Torneo The Greatest lo start dia 21 di yanüari
WILLEMSTAD- E tradishonal Torneo Warm-Up The Greatest lo tei bèk despues di dos aña di ousensia. Invitashonnan a sali djamars 3 di yanüari pa ekiponan. E torneo ta start dia 21 di yanüari i terminá 11 di febrüari na Van Engelen Ballpark. Torneo The Greatest ta organisá pa Sòftbòl Klup Survivors, The Greatest i Baranka. Dia 21 e torneo lo start na Buena Vista Ballpark i Stadion Post 6. E siguiente wikèntnan lo ta na Van Engelen Ballpark. Pa promé biaha lo tin ekiponan di 60+ i Komersial 40+, huntu ku Maskulino Soshal Komersial, Liga 50+ i Maskulino Soshal Komersial Speshal.
Ta trata aki di e di 10 Warm-Up Tournament organisá pa Survivors/The Greatest Umpire & Scorer Crew. Ekiponan interesá por inskribí pa mas tardá dia 12 di yanüari 2023 via email organisashonthegreatest@hotmail.com, òf via dirigentenan manera Marlon Paz, Wendell Anthony i Darlene Davelaar. Keda pendiente pa mas detaye di e torneo den dianan benidero.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis wikènt. Aña nobo a dal adén i nos a risibí konfirmashon ku Torneo The Greatest ta sigi normalmente e aña aki. E torneo ta start dia 21 di yanüari i terminá dia 11 di febrüari na Van Engelen Ballpark. E torneo ta terminá na Van Engelen Ballpark, pero den e promé wikènt lo tin weganan riba otro parkenan manera Buena Vista Ballpark i Stadion Post 6. E aña aki nos a ripará ku e kategoría di 60+ a bini aserka i e kategoría di 40+ Komersial. Aña pasá pa promé biaha tabatin Torneo 40+ Komersial ku a bira un éksito rotundo. Den Torneo Hope a start ku e kategoría aki i despues e fundashon SIPS tambe a organisá 40+.
* * * * *
Empresa i instansianan manera Polis, MCB, Flow, SDKK sigur lo ta den e aña aki atrobe, miéntras Aqualectra, SVB i èks trahadónan di Isla tambe ta pendiente pa djòin. Banco di Caribe/Ennia ta kargá ku hungadónan 40+ i tambe lo djoin pa yega entre 6 pa 8 ekipo den e kategoría aki. Polis a bira kampion di e Torneo Hope, miéntras SDKK a gana Torneo SIPS. Den artikulo nos tin mas detaye di e torneo i e kategoría aki.
* * * * *
Liga 60+ ku a drei na 2022 ku 8 ekipo, tambe ta invitá pa partisipá den e torneo aki. 60+nan tambe ke warm-up pa por start kampionatonan. Temporada 2022 tabatin 2 torneo promé ku start kampionato di 60+. Tabatin e torneo dediká na Kid Boca Chica organisá pa Jaws den luna di aprel i den luna di mei tabatin e torneo organisá pa ekipo Lions. E aktual kampion di 60+ ta Jaws, pero Nos Tambe Por ta moviendo rápido pa logra e título bèk. Aña pasá tabata e ekipo revelashon di 60+ Pitufos ku den nan promé torneo a logra gana Torneo Kid Boca Chica i despues tabata ekipo Nos Tambe Por ku a gana Torneo Lions.
* * * * *
Nos a bai bèk den tempu 3 aña pasá i a wak e kambionan ku tabatin den Liga 50+. Galbao Boekhoudt a move di Marlins pa Ban Serio den 2020. 2022 Galbao a bai Marlins bèk i lo tei ku nan den 2023. Marlon Noor e aña ei a bai for di Marlins i bai den Pitufos. Winston Kirindongo a keda den Ban Serio na 2018/2019, despues ku ela bai den Pitufos un ratu den Torneo The Greatest i bati masha hopi homerun mes. Winston Kirindongo pa 2023 probablemente lo bai reforsá e outfield di ekipo Nos Tambe Por den 60+. 2020 Kenny Hellement tabata kla pa subi ku Baranka, pero Covid a dal adén i Kenny a subi despues na 2021 i bira kampion den 2021 i 2022 tambe. Catpower a reforsá e tim bon den 2020, pero den 2021 masha hopi hungadó a move. Den 2022 varios a bini bèk despues di hopi moveshon di Nonnie de Roon, pero parse ku Nonnie de Roon lo hala kita bai laga Catpower atrobe.
* * * * *
Lions a djòin Aqualectra den 2020 ku a resultá un tremendo moveshon ku a salba e ekipo. Nan a move bon den 2021 i klasifiká pa play-off. Den 2022 no a bai dje bon ei. Parse ku tin moveshon duru den e ekipo den 2023. Ban pa Beisbòl di Kòrsou un ratu. Moveshonan ta sigi tuma lugá pa Seri del Caribe ku lo tuma lugá na Caracas di 2 pa 10 di febrüari den Estadio La Rinconada. E ekipo Caimanes de Baranquilla lo bai pa defendé nan título den 2022. Ekiponan ku a partisipá ta Colombia, Cuba, Kòrsou, Meksiko, Panama, Puerto Rico, República Dominicana i Venezuela.
* * * * *
Nos problema ta picheo, pero bateo i defensa ta parse OK. Naturalmente mester kuminsá train for di den yanüari aki pa ta den forma. Ta un luna falta pa start ku e torneo popular aki. Nunka nos no a pensa pa yega dje leu ei ku nos Beisbòl. By the way, pa promé biaha Kòrsou a yega na number 33 di Mundu den Beisbòl. Na 2012 nos tabata na 75 di e ranking. Ta World Baseball Softball Confederation (WBSC) a publiká e ranking aki dia 31 di desèmber 2022. Nos ta keda te aki pa awe.
