Vários ekipo a inskribí pa Torneo The Greatest e siman aki
WILLEMSTAD- Ekiponan a kuminsá inskribí formal e siman aki pa partisipá den Torneo The Greatest/Survivors. Ekipo Nos Tambe Por, Jaws, Los Amigos i Sluggers a inskribí pa partisipá den e kategoría 60+. Ekipo Flow a djòin Banko di Caribe/Ennia i lo bira kompetensia fuerte pa ekipo Polis ku ta e kampionnan di Torneo Hope 40+. SDKK tambe a inskribí pa 40+ Soshal.
Ekiponan ku a konfirmá ta Soshal Maskulino; Coca Cola, BDC, Cpa/Fraal, Brandweer, Selikor, Renaissance, Sbab, ADC. Soshal Speshal, The New Radiator, Quick 60, Chonchies, APC, The Fire.
60+: Sluggers, Jaws, Nos tambe Por, Los Amigos, den COED nos tin. Guardian Group,SOAB, ADC Lab de 40+ Soshal ta Polis, SDKK, Flow / BDC I ta pendiente ka CRU.
50+ tin Jaws, Sluggers, Baranka. Organisadónan Survivors ta pendiente un ekipo mas di 50+.
INFORMASHON DI SÒFTB0L I BEISBÒL
Fanátikonan di Deporte Kòrsou, bondia. Den siman nos a risibí notisia tristu ku dos grandi den Little League a bai laga nos na komienso di siman. Djaluna nos a risibí e tristu notisia ku Victor Elhage tremendo pelotero i dirigente a bai laga nos ku 85 aña. Otro grandi ku di Beisbòl, espesialmente di Little League, ku a bai laga nos ta Eusebio ‘Chebu’ Juliana. Chebu Juliana gran manager i coach di Little League a fayesé djaluna ku 93 aña. Ta tata di rumannan Richenel ‘Nelo’ Juliana, Oswin ‘Chicho’ Juliana i Sharlon Juliana. Chebu a para na kabes di hopi selekshon eksitosamente den su karera i algun aña pasá tur hungadó ku a pasa bou di Chebu a bini huntu i organisá un homenahe simpel pe. Chebu a biba simpel i keda un hòmber simpel semper. Entiero di Victor Elhage tabata djasabra 14 di yanüari i entiero di Chebu Juliana ta djaluna 16 di yanüari.
* * * * *
Pa loke ta trata Victor Elhage, hopi di esnan di awendia no sa ku Victor tabata un tremendo hungadó di Beisbòl tempu di su tempu i ku a hunga den vários selekshon. Victor a bira hopi konosí pa su trabou komo District Administrator pa hopi aña. Eksitonan grandi di komienso di añanan 2000 bin ariba den Little League tabata bou di maneho di Victor Elhage. Victor a keda tres aña den direktiva di little League international ku sede na Williamsport. Kampionato di T-Ball/Pre Minor ta nombrá na Victor Elhage. Victor Elhage tabata District Administrator DA for di 1988 te ku 2015, ke mèn 27 aña, 28 temporada.
* * * * *
Temporada 2005 nos a entrevistá Victor Elhage i ela a bisa nos ku Little League a start na aña 1969/1970 i e tabata player agent e tempu ei. Errol Cova tabata e promé presidente Little League. Little League a drei dos aña ku tiki tim. Despues di dos aña Little League a bai riba un rust. (Little League di Kòrsou a haña suspenshon e tempu ei i Victor Elhage no kier a bai den detaye di e motibunan ei.). Dia nos a papia ku Victor e no a bai masha den detaye di e tempunan ei.
Na fin di 1974 Eddie Martina ku tabatin Little League basta na pechu, a aserká defuntu Boy Tweeboom pa start ku Little League atrobe. Tabatin Eddie Martina, Eddie Simmon i Boy Garcia (QEPD) tambe a bini despues di algun luna. Victor tabata tei den direktiva nobo di Curacao Little League di aña 1974. Defuntu Boy Tweeboom huntu ku su direktiva tabatin un fundeshi hopi fuerte i nan a sigi traha te ku awe. Na aña ‘80 Victor Elhage a bira presidente di Little League i na 1988 District Administrator. Ke mèn, Victor Elhage tabatin 41 aña sigí komo dirigente di Little League i despues e mes a baha pa traha lugá pa Urny Floran ku a risibí bon coaching di Victor promé ku e asumí e puesto. Victor ta tata di Naguib Elhage ku un tempu tabata manager di Santa Rosa Indians i ta biba na Aruba. Kondolensia i forsa na famianan di tantu Victor Elhage komo Eusebio ‘Chebu’ Juliana.
* * * * *
Ekiponan grandi di Beisbòl Veterano manera ekipo Quality Stars i Santa Maria Pirates ta moviendo sin fin atrobe. Ta ekiponan kampion i supkampion di Beisbòl Veterano temporada 2022. Quality Stars lo haña entre otro Luigi Alvarez, gran batiadó i fileadó ku a yega di bira kampion bate den Beisbòl Dòbel A. Luigi Alvarez ta outfielder i na 2022 e tabata manager di Wild Cats Hubenil. Ekipo Vosama lo presentá ku un dream team parse ku vários hungadó ku tabata den selekshon Senior League di 1999. Entre otro Riëncy Imperator, Gideon Sambo, Andley Simmons, ets. Archie Jansen ta bai kumpli 40 aña i tin indikashon ku Verney Jansen lo lanta un tim den Beisbòl Veterano i su ruman Archie Jansen lo djòin e tim ei banda di Wild Cats ku lo keda Archie su ekipo prinsipal.
* * * * *
Parse ku Merieldo Trinidad ta agente liber i lo no ta ku Quality Stars den 2023. Vários tim interesá den e super hungadó aki ku tin tremendo spit i poder. Yurendell de Caster lo stòp ku Beisbòl Dòbel A i ta na kaminda pa ekipo Quality Stars. Hopi hungadó di Hulanda ku tin 40 aña ta interesá di hunga Beisbòl Veterano na momentu ku nan ta na Kòrsou. Nan a bisa nos, ‘Den hasta Dòbel A un hungadó di Hulanda por bin hunga aki i hungadó ku no ta Yu di Kòrsou’. Nos ta keda te aki pa awe.
