Apertura FDOK su ‘Siman Olímpiko 2023’
WILLEMSTAD - Durante di e siman di djadumingu 30 yüli awó, te ku djadumingu dia 6 ougùstùs 2023, Federashon Deporte Olímpiko Kòrsou (FDOK), ta organisá ‘Siman Olímpiko’. Ta trata aki di un siman, kargá ku deporte, unda ku 15 diferente federashon deportivo miembro di FDOK, lo tin nan evento i kompetensia nan, na diferente sitionan Kòrsou. Ta bon pa enfatisá ku FDOK lo traha konhuntamente ku FDDK pa asina hasi e evento aki posibel.
E siman lo konosé su apertura ofisial, djadumingu awó, dia 30 yüli 2023, ku un interesante wega di beisbòl, bálido pa e kampionato di FEBEKO, pa loke ta temporada 2023 den kategoria AA.
Lo bira e wega entre e 2 eterno rivalnan den beisbòl na Kòrsou, ku ta Wild Cats i Royal Scorpions. E wega aki ta programá pa mira akshon inisiando 7’or di anochi i lo hunga den Stadion Johnny Vrutaal na Rif.
E apertura di FDOK su Siman Olímpiko pa aña 2023, lo konta ku un desfile, ku ta kuminsá mitar di 6 atardi riba “parkeerplaats”di ACU, unda lo marcha direkshon Stadion di Rif.
Tantu promé i despues di e wega, lo tin animashon di e agrupashon musikal di momentu, “ONE FLAVAZ”, den stadion, kaminda ku tambe lo bai tin un bar i kushina bon surtí, ambiente sigurá i tambe premio pa fanátikonan.
Entrada pa persona ta kosta 10 florin, unda abo tambe ta mas ku bon biní, pa akudí ku famia i gosa di vakashon eskolar den un ambiente ameno, deportivo, sosial i familiar, kontribuyendo mesora tambe pa engrandesé deporte riba nos isla.
Pues FDOK i deporte tin un sita ku bo, djadumingu awor!!
%20copy.jpg)
