Torneo 60+ dediká na Kid Boca Chica e wikènt aki
WILLEMSTAD- Djasabra 1 di aprel 2023, Torneo Kid Boca Chica organisá pa Jaws kategoría 60+ ta start. E torneo ta dediká na Ivan Schoobaar alias Kid Boca Chica, un dje grandinan di tur tempu di Slowpitch. E torneo lo tuma lugá den Frank Curiel Ballpark. E 8 ekiponan di 60+ ku ta partisipá den e torneo ta repartí den dos pul. Ekiponan number 1 di kada pul ta pasa pa final, miéntras number 2 ta hunga kontra otro pa di 3 lugá. Ekiponan Jaws, Pitufos, Los Amigos i Lions ta den Pul A. Nos Tambe Por, Sluggers, Curaçao Super Stars i Nos Power ta den Pul B. E torneo lo hunga 1 i 2 di aprel, 15, 16 di aprel. Wikènt di 8 i 9 di aprel no tin wega.
KOMUNIKADO
Nos a risibí un komunikaso ofishal di Jaws. Aña pasá nos organisashon S.B.C. JAWS 60+ a organisá e promé edishon di e torneo di Sòftbòl “Kopa Rotativo Ivan Schoobaar”. E torneo aki ta keda organisá anualmente pa por duna honor na bida na e fundadó di e diferente ekiponan di Sòftbòl bou di nòmber di Jaws ku ta praktiká e ramo di deporte aki den kuater kategoria di edat. Pues sr. Ivan Schoobaar a fundá ekiponan bou di e nòmber di JAWS ku ta praktiká Sòfbòl den liganan di kategoría di Hóben Adulto, Liga 40 plus, Liga 50 plus i Liga 60 plus.
Meta di e torneo aki ta tambe pa duna oportunidat na ekiponan di Sòftbòl Liga 60+ pa “warm-up” promé ku kampeonato kuminsá i stimulá moveshon i kompetensia sano entre e sòftbòlistanan di mayor edat i pa estrechá e lasonan di amistad deportivo. E aña aki nos lo organisá e di 2 edishon di e torneo aki.
SKEDJEL
Djasabra 1 di aprel pa 10.00 Jaws - Lions; 12.00 Nos Tambe Por – Nos Power; 14.00 Pitufos – Los Amigos; 16.00 Sluggers - Curacao Super Stars. Djadumingu 2 di aprel: 10.00 Los Amigos – Jaws; 12.00 Lions – Pitufos; 14.00 Sluggers – Nos Tambe Por; 16.00 Nos Power - Curacao Super Stars.
Unidos i Tur Goso a gana den Liga Streanan di Ayera
WILLEMSTAD- Djadumingu 26 mart Liga Deseo Streanan D’ayera a sigi i manera ta tur djadumingu tin un wega ku ta impaktá. Den e promé wega kaminda Unidos a enfrentá Golden Girls, apesar ku e skor kaminda Unidos a gana 6 pa 2 di Golden Girls, tabata un wega di bon bringa riba nivel. Pa Unidos 6 kareda 7 hit i 2 eror. Mihó bateadó tabata Marien Windster ku a bai di 2-2 i Dulce Petronilia di 1-1. Picher ganadó a resultá Dulce Petronilia. Pa Golden Girls 2 kareda, 5 hit i 2 eror. Jacqueline Bernadina a bai di 1-1. Picher pèrdèdó a resultá Mairis Obispo.
E di dos wega a bai entre Eureka i Tur Goso, un wega kaminda Eureka a lucha te na último momentu, pero mester a mira kon nan a keda den tereno na momentu ku Tur Goso a nota e kareda pa laga nan den tereno ku 2 kareda pa 1. Tur Goso 2 kareda, 5 hit i 3 eror. Natasha Mercelia, Joyceline Arnhem i Anella Baromeo, tur a bai di 1-1. Picher ganadó tabata Murielle de Jongh. Pa Eureka 1 kareda, 3 hit i 4 eror. Eunice de Aquino, Joyceline Green i Ivette Smith tur a bati di 1-1. Maudrith Faneyt a resultá e picher ku a pèrdè.
Siguente weganan lo ta 2 april:
3’or Eureka v/s Golden Girls;
4:30’or Unidos v/s Treasure Pluss.
Promé ku e weganan di Liga lo tin weganan di Pony League U6 ( T-ball).
INFORMASHON DI SÒFTBÒL I BEISBÒL
Fanátikonan di Deporte Kòrsou, bondiA Liganan a kuminsá mobilisá pa e kampionato ofishal. Siman pasá tabatin reunion di Liga 50 ku ta bai start den Stadion Post 6 pa promé biaha den nan historia. Liga 50 a opta pa no warda te ora Torneo Hope terminá di manera ku por hunga dos buelta trankil sin mester terminá den desèmber. E último dos añanan Liga 50 a terminá den luna di desèmber i pa kolmo no a hunga 18 wega durante kampionato regular. E último dos añanan a hunga un buelta di 8 wega sigí pa di dos buelta di 4 wega, ke mèn 12 wega en bes di 18 wega pa temporada i asina mes tabata terminá den luna di desèmber. Ofishalmente Liga 50 ta kuminsá dia 8 di aprel na Post 6. Nos tin algun kambio grandi pa loke ta trata Liga 50 den 2023.
* * * * *
Johnny Balentina, Eddie Obispo i Bibi Gonet a pasa di Pitufos pa Marlins. Hellary Plantijn ku den 2021 a hunga ku Pitufos i pasa den 2022 pa ekipo Jaws, a pasa bèk pa PItufos. Mayron Wijman a pasa di Ban Serio pa Baranka, Farley Lard a pasa di Ban Serio pa Catpower. Gilbert Henrietta di Baranka a bai bèk Marlins. Marlins a haña tambe e hungadó Aldrin Visers, Bryan Esclodina i Jurgen Susanna di ekipo Artemisia ku ta den problema serio pa yega sikiera 20 hungadó pa start kampionato. Ekipo Catpower bèk den man di Teti Chirino i ta basta hungadó ta rumbo pa Catpower. Parse ku Jair Josepha no a bai Ban Serio ainda i ta rumbo pa Jaws. Kampionato 50+ interesante i pa promé biaha lo bai start na Post 6 manera ariba menshoná i lo hunga mas ku un luna den Stadion Post 6.
* * * * *
Torneo Kid Boca Chica pa ekiponan di 60 ta start e wikènt aki na Frank Curiel Ballpark. Nos a kere ku ta wikènt pasá. Nos tin e skèdjel i mas detaye di e torneo den e artíkulo. Den dianan ku a pasa nos tabatin basta detaye di e torneo i den kurso di e siman aki nos a risibí e komunikado ofishal. Aña pasá tabata Pitufos ku a debutá den Liga 60 i sali kampion den e promé torneo ku nan a partisipá. Tur 8 ekipo di Liga 60 lo partisipá na e torneo aki i despues di e torneo aki lo tin Torneo Lions ku tambe ta di Liga 50. Nos ta drenta luna di aprel wikènt benidero i ta hopi moveshon tin. Varios ekipo lo move pa Punta Cana den luna di mei pa e torneo di Karibe. Ekiponan Jaws, PItufos i Baranka di Liga 50 lo ta na Punta Cana. Ekiponan Pitufos i Nos Tambe Por den 60+ lo ta na Punta Cana. Torneo ABC 50+ ta na Boneiru i einan ekiponan Ban Serio i Marlins di Kòrsou ta partisipá. ABC&S di e hóbennan ta na Kòrsou organisá pa Swift i Terremoto.
* * * * *
Ta solamente 5 tim ta partisipá den Kopa ABC&S na Boneiru. Ekiponan Marlins i Ban Serio di Kòrsou, Dragons di Boneiru, Tigers di Sint Maarten i Astros di Aruba. Straño si, debí ku tin hopi mas tim di 50+ di Boneiru. Nos ta bai chèk un ke otro pa ta na altura di kiko a pasa ku solamente un tim di Boneiru ta partisipá. Na momentu ku tin un torneo 50+ semper e tim lokal tin entre 2 pa 4 tim ku ta partisipá. Ekipo Flamboyan di Kòrsou tambe tabata den plan, pero a wanta un ratu. Pasashi i estadía ta bastante karu na Boneiru tambe. Ultimo tempunan hopi ekipo ta bai Colombia pa weganan di fogeo òf pa keiru.
* * * * *
Torneo Hope a start den gran forma djasabra último ku varios wega na Van Engelen Ballpark. Nos tabatin resultado di varios wega. Skèdjel pa e próksimo dos simannan a sali. Djabièrnè awor dia 31 di mart, djasabra dia 1 i 2 di aprel weganan ta sigi. E sigiente wikènt lo no tin wega riba Bièrnè Santu, pero si riba djasabra i djadumingu ku ta Pasku di Resurekshon tin wega. By the way, Kopanan ABC riba nivel di tereno ta sintiendo efekto di e Kampionato di Karibe (Punta Cana) ku a skohe pa hunga riba fechanan alrededor di Ascension.
