Torneo Hope 2023 ta sigi den gran forma wikènt 1 i 2 di aprel na Van Engelen Ballpark
WILLEMSTAD- Torneo Hope 2023 organisá pa Van Engelen Ballpark Foundation a start djasabra 25 di mart na Van Engelen Ballpark. E wikent aki ta sigi ku vários wega tantu riba djasabra komo djadumingu. Nos tin e skema di wikènt 1 i 2 di aprel. Djasabra 25 di mart tabatin apertura ofishal di Torneo Hope 2023.
Despues di algun wega den diferente kategoría tabatin e apertura ofishal ku presensia di Minister di Enseñansa, Siensia , Kultura i Deporte, Sithree van Heydoorn. Dirigentenan di Van Engelen Ballpark Foundation tambe a dirigí palabra na e apertura ku tabatin un tremendo show den presensia di fanátikonan. Representante di ekipo i empresarionan partisipante tabata presente na e apertura i tabatin un tremendo show di kandela ku a hala hopi atenshon. Agrupashon musikal Rydym a animá djasabra na van Engelen Ballpark. Nos tin algun resultado i pòtrèt di djasabra 25 di mart na van Engelen Ballpark.
Resultadonan:
KPC 8, CRU 4 (40+);
CITO 8, Selikor 6;
Kustwacht 14, SBAB 7;
Omni 16, Selikor 11;
APC/ITC 13, DNCP 2;
Keyfin/Pinnacle 9, Guardian Group 5;
SBAB 18, Banco di Caribe Ennia 9;
KPC 14, ACU/SDKK/MEO 2;
CPA/Fraal 16, VKC 15;
Damen/PBC/TMC 13, Mac Donalds/EWT/Centrum 8;
The New Radiator 19, Blacksox 9;
Bala Brothers/Sint Jacoba 18, Among Us 14.
INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis siman. Torneo Hope a ranka sali wikènt pasa kargá ku ambiente. Torneo Hope a start den gran forma na Van Engelen Ballpark. The Diamond Stars League i Liga Streanan di Ayera a sigi den wikènt na Sam Bunting Ballpark.
* * * * *
E aña aki segun nos tin ménos ekipo den Torneo Hope. Tabatin aña ku nos a yega kasi 90 ekipo den Torneo Hope. Nos no a mira e klase Challenger den Torneo Hope. En todo kaso ambiente bai gol den e dianan benidero ku mas informashon di Hope 2023. Masha tempu nos no a tende nada di kampionato 40+ di Aruba. Beisbòl Veterano 40+ na Aruba yamá Baseball Classico tabata den gran forma na aña 2016 bin ariba. Aruba a bira un biaha kampion di Beisbòl Veterano di Reino na 2019 na Aruba mes. Kòrsou a gana mayoría di e torneo di Beisbòl Veterano di Reino i te ainda niun ekipo no tin dos título di Torneo di Beisbòl Veterano di Reino. Miéntras tantu dos ekipo 50+ di Hulanda, esta Legends i probablemente Attack lo bini medio di novèmber na Kòrsou pa Torneo di Reino 50+. Pa loke ta 40 di Reino nos no a tende nada mas. Ekipo Attack tabata armando un bòm pa bai hunga na Aruba.
* * * * *
Ban pa MLB un ratu. Djaweps kampionato di MLB a start. Despues di World Baseball Classic hopi komentario pa loke ta e nivel di e Haponesnan i e nivel di MLB. Naturalmente MLB su nivel ta un tiki mas haltu ku e Liga Hapones na nos opinion. Hapon a gana 3 di e 5 World Baseball Classic ku a keda organisá. Hapon tin mas disiplina i e formamentu di selekshon ta bai otro, e mihónan ta bai. Na USA no ta e mihónan ta bai, pero esnan ku ta deseá di bai. Hopi hungadٕٕó super estrea no ta bai pa sinta banki tampoko. Hapon tin mas disiplina tambe i nan ta keda ku e Beisból básiko i pone ku otronan tambe mester hunga e Beisbòl básiko. Merka no a bai ku su tòp pichernan.
* * * * *
Hapon tambe ta hunga e Beisbòl analítiko, pero nan ta hunga hopi ku sentimentu tambe. Ke mèn, loke e manager ta sinti na e momentu ei. Den kuart final Shohei Otani a pone toke i brua tur wega di Italia. Mester apuntá tambe ku den e selekshon di Hapon tin algun hungadó di nivel hopi haltu. Práktikamente tur picher den e wega final tabata tira riba 95 mia ku hopi variashon di lansamentu. Hunga Beisbòl na Hapon òf yega den e Beisbòl di Hapon ta mas fásil ku yega òf hunga den MLB.
* * * * *
Ban bèk pa Torneo Hope ku a start den gran forma djasabra sigi pa algun bon wega den wikènt. Djasabra tabatin apertura ofishal den presensia di Minister di Enseñansa, Siensia, Kultura i Deporte, sr Sytree van Heydoorn i dirigentenan di Van Engelen Ballpark. Tabatin un tremendo show di kandela kaminda algun eksperto a duna un show tur afó. Representante di ekiponan tabata presente durante e apertura ofishal naturalmente. Despues di e apertura weganan a sigi i den e artíkulo nos tin resultado di algun wega ku a tuma lugá.
* * * * *
By the way, Beisbòl Veterano (Baseball Classico) di Aruba ta ON i lo start pronto. Beisból Dòbel A (FEBEKO) tabatin un anochi spesial di premiashon ku lo tuma lugá djabièrne 31 di mart na Landhuis Brakkeput Mei-Mei. Durante di e anochi a premiá e hungadónan ku a destaká durante di aña 2022. Nos a risibí algun portrèt. Beisbòl Little League ta pendiente pa firma kontrakt pa 2023 ku RBC Royal Bank. Play-off ta start dia 26 di aprel na Frank Curiel Ballpark. Nos ta keda te aki pa awe.
