Curtje Doran Kevin Moesquit i Yurendell de Caster lo firma ku Santa Maria
WILLEMSTAD- E hungadónan Curtje Doran, Kevin Moesquit i Yurendell de Caster lo firma ku Santa Maria Pirates un ora pa otro. Curtje Doran i Kevin Moesquit tabata temporada pasá den Royal Scorpions i Yurendell de Caster a hunga den Wild Cats e último añanan. Tur 3 hungadó a lanta ku Santa Maria for di Little League i lo ta bèk ku nan ekipo.
Curtje Doran di Royal Scorpions lo firma ku Santa Maria den e dianan benidero.
Curtje Doran tabata ku Santa Maria den Beisbòl Dòbel A semper, pero a bai Royal Scorpions despues ku su tata a pasa di Santa Maria pa Royal Scorpions. Kevin Moesquit tin dos aña den Royal Scorpions despues ku ela stòp di hunga Beisbòl Profeshonal den eksterior. Yurendell de Caster tabata pendiente di un aserkamentu serio di Wild Cats, pero esei no a tuma lugá. Yurendell tin hopi adén ainda, apesar ku elo kumpli 43 aña den luna di sèptèmber benidero. Yurendell de Caster ta keda un dje batiadónan mas peligroso den Beisbòl Dòbel A i ta entre e lidernan den kareda empuhá di nos Beisbòl último temporadanan. Santa Maria lo bira un dje kandidatonan pa bai final, pero mester drecha nan picheo.
Yurendell De Caster un tempu den Santa Maria Pirates lo bai bèk. E tabatin 4 aña den Wild Cats.
Fanátikonan di Deporte Kòrsou , bon dia. Torneo Hope a start djabièrnè awor 1 di aprel. Djamars tabatin e último reunion na sede di FFK. Pa loke ta trata Torneo The Brothers di Beisbòl Veterano, Azucar ku picheo di Raymond Soerka a gana Vosama 9 pa 6. Isla Crackers a gana Marlins 7 pa 3. Stanford Landburg a gana pa Isla i Lando Gerard a picha i pèrdè pa ekipo Marlins. Quality Stars a gana Marchena fásil ku picheo di Dayron Puriel. Evenon ‘Nene’ Martis a tira den relevo pa Quality. Santa Maria a gana Santa Rosa den un gran enkuentro 8 pa 6.
* * * * *
Torneo The Brothers ta sigi djasabra awor ku dos wega na Tata Beaumont Ballpark. Den e promé wega pa 13.00’or ekipo The Brothers ta hunga kontra Isla Crackers i despues pa 15.30’or ta sigi Santa Maria kontra Marchena. Djadumingu 3 di aprel ta 13.00’or Marlins kontra Azucar i despues Isla Crackers vs Vosama. E timnan ta repartí den 2 pul i tin tur indikashon ku The Brothers i Isla lo klasifiká den Pul A. Den e otro pul tin Quality Stars i Santa Maria ku lo klasifiká. Pul A tin The Brothers, Marlins, Isla Crackers, Azucar, Vosama. Pul B ta Quality Stars, Santa Rosa, Marchena i Santa Maria.
* * * * *
Stichting Internationale Politie Sportweken (SIPS) tin un torneo di Sòftbòl Komersial ku lo hunga dianan 4, 5, 11 i 12 di yüni den Stadion Post 6 na Rio Canario. E torneo ta unu di 40+ i organisashonan por djòin otro. Ekiponan por tin un òf mas hungadó femenino riba nan lista. Partisipashon na e torneo ta kosta solamente 100 florin. Pa mas informashon por tuma kontakto ku Geralton ‘Tom Tom’ Martha na number di telefon 519-1899. Despues di Hope kaminda lo tin 40+ komersial pa di promé biaha, lo mira ku e interes lo krese pa hungadónan 40+. E interes pa 40+ di e tradishonal ambiente riba djamars i djaweps na Van Engelen Ballpark a baha i dirigentenan lo bai apoyá e liga aki pa e krese. Beisbòl Veterano tin 12 ekipo, tabata 13, i ta kresiendo ketu bai. Ke mèn ta basta hungadó 40+ tin den forma ku por krese Sòftbòl 40+ bèk.
* * * * *
Hopi moveshon sorpresa na kaminda den Liga 50 di Sòftbòl. Interes ta grandi mes mes pa e picher Edison Sambo ku ta agente liber. Edison Sambo a picha den gran forma mes ku Jandoret Raiders durante Torneo Amstel Bright ku a terminá djasabra último. Ekiponan Ban Serio i Pitufos ta duru tras di Edison Sambo. Manera ta konosí, Gilbert ‘Gibi’ Henrietta a pasa pa ekipo Baranka den Liga 50 pa temporada 2022. Gibi tabatin 3 temporada ku Marlins (2019, 2020 i 2021) i promé ku esei 4 temporada ku Pitufos promé ku ela hunga un temporada ku ekipo Ban Serio den Liga 50 na 2014. Temporada 2015 Gibi a pasa pa Pitufos i keda te ku 2018. Galbao Boekhoudt manera ta konosí a pasa pa forma parti di Marlins, despues di dos aña den ekipo Ban Serio.
* * * * *
Nos tabata presente pa mira wega di Beisbòl Veterano entre Santa Maria i Santa Rosa djadumingu último na Tata Beaumont Ballpark. Nos a mira varios hungadó di Bulldogs repartí den ekiponan Santa Maria i Santa Rosa. Den Santa Maria nos a mira hungadónan Rayon Samuel i Signald Paz. Den Santa Rosa tin Djuric Pietersz i Lester Victoria parse, pero nan no tabata den akshon djadumingu último. Un dje gran pichernan di Beisbòl Dòbel A di último añanan Ramses Jamanika a mira akshon pa Santa Rosa. Hungadónan di Bulldogs ketu bai ta lamentá kon e kiebro di e ekipo a bai i nan tabata ke keda huntu, pero ya....
* * * * *
Beisbòl Dòbel A lo tin un torneo warm-up den e promé wikènt di yüni. Hubenil ta kuminsá promé wikènt di mei. Pa otro siman lo tin un reunion general ku representante di ekiponan pa por pone fechanan ofishal pa torneonan warm-up i start kampionato. Pa loke ta play-off Little League nos tin informashon ku den Senior League tin sigur 7 pa 8 hungadó ku ta kandidato fuerte pa firma. Selekshon Senior Pabou tin sigur 6 hungadó ku a partisipá na kampionato Mundial di Williamsport di 2019.
