kaba. Final di COED lo ta entre SOAB i ADC.

* * * * *

Pa loke ta trata e parti Soshal Maskulino, den Pul A a klasifiká SBAB i Brandweer. Ekiponan Renaissance i VKC a keda eliminá den e pul menshoná. Den e pul B ekiponan Coca Cola i Selikor a klasifiká i CPA/Fraal i Coca Cola a keda kòrtiku. Den e kategoría Soshal Maskulino Speshal, den Pul A e ekiponan APC/IT/Dot i The New Radiator a klasifiká i Keyfin ku Wenman a keda for di klasifikashon. Chonchi’s i Among Us a klasifiká den Pul B di Soshal Maskulino Speshal miéntras The Fire i Dominicanos Act a keda kòrtiku.  Play-off ta start djasabra 25 di febrüari manera nos a anunsiá i pa otro siman nos lo tin skèdjel kompletu.

* * * * *

Niun moveshon pa loke ta trata Beisbòl Veterano. E direktiva aktual a anunsiá for di aña pasá ku nan no ta bini bèk i no tin niun moveshon di ekiponan ku ta afiliá na Beisbòl Veterano pa yega na un direktiva nobo.  Un miembro di direktiva a konfirmá pa nos djasabra último ku te asina leu ku e sa, niun miembro di e direktiva aktual no ta bini bèk. Komunikadonan mester sali pa Reunión General, tin fecha di traspaso i mas detayenan ku sa bira konosí for di komienso di aña, pero nada ainda.

* * * * *

Kedando den Beisbòl Veterano, 3 ekipo 50+ di Hulanda di Beisbòl lo ta na Kòrsou medio novèmber pa hunga den un torneo. Jandoret Raiders ya a konfirmá nan partisipashon den e torneo 50+ menshoná. Problamente Sigi Hunga tambe ku ta supkampion lo ta den. Nos lo bai chèk ku Yesterday i òf Otrabanda tambe tin interes pa partisipá den e torneo. Ekipo Legends i dos ekipo mas di Hulanda a bira 50+ i nan ta preferá di hunga den e liga menshoná. Lo bai chèk si representashon di 50+ di Aruba tambe ta interesá pa partisipá i chèns ku Sint Maarten i Boneiru tambe tin interes, debí ku nan tin ekiponan di 50+ den Sòftbòl. Na promé instante ta Jandoret Raiders a duna OK. Nos ta pendiente pa duna mas informashon di e torneo di Reino 50+ aki. Nos ta keda te aki pa awe.

‍