ABC&S eksitoso i Alexander Rodriguez MVP di final
WILLEMSTAD- E torneo ABC&S ku a tuma lugá di djarason 28 di mei pa djadumingu 1 di yüni tabata un éksito kompletu. Ekipo Swift di Kòrsou a gana Redskins di Aruba 7 pa 2 den e gran final pa bira kampion di e torneo. Ta di 14 biaha ku Swift ta bira kampion di e kompetensia. Alexander Rodriguez di Swift ku a picha den e wega final a bira MVP di e final.
Un públiko grandísimo tabata presente pa wak e wega final i durante henter e torneo Van Engelen Ballpark tabata karga ku fanátiko. E aña aki tabata e di 39 kampionato ABC&S den e historia di e torneo ku a tuma lugá. Na 1984 e torneo a start i añanan 2020, 2021 i 2022 no tabatin e torneo debi na Covid.
E torneo a start komo Kopa Antiyano di Bush League entre Terremoto i Astros. Despues a bira Kopa ABC na momentu ku Boneiru a djòin. Despues Sint Maarten a djòin i último añanan ekipo di Sint Eustatius tambe a drenta e torneo. Awe nos tin detayenan di entrega di premio i mas pòtrèt di premionan individual.
Kampion: Ekipo Swift;
Supkampion: Redskins;
MVP final: Alexander Rodriguez (Swift);
Kampion bate: Calten Daal (Terremoto) .714;
Kampion picher: Ray-Giorgio Bernabela (3-0);
Lider di homerun: Jevgenny Hendrik (Swift). 4.
Calten Daal (Terremoto) a bati pa average di .714 i bira kampion bate.
KORSOU VS SINT LUCIA
Wega ta start 7.30 pm
Portanan ta habri dor di 6'or
Fanátikonan ku Ticket VIP por parker na Festival Center i tuk Tuk lo hibanan Stadion Ergilio hato i lo transportá nan bèk pa Festival Center na momentu ku wega kaba.
MAS INFORMASHON DI SÒFTBÒL
Fanátikonan di Deporte Kòrsou, bontardi.Pabien na hungadó, dirigente i fanátiko di ekipo Swift ku a bira kampion Kopa ABC&S na Kòrsou i ekipo Ban Serio tambe su hungadó-, dirigente- i fanátikonan. Ban Serio a bira kampion ABC&S 50+ na Sint Maarten. Ta di 3 biaha sigí ku Ban Serio ta bira kampion di ABC&S 50+. Nan ta kampion di 2017, 2018, 2019, 2023 i 2024. Baranka a bira kampion na Kòrsou na 2022. Swift a bira kampion atrobe despues ku ekipo Cicoza a kita e título for di nan na 2024 na Sint Maarten. Emile Haswell a bini bèk komo manager di Swift i a logra e título. Emile tin 10 título di ABC&S ku Swift. Total Swift tin 14 titulo i ekipo Astros di Aruba ku no ta hunga ABC&S riba nivel di e hóbennan mas, tin 10 título. Den añanan 80 i 90 ta Astros tabata manda i tur e hungadónan di e tempu ei a bira grandi i ta den 50 i 60.
* * * * *
Bon públiko pa mira kopa ABC&S na Kòrsou. Tur dia tabatin yen di fanátiko pa mira e kompetensia entre e 12 ekiponan di Islanan ABC&S. Dos S debí ku tabatin tim di Sint Maarten i tim di Sint Eustatius. Dimes hungadó i fanátiko di e otro timnan ku no ta hungando ta keda wak wega na Van Engelen Ballpark. Na final tabatin un medio malkontentu di hungadónan di Happy Brothers, debí ku un hungadó di nan no a bira kampion bate. E tabatin averahe haltu, pero no tabata sufisiente turno. Kuerpo di umpire i skorernan pa medio di Game Changer i reglanan di ASA/USA Softball ta turno na bate ta konta i 2.5 turno na bate pa wega. Ta bon pa e próksimo aña e organisadónan pone pretu riba blanku kon ta bini na remarke pa bira kampion bate ets. Calten Daal di Terremoto a bira kampion bate i tabata kla pa entregá e kopa bèk si otronan ta haña ku e no a meresé. Calten Daal no ta wòri mes ku asuntu di kampion bate ets.
* * * * *
Na Sint Maarten ekipo Ban Serio mester a lucha formal pa gana di Marlins ku skor di 14-11 den final. Jair Josepha tabata grandi bayendo di 3-3 i 7 kareda empuhá di e 14 karedanan ku ekipo Ban Serio a nota. Defensa di Marlins no tabata bon i a kometé 7 eror loke e kousa e derota. E picher habridó di Marlins Luis Alcantara ku a bai henter e ruta a tuma 14 kareda di kual 9 tabata limpi. Ekipo Ban Serio a usa 4 picher, Miro Daal, Junny Wawoe, Michelangelo Boekhoudt i Ramon Cabrera. Ban Serio a terminá e torneo invikto ganando 3 wega den buelta regular i 2 wega den play-off. Ban Serio ta un kos hopi serio ora trata kopa ABCS 50+ i nan a gana 6 di e último 7 kampionatonan ABC&S ku a keda organisá.
* * * * *
Kampionato di Liga Streanan di Ayera a sigi normal djadumingu último huntu ku e weganan di Kopa ABC&S. Nos a topa ku sra. Marlene Obispo I nos kòmbersá un ratu di historia di Liga Deseo di Streanan Dj’ Ayera. Marlene ta fundadó di e liga aki ku a bira un kos serio despues ku partisipashon di vários hungadó veterano 35+. Ultimo añanan tin 50+ tambe pa esnan ku a bira mas grandi i no tin forsa pa kompetí mas ku hungadónan di 35+ di kual algun ainda ta kompeti den Sòftbòl Femenino Dòbel A. Djadumingu tabatin dos wega, Ekipo Tur Goso a gana di Shining Stars + ku skor di 11-2, Chilling Jaguar a gana di Eureka ku skor di 2-1.
* * * * *
Den Kopa ABC&S na Van Engelen Ballpark nos a mira masha hopi picher ku ta dominá e arte di tira duru den Sòftbòl, tira kambio i kurva den Sòftbòl. Nos a mira algun hungadó tambe den gran forma. Vários èks profeshonal tantu di Kòrsou komo Aruba. Nos ta puntra dikon no por lanta Sòftbòl Fastpitch Maskulino ku tabatin tantu éksito 50 i 40 aña pasá ku nos selekshon, un di e mihónan di region i nos tin hungadó ku por hasi e trabou i nos tin e pichernan ku mester ta dispuesto pa train si pa lanta e nivel. Hunga e Sòftbòl Maskulino Fastpitch na momentu ku no tin e Beisbòl Dòbel A òf mihó bisá ribe e dianan ku no tin Beisbòl Dòbel A. Nos ta keda te aki pa awe i te mayan ku Poder di Dios.
