Ekipo Lions 60+ a entregá unifòrm na hungadónan
WILLEMSTAD – Djarason 18 di mei tabatin entrega di unifòrm na hungadónan di ekipo Lions 60+. E entrega di unifòrm a tuma lugá na Cassandraweg, kas di un dje grandinan di ekipo ku ta Clifford den Hartog. Ekipo Lions wikènt pasá a klousurá nan torneo tradishonal ku a konta ku partisipashon di tur ekipo di Liga 60+. Lions ta un ekipo hopi eksitoso den 60+ ku ta pone énfasis riba kosnan soshal, biahamentu i despues ta bini e ganamentu si tin mester. Na desèmber 2021 Lions a bai sera aña na Aruba i pa novèmber 2022 e ekipo lo bai partisipá na un torneo 50 i 60 + na Sint Maarten.
LIONS
Un dirigente di Lions a konta nos un historia kòrtiku di e ekipo ayera. “Lions a keda fundá 24 aña pasá i nos a kuminsá den Liga 40. Einan nos a bira kampion 1 aña i supkampion 3 aña.
Despues di Liga 40 nos a bai Liga 50, den kual nunka nos a sali kampion, pero na 2 okashon a sali sup kampion. Den liga 60 nos ta hungando 7 aña kaba, di kwal 2 biaha nos a sali supkampion. Meta prinsipal di e ekipo ta pa nos ta huntu den un ambiente amikal, sin stress anto sikiera bai den eksterior un biaha pa aña. Aunke nos ke gana semper, pero si nos pèrdè nos ta keda mes kontentu”, un dirigente di Lions a terminá e historia kòrtiku.
MAS INFORMASHON DI SÒFTBÒL SLOWPITCH
Na 2019 Torneo Hope a terminá riba un djadumingu 28 di aprel ku weganan final den 5 kategoría. Den kategoría COED SBAB a bira kampion ganando MCB 14-4. Den Soshal Plus e ekipo Damen a gana di SOAB 6 pa 1. Den Challenger tambe SBAB a gana pa bira kampion. Nan a gana FDDK 10 pa 8 den e gran final. Pa loke ta e sekshon Femenino, MCB a bira kampion derotando SBAB 2-1. Omni a bira kampion den e último wega di djadumingu ganando di MCB 11-5. E aña ei tantu MCB komo Aqualectra a hasi donashon na Curacao Little League Sòftbòl. Ke mèn SBAB a logra dos titulo. MCB un titulo, Damen un titulo i Omni un titulo. Varios ekiponan ku chèns di ripití nan título kampion djadumingu awor.
* * * * *
Sòftbòl 50+ ta pendiente pa start dia 4 di yüni na Van Engelen Ballpark. Artemisia ta konfirmá Cedric Curiel (èks Pitufos), Juan Miguel ‘Ito’ Trinidad i Gilbert Bernadina. Artemisia a yama danki na Frensel ‘Jo’ Marchena, Clifton ‘Kabibi’ Ostiana i Sherwin ‘Kieu’ Floranus i Rene ‘Cuco’ Fermin. Direktiva di Liga 50 ta pendiente pa reuni ku dirigentenan di Van Engelen Ballpark. Liga 50 ke hunga dos buelta kompletu, kaminda tur ekipo ta hunga 18 wega, pero esei ta parse difísil den 2022.
* * * * *
Ekiponan Marlins di Liga 50 i ekipo Lions di Liga 60 lo move pa Sint Maarten den luna novèmber. Ekipo PItufos lo ta na Aruba den e torneo internashonal yamá Golden Athlete Caribbean Championshipo Series ku partispashon di ekiponan di Kòrsou, Aruba, Sint Maarten, República Dominicana. Tin diferente kategoria, 50+, picheo habrí, 60+. E torneo ta start dia 25 di mei i terminá dia 28 di mei na Flatstone Ballpark na Aruba.
* * * * *
Stichting Internationale Politie Sportweken (SIPS) tin un torneo di Sòftbòl Komersial ku lo hunga dianan 4, 5, 11 i 12 di yüni den Stadion Post 6 na Rio Canario. E torneo ta unu di 40+ i organisashonnan por djòin otro. Ekiponan por tin un òf mas hungadó femenino riba nan lista. Partisipashon na e torneo ta kosta solamente 100 florin. Pa mas informashon por tuma kontakto ku Geralton ‘Tom Tom’ Martha na number di telefon 519-1899. Despues di e éksito di Torneo Hope 40+ komersial, e interes pa 40+ di komersial a krese formal. Parse ku den e torneo di SIPS lo tin Polis, MCB, Flow, Aqualectra, SDKK, SVB, Isla ets. Tene kuenta ku ekiponan por djòin.
* * * * *
E siman aki un dje grandinan di Sòftbòl Slowpitch tabata di fiesta. Ta trata aki di Willem ‘Wim’ Felicia, un dje pichernan mas eksitoso di Sòftbòl Slowpitch den historia. Wim ta pendiente di ekiponan di Aruba, Boneiru i Kòrsou den Liga 40, 50 i 60 pa su torneo. E torneo lo tuma lugá dianan 1, 2 i 3 di yüli na Frank Curiel Ballpark. Ekiponan di 40, 50 i 60 lo hunga ku bala moli den e torneo. Liga 60 a pasa pa bala moli i e moveshon aki a bira un éksito kompletu. Frank Curiel Ballpark ta un parke net pa Liga 60 i Liga 50 ku bala moli tambe por bisa algu pa purba den futuro. Nos ta keda te aki pa awe.
