Serinan di play-off Liga 40 Sòftbòl ta empatá
WILLEMSTAD- Play-off di Liga 40 a sigi djamars último ku dos wega na Van Engelen Ballpark. Ekiponan Crazy Tigers i Swift a gana di respektivamente Baranka i Gamers. Ku e viktorianan aki tur dos seri ta empatá na 1. Baranka number 1 a gana Crazy Tigers, number 2 ku skor di 7-4 den e promé wega di play-off i despues djamars último Crazy Tigers a dal Baranka 17-16. Gamers number 3 durante kampionato regular a gana Swift, ku a terminá number 4, ku skor di 10-3 den e promé wega pa despues Swift dal Gamers pa blankeo 6-0. E weganan di djaweps 17 di novèmber a keda suspendé pa motibu di awaseru i lo sigi djamars 22 di novèmber.
RESULTADONAN
Crazy Tigers 17, Baranka 16
Crazy Tigers tabatin 15 hit ku 2 eror. Dudley Penso a gana i Stanford Landburg a bai di 2-1. Jermain Esprit, Julius Veeris, Kevin Boekhoudt ku Dudley Penso, tur a bai di 3-2. Erickson Senior a bai di 4-3. Julius Veeris a konektá 2 homerun. Baranka a dal 14 hit i nan a hasi 3 eror. Railison Gijsbertha a pèrdè. Emile Haswell ku Charlton Merite, ámbos di 2-1 i Erling Gosepa di 2-2. Kelvin Winklaar a bai di 3-2, Jair Josepha di 3-3 i Eldred Estanista a bai di 4-3. Kelvin Winklaar ku Eldred Estanista, ámbos a konektá 1 homerun i Ramiro Balentina a konektá 2 homerun.
Swift 6, Gamers 0
Swift a dal 11 hit i nan a kometé 2 eror. Fernando Rosario tabata ganadó i Aishel Hooi a bai di 1-1.
Donovan Seferina, Percey Gosepa i Wendell v/h Kruys, tur a bai di 2-1. Emilio Velarde Lugo, Ian Ignacio ku Fernando Rosario , tur a bai di 3-2. Gamers tabatin 5 hit ku 2 eror. Jose Obispa a resultá pèrdèdó. Olav Verbrugge ku Jair Quant, ámbos di 2-1.
Wega 1
Gamers 10, Swift 3
Gamers tabatin 13 hit ku 3 eror. Rudney Garmes a gana. Ryan Imperator a bai di 3-2. Patrick Wagner i Bryon Kook, ámbos di 4-3. Swift a dal 7 hit i hasi 1 eror. Rolando Castro a pèrdè. Joel Angelista ku Aishel Hooi a bai di 2-1, ámbos i Fernando Rosario di 3-2.
Wega 1
Baranka 7, Crazy Tigers 4
Baranka a dal 10 hit i kometé 1 eror. Railison Gijsbertha tabata ganadó i Edmar Cornelia a bai di 1-1, Merieldo Trinidad di 2-1. Gerald Zimmerman, Ericson Martina i Railison Gijsbertha, tur a bai di 3-2. Crazy Tigers tabatin 9 hit i nan a hunga sin eror. Sharlon Hanst a resultá pèrdèdó. David Kirindongo i Julius Veeris, ámbos di 2-1, Luigi Yanez di 3-2 i Erickson Senior di 4-2.
INFORMASHON DI BEISBÒL I SÒFTBÒL
Fanátikonan di Deporte Kòrsou, bonochi i felis wikènt. Nos ta mei mei di novèmber i tin basta moveshon ainda den deporte. Awenochi ta Pichingolo kontra di Souax den wega number 4 di e play-off final di Sòftbòl Femenino Dòbel A ku tin un historial interesante. Nos ta kòrda na 1992 Stadion di SUBT tabata yen yen di fanátiko ku transmishon di Tele-Curacao kaminda Blue Angels a kibra un racha di 5 aña di Pichingolo. Hopi hende mes a bai wak Sòftbòl Femenino semper, espesialmente den play-offnan semi-final i final. Pichingolo ta dilanti 2-1 den e seri i un viktoria ta nifiká ku Pichingolo ta kampion. Si ekipo Souax gana lo tin un wega desisivo djasabra anochi. Tur wega ta tumando lugá na Sam Bunting Ballpark na Brievengat.
* * * * *
Den e dianan ku a pasa nos tabatin basta di historia di Pichingolo. Un historia impreshonante i nan ta rumbo pa di 40 título den Sòftbòl Dòbel A. Nos tin e historia di Pichingolo tambe ku ta rumbo pa 50 aña di eksistensia. Ata un pida aki ku nos a yega di entrevistá un dje gran dirigentenan di Pichingolo. “Na 1974 Pichingolo a bai Klase A i sali kampion. Na 1975 Pichingolo a subi Dòbel A i sali kampion di Kòrsou. Di einan a keda bira kampion 10 aña siguí. Nos a pèrdè e kampionato na 1986 ku Cardenales i na 1992 ku Blue Angels i sobra añanan tur ta kampion. Ke mèn, for di aña 1975 te ku awor ke mèn 30 pa 31 aña mas o ménos, dos aña so nos no a bira kampion. Tabatin aña ku nos a sali kampion i supkampion pareu. Pichingolo Kia i Pichingolo Nissan, segun mi ta dos biaha esei a sosodé.“ Entrevista di algun aña pasá promé ku pèrdè den final kontra di Soto.
* * * * *
Nos ta ban pa e wega di 50+ ku ta tuma lugá djasabra pa 2’or na Van Engelen Ballpark entre Jaws i Flamboyan Tigers. Si e wega para djasabra lo sigi djadumingu. Si tin wega i tin un ganadó, chèns ta grandi ku lo start final djadumingu mes. Tereno no ta konosí ainda. Djadumingu final di Liga 60 ta start entre Nos Tambe Por i Jaws pa di tantísimo biaha. Ekipo Nos Tambe Por tin 3 título sigí, miéntras ekipo Jaws tabata kampion na varios okashon. Un tempu Jaws tabata manda den 60+, despues ekipo Los Amigos a kue dos título i segidamente Nos Tambe Por a kuminsá dominá den Liga 60.
* * * * *
Kos ta kayente den Liga 40 ku dos seri empatá. E seri entre number 1 i dos, ta entre Baranka i Crazy Tigers. Baranka a gana e promé wega ku skor di 7-4 i despues Crazy Tigers a gana wega number 2 ku skor di 17-16.. Den e seri entre number 3 i 4, respektivamente Gamers i Swift, Gamers a gana promé wega ku skor di 10-3 i despues Swift a gana wega number 2, 6-0. Presensia di Emilio Velarde ya a resultá hungando den senterfield i bayendo di 3-2 ku dos kareda anotá. E picher Paiza Rosario a tira blankeo pa Swift den Liga 40. Ta mesun Paiza ku ta tira den ekipo Jaws den Liga 50 ku ta pendiente pa e último wega di semi-final djasabra awor. Wega mester a sigi ayeranochi, pero no ta parse ku wega lo por a sigi ku e awaseru ku a kai den oranan di atardi. E 4 ekiponan tin hungadónan resio ku ta dal e bala durísimo den Liga 40 anochi na Van Engelen Ballpark.
* * * * *
Djasabra tin entiero di e gran kabayero, èks picher, gran fanátiko i miembro di direktiva di e ekipo Catpower. Ta trata aki di Ronnie Rosa, un dje grandinan den karioki tambe. Bishita di kondolensia ta tuma lugá di 9’or pa 10.15’or na Kapèl Consolador na Brievengat. Un den grandinan di ekipo Catpower, Selikor i promé ku esei GGD, a bai laga nos. Nos konosé Ronnie Rosa for di tempu di Liga Sabana i Kopa Basora na komienso di añanan 80 na Sabana Ballpark. Wikènt aki no tin wega di 40+ Beisbòl, pero ta pendiente di un wega entre Sigi Hunga i Yesterday djadumingu awor den Liga 50 di Beisbòl. Ekipo Otrabanda ta na Medellin. Nos ta keda te aki pa awe i te djaluna ku Poder di Dios.
