ABC Stars i Ban Serio kampion Torneo Wim Felicia
WILLEMSTAD – ABC Stars a bira kampion den 60+ i ekipo Ban Serio kampion den 50+ di Torneo 50 aña Wim Felicia. E torneo a terminá djadumingu 6 di yüli den Frank Curiel Ballpark dilanti un públiko grandi inkluyendo ekiponan di Boneiru i bishitantenan di Aruba. E torneo a start djarason 2 di yüli den e parke meshoná. Promé ku e wega final di 60+ entre ABC Stars i Lions tabatin un seremonia kaminda a honra Wim Felicia i tambe Frank Curiel. Wim Felicia a risibí un plaka di mérito serka e ekipo Bonaire Stars enkabesá pa Lenny.
Despues di e seremonia ofishal Wim Felicia a tira e promé bala pa kuminsá e wega final. Den e wega final ekipo ABC Stars den bòm di e di 6 inning a bòltu skor di 6-5 pa hasi e wega 9-6 pa finalmente gana 9-7. Ban Serio a gana Jaws ku skor di 10-1 den e final di 50+. Despues di wega tabatin entrega di premio.
Ban Serio kampion di 50+.
Frank Curiel ta risibí plakaat serka Wim Felicia.
Fanátikonan di Deporte Kòrsou, bon día i felis siman. Wikènt kargá ku moveshon den Sòftbòl Slowpitch i tambe Beisbòl Veterano naturalmente. Torneo Wim Felicia a terminá djadumingu 6 di yüli na Frank Curiel Ballpark. Den Liga 50 dilanti un bon públiko ekipo Ban Serio a gana di Catpower Raiders ku skor di 3-0 i asina Ban Serio so keda invikto den kampionato di Liga 50. E pichernan Michelangelo ‘Galbao’ Boekhoudt i Gilbert Henrietta a faha ku otro durante henter e wega. E wega a bai 7 inning i e públiko presente a disfrutá di un tremendo partido di Sòftbòl.
* * * * *
Den Beisbòl Veterano ekipo Santa Maria Pirates ku tin un tremendo ekipo a dal Santa Rosa Memories relativamente fásil ku skor 10 pa 3 djasabra mèrdia na Vi Jansen Ballpark. Santa Maria a reforsá nan ekipo formal ku hungadónan nobo manera Yurendell de Caster, Rodney Riley, Luigi Alvarez, Emrit Volk i otronan. Evenon Martis ta tremendo picher di tur tempu den Little League i tambe den Beisbòl Dòbel A. Santa Maria tin rèkòrt di 2-0 na di dos lugá tras di Broncos ku tin un tremendo komienso di temporada ku rèkòrt di 3-0. Mester bisa ku Broncos a topa ku Otrabanda , Marlins i Santa Rosa. Ke men un fuerte i dos ménos fuerte. Broncos a haña Verney Jansen for di Santa Rosa Memories ku tin 5 hit den 8 turno den e 3 weganan. Thierry Goeloe èks Azucar tambe ta den Broncos e temporada aki.
* * * * *
Den otro wega djasabra den Beisbòl Veterano Broncos a gana Marlins 10 pa 3. Nos a traha e kolumna aki promé ku e weganan di djadumingu i naturalmente promé ku e weganan di Torneo Wim Felicia ku tin 50 aña pichando den Slowpitch. Ekiponan ku a klasifiká den 60+ tabata Lions, ABC-Stars, Jaws i Bonaire Stars. Nos ta keda pendiente pa resultadonan.
* * * * *
Tin rumornan fuerte ku e aktual presidente di BEVEKO Gilbert ‘Gibi’ Denisia lo tuma retiro. Gibi Denisia lo bai i laga e trabou pa otronan ku por hasi un mihó trabou. Nos a drenta den kontakto ku Gibi Denisia ku a bisa ku aña pasá a bin un protesta di parti di Yesterday kontra Santa Rosa. Despues ku Yesterday a pèrdè e protesta nan a apelá. Tantu e komishon di protesta komo apelashon a tarda un tiki i e preshon a bin riba e direktiva. E aña aki protesta atrobe i ta solamente dos ekipo a paga kontribushon e temporada aki. Direktiva ta pendiente pa e pagonan di kontribushon pa por kumpli ku e gastunan. En todo kaso nos ta pendiente pa wak ki dia Gibi ta entregá su retiro ofishal.
* * * * *
Nos tabata presente djarason i den wikènt na Torneo 50 Aña Wim Felicia i a topa dos Arubiano di Pura Sepa ku a saka un pòtrèt i pone riba facebook. Dos Arubiano representado Dushi Aruba den Torneo di Nos gran Amigo "Wim Felicia" un tremendo picher i hungadó di sòftbòl di tur tempu selebrando su di 50 aña hungando Sòftbòl. Johannes "Poy" Flanegin hungando pa e streanan di ABC i Tiko Loopstok representando e dushi Isla di Boneiru, tur dos tim a klasifiká pa semi-final djadumingu. Nos ta keda te aki pa awe i te mayan ku Poder di Dios.
