Sin Strès a selebrá 5 aña di eksistensia i parti unifòrm nobo
WILLEMSTAD – Ekipo Sin Strès ku ta kompetí den Sòftbòl Femenino Veterano a selebrá 5 aña di eksistensia djadumingu 8 di yanüari 2023 na Aishel Hooi Ballpark. E ekipo a presentá i boutisá unifòrm nobo tambe. E selebrashon i boutismo a tuma lugá den oranan di mèrdia i den oranan di mainta tabatin un Santu Sakrifisio di misa na Misa di Soto.
Den oranan di atardi representante di spònser Dusron Contractors & Equipment B.V. a entregá simbólikamente e unifòrm na dirigentenan di e ekipo, Tanusi i Anoushka Delando. Tabatin un bolo tambe ku detayenan di Sin Strès ariba i ku a hala hopi atenshon. MC tabata Ashwin Macaay i representante di Dusron Contractors & Equipment B.V. tambe a dirigí palabra.
HISTORIA
MC Macay a pasa den historia di e ekipo ku a keda fundá 5 aña pasá pa rumannan Tanusi ku Anoushka Delando. E rumannan a aserká Gilbert ‘Gibi’ Henriette pa mas organisashon i maneho tékniko. E tim a partisipá promé den un torneo organisá pa Marlene Obispo di Liga Streanan di Ayera i bira kampion. Despues a funda Liga di Nos Tur na 2018 i e ekipo a bolbe bira kampion, naturalmente komo e promé kampion di e liga. E ekipo tin un título di Liga di Nos Tur, 2 biaha supkampion i un biaha na di 3 lugá.
Tambe dos biaha kampion di Torneo Internashonal di Sòftbòl Femenino Veterano na Aruba, entre otro kampion di e último Torneo Internashonal ku a tuma lugá na Aruba den luna di desèmber 2022. Dusron Contractors & Equipment B.V. ta e promé spònser ofishal di e ekipo ku a drei kasi 5 aña sin spònser ofishal. Ta pa medio di fundraising i kontribushon e ekipo tabata drei. Pabien na ekipo Sin Strès Dusron Contractors & Equipment B.V. i ‘que sigan los éxitos’.
Polis i Banco di Caribe a konfirmá nan partisipashon den 40+
WILLEMSTAD – Ekiponan a kuminsá konfirmá nan partisipashon den Torneo Survivors ku lo start djasabra 21 di yanüari na dos parke. Ekipo Polis 40+ i Banco di Caribe 40+ a konfirmá nan partisipashon i ta pendiente pa ekiponan di SDKK, SVB i Flow den e kategoría 40+ di Sòftbòl Komersial. Di 60+ ekipo Nos Tambe Por a konfirmá nan presensia i e organisadónan ta verwagt entre 6 pa 8 ekipo di 60+ den e torneo. Pa loke ta trata e parti di Soshal i Soshal Plus konfirmashon a drenta manera ta kustumber. Remarkable ta ku ta Baranka so a konfirmá den 50+ ku normalmente kasi tur ekipo ta partisipá. Dia 12 di yanüari, esta djaweps awor ta último dia pa ekiponan konfirmá nan partisipashon.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bonnochi. Nos ta den un siman kaminda ekiponan ta kuminsá move, kanando i hasiendo algun moveshon. Pa wikènt di 21 i 22 ya tin weganan di warm-up riba tereno i esei ta nifiká ku bo mester tin un pa dos training tras di lomba promé ku kuminsá ku torneo warm-up. Torneo Survivors/The Greatest ta start djasabra 21 di yanüari na Stadion Post 6 i Buena Vista Ballpark. By the way, pronto Buena Vista Ballpark lo haña un ‘face lift’ i pronto ta intenshon ta yama e kaya di e parke pa entrada di Auto Bus Bedrijf Curacao (ABC Busbedrijf), Kaya Pichingolo.
* * * * *
Despues ku nos a anunsiá algun retiro for di Jaws 60+, nos a risibí mas informashon, pero nos ta wanta un ratu. Tin algun hungadó malkontentu apesar ku e ekipo a kaba di bira kampion, pero ta e direktiva mester aktivá i pone un reunión i pone e kosnan stret promé ku mas hungadó bai. Ekipo Jaws ta bai haña dos dje grandinan ku yegada di Remick Bernadina i Tyron de Palm. Hungadónan manera Rudsel Wilson, Fransje Lambertina i Rudsel Schmidt lo baha man un tiki na 50+ i lo bai dediká mas na 60+. Ekipo 50+ di Jaws ku a bira supkampion lo bai tin hopi refuerso den 2023.
* * * * *
Ekipo Jaws 50+ lo drecha nan defensa hopi den 2023, espeshalmente den infield. Tin informashon ku Marvin ‘’Pin’ Wijman lo pasa di Ban Serio pa ekipo Jaws. No ta konosí ku Mayron Wijman, ruman di Pin, lo bai Jaws òf lo pasa pa ekipo Marlins. Ekipo Marlins a mustra interes den Mayron Wijman ku te ainda ta den gran forma den short, tremendo spit na base i gran defensa. Ekiponan di 50+ a kuminsá mobilisá pendiente Torneo The Greatest. Jaws ta tras di 3 grandi ku ta na kaminda pa kumpli 50, esta Kelvin Winklaar, Eldred ‘Sabalo’ Estanista i Jair Josepha. Parse ku e pase di Jair Josepha ta sigurá kaba i ta pendiente pa Kelvin Winklaar i Sabalo Estanista. Tur e 3 hungadónan aki ta huntu ku Baranka den Liga 40. Baranka ta pendiente pa hunga final di Liga 40 kontra e ganadó di Gamers i Crazy Tigers. No ta konosí ainda ki dia e semi-final i final aki ta tuma lugá. Ta trata di play-off di 2022 ku a keda suspendé pa motibu di awaseru i mal estado di tereno.
* * * * *
Nos ta bai un ratu pa Little League. Torneo Fundashon Akademia di Beisbòl Brievengat (FABB) a start den gran forma djabièrnè ku wega entre ekiponan Montanja Abou i Montanja Ariba. E torneo a start ku un tremendo desfile enkabesá pa brassband. Mester a wanta e desfile un ratu, debí ku un palu di awaseru a kai. Despues awaseru a wanta bon a sigi desfile, seremonia i homenahe na sr. Roland ‘Gengoe’ Hooi a sigi. Tabatin palabra tambe di e dirigente mayor di Akademia di Beisbòl Brievengat ku ta Ernst Meyer, representante di Minister di Deporte sr. Errol Bishop i naturalmente Gengoe Hooi ku a konta vários anekdota i parti di su historia. Den e dianan benidero nos lo tin e biografía di Gengoe Hooi ku ta basta largu. Gengoe Hooi ta un di esnan ku tabata previlegio di bai Springfield College pa tuma klínika di Beisbòl den añanan 70 i komienso di añanan 90. Gengoe Hooi a bai Springfield College na 2 okashon.
* * * * *
Miéntras tantu Liga Pabou a sigi ku su partidonan normal di Little League. Fundashon Akademia di Beisbòl Brievengat por komprondé ku ekiponan di Liga Pabou i dos organisashon di Liga Pariba no a partisipá, debi ku ta den 3 dia a traha riba e torneo ku a konosé mas spònser ku nunka. Den dianan benidero nos lo tin resultadonan. E torneo ta dura 3 siman i weganan lo tuma lugá na Sam Bunting Ballpark, debí ku por lo pronto lo no por tin masha aktividat na Van Engelen Ballpark ku te ainda ta saturá pa motibu di fuerte awaseru i awaseru a sigi kai den wikènt. Djaluna 9 di yanüari pa tabatin entrega di masha material di beisbòl na tur organisashon di Little League. RBC Royal Bank spònser number 1 i ofishal di Little League, sra. Crisma Henriquez i Gobièrnu di Kòrsou a entregá e materialnan na dirigentenan di Little League den presensia di District Administrator i direktiva di e 3 liganan di Kòrsou. Nos ta keda te aki pa awe.
