Ultimo weganan Amstel Bright Premier Cup wikènt benidero playoff a start djaweps 16 di mart
WILLEMSTAD- Ekiponan di Sòftbòl Komersial i Soshal ta kla pa play-off den Amstel Bright Premier Cup wikènt benidero. Djaweps 16 di mart e play-off a start ku 3 wega. Tambe tin play-off di kategorianan 50+ i Modified huntu ku e divishonnan ariba menshoná.
Djadumingu ta gran final den 6 diferente kategoría. Weganan pa klasifikashon tabata realmente kayente siman pasá den práktikamente tur kategoría. Nos tin resultadonan di wikènt pasá, standing final den e pulnan i skèdjel di weganan di play-off i fin di wikènt benidero. Nos tin resultado tambe di e 3 weganan di play-off ku a tuma luga djaweps 16 di mart. Banco di Caribe a gana CITCO ku skor di 9 pa 8, SBAB (1) a gana di Renaissance 8 pa 7, i den e ultimo wega ekipo SBAB (2) a derotá MCB 8-4. E tres weganan riba menshona tabata di Soshal Corporate.
MAS INFORMASHONNAN DI SÒFTBÒL I BEISBÒL
Fanátikonan di Deporte Kòrsou bon dia. Awe nos tin resultadonan di weganan di fin di siman di Amstel Bright Premier Cup ku a tuma lugá na Van Engelen Ballpark. Play-off a start djaweps na e parke menshoná den e kategoríanan. Den e skèdjel pa wikènt awor dimes nos por mira ekiponan ku a klasifiká. Kandela ta bai tin e wikènt aki, e Amstel Bright Premier Cup ta terminá djadumingu awor ku final den 6 kategoria.
* * * * *
Miéntras tantu sorpresanan ta sigi kai den World Baseball Classic. Ekipo Inglatera (Gran Bretania) a sorprendé Colombia ganando ku skor di 7 pa 5 djaluna den oranan di atardi. Colombia tabata mustra kómodo despues di a gana un grandi, esta Meksiko. Den mesun grupo Meksiko a gana di USA djadumingu ku skor di 11-5. Canada a gana Inglatera 18-8 pa nòkout den 7 inning. Su sigiente dia Inglatera (GBR) ta bira gana di Colombia. Tene kuenta ku e sigiente World Baseball Classic ta 2026 despues di 3 aña. Na promé instante tabata e intenshon pa organisá World Baseball Classic kada 3 aña. Hapon a gana na 2006 i 2009, República Dominicana na 2013. USA a gana na 2017. Hopi a bisa ku si USA no a logra gana na 2017 lo a para e WBC i no hunga esaki mas. Finalmente ekipo Republica Dominicana a keda afó. Den e pul aki Venezuela i Puerto Rico ta sigi. Den e otro Pul Meksiko i USA bai. Djabièrnè ta Puerto Rico kontra Meksiko i djasabra ta USA kontra Venezuela. Aya banda Cuba i Hapon ta den semi-final wardando nan kontrinkante.
* * * * *
E hungadónan di MLB ta hunga pa nan pais ku un amor i un pashon ínkreibel. Bo wak e hungadónan di paisnan Latino kon nan ta hunga pa nan pais ta un kos hopi serio. Bala pena wak e weganan di World Baseball Classic aki kaminda ta real un kampionato Mundial di Beisbòl. Hopi ta skohe pa hunga pa un pais di nan tata, mama i wela pa duna algu bèk na nan grandinan. Hopi ambiente mes tin den e stadionnan Chase Field na Arizona i Loan Deport Park na Miami (ántes Marlins Park). Latinonan ta mas tantu ku e Merikanonan den e stadionnan. Sigidónan di Beisbòl ta wak e WBC aki ku smak. Lástima mes ku selekshon di Hulanda a kai afó i stroba mas showcase pa nos hungadónan ku no tin un kontrakt ainda, manera Profar, Simmons i Gregorius.
* * * * *
Miéntras tantu kampionato di Little League a sigi riba parkenan na Kòrsou, pendiente pa terminá e kampionato regular e luna aki pa den aprel start ku play-off. Kuerpo tékniko di e selekshonnan di Liga Pariba ta konosí i den dianan benidero nos ta pendiente pa nòmber di e coachnan. Liga Pabou tambe a nombra nan kuerpo tékniko parse. Aña pasá Pabou a gana den 4 divishon i Pariba den un divishon. Pariba a gana den divishon Minor. Pabou a gana den divishonnan Little, Junior, Intermediate i Senior. Kòrsou a logra titulonan regional den Little, Junior i Intermediate. Den Senior tabata e mihó selekshon kargá ku prospektonan i einan nos no a logra yega final. Kòrsou a bira kampion internashonal den Little i supkampion Mundial den e kategoría aki.
* * * * *
Aktualmente Beisbòl Veterano Kòrsou (BEVEKO) no tin direktiva. E direktiva enkabesá pa Shendy Cras a baha despues di e reunion general di djarason último. Tur ekipo tabatin representante na reunion ku esepshon di un ekipo. Representantenan di 50+ tambe tabata presente na e reunion. Parse ku ekipo Azucar ta pendiente pa organisá un torneo warm-up pa ekiponan di 40+ i 50+. Ekipo Azucar a konosé algun kambio drástiko, entre otro General Manager i Manager. General Manager òf mihó bisá Presidente ta Thierry Goeloe i Manager ta Clarck Zalm. En todo kaso Beisbòl Veterano ta mal pegá na e momentunan aki faltando mas o ménos 1 luna i mei pa kampionato start. Tin tempu ainda i ban spera ku tin algun alma/dirigente ku ta dispuesto pa yuda Beisbòl Veterano den 2023. Tabatin rumor ku sra. Xiomara Sedney, skorer, lo a bin ku su crew, pero nos no a tende nada mas.
* * * * *
Nos tin skèdjel di Amstel Bright Premier Cup den nos artíkulo. Ekipo Swift lo ta bèk e wikènt aki, despues ku siman pasá nan tabata na Medellin pa Spring Training i pendiente pa organisá Torneo Hope 2023 huntu ku Van Engelen Ballpark Fundation. Wikènt benidero lo tin tambe wega di The Diamond Stars League, esta Sòftbòl Veterano aya na Sam Bunting Ballpark i djadumingu tin 50+ Femenino Liga Streanan di Ayera. Nos ta keda te aki pa awe.
