Historia Jandoret Raiders 28 aña di eksistensia i mas informashon di Sòftbòl

Historia Jandoret Raiders 28 aña di eksistensia i mas informashon di Sòftbòl

WILLEMSTAD – Djaluna 15 di yanüari Jandoret Raiders a selebrá 28 aña di eksistensia. Jandoret a keda fundá na 15 di yanüari 1996 . Riba e fecha menshoná hungadó, dirigente i fanátikonan a bini huntu despues di training. E ekipo a train na Maracana pendiente pa hunga Sòftbol 50+ den Amstel Bright Premier Cup.Manera primintí awe nos lo sigi ku e historia di Jandoret Raiders.

KAMPION

Jandoret Raiders a sali kampion na tres okashon den Slowpitch. Na 1996 partisipando pa promé biaha na un liga, e ekipo di Jandoret a bira kampion Liga Trai Seru 1996, derotando Happy Time 2 pa 1 den un seri di tres wega. Tabata un final emoshonante, un Cirilo Chirino Ballpark kargá ku fanátiko. Por bisa kasi Jandoret kompletu tabata na Cirilo Chirino, pa wak nan ekipo bira kampion. Despues di e título a sigi un selebrashon formal den Jandoret ku optògt i brindis na sede di Jandoret Raiders, ku ta Kaya Jùfrou Polita Dirksz 16 na Jandoret.

‍

Despues na komienso di aña 1997 tabatin un asina yamá warm-up. E promé torneo warm-up ku tabata paga bon plaka kèsh. Ta trata di e torneo Mr. Bug, organisá pa Danger. Jandoret ketu bai ku un ekipo nòrmal a titulá kampion di e torneo, ganando di e super ekipo Dalpega den final, pa asina risibí un total di 1500 florin kèsh for di man di e organisadónan.Despues di 1997 a dura te ku 2001 den luna di desèmber, pa Jandoret Raiders den nan promé biahe pa eksterior sali kampion di un torneo organisá pa Amstel na Boneiru, ku partisipashon di ekiponan fuerte di Boneiru. Tabata reina un ambiente tur afó i sigur esnan ku a hasi e biahe ku ta mas o ménos 30 persona, di kual 18 ta hungadó, no por lubidá esaki hamas. Mester hasi menshon tambe di e super trato ku Jandoret Raiders a haña di Pim Fangman, gerensia di Amstel na Boneiru.

LIGA TRAI SERU

Liga Trai Seru ta e liga ku Jandoret a kuminsá den dje. Jandoret ta for di 1996 den e liga. Jandoret a hunga den final 3 biaha i sali kampion na un okashon.Pa nos resumí: 1996 Jandoret Raiders kampion.

1997 Jandoret no a klasifiká, debí na e sistema di pul. Jandoret tabatin rekòrt di 14-12 i ekiponan ku rekòrt di 10-16 i hasta 5 –17 ku tabata den un pul no fuerte a klasifiká.

1998 Jandoret ta klasifiká den e 6 nan, despues den e 4 nan, pero nan ta keda eliminá den un final dramátiko den tres wega pa Fria Bombers. Jandoret ta keda na di 4 lugá.

1999 Jandoret ta pèrdè den final kontra di Catpower i sali supkampion.

‍

2000 Jandoret ta klasifiká den e 4 nan, pero ta pèrdè den dos wega pèrtá kontra Carpatula i mester a konformá su mes ku e di tres lugá.

2001 Raiders ta klasifiká pa final i ta pèrdè kontra Run Runners den final, pa asina bira supkampion.

2002 Jandoret Raiders a sali den e promé kuaternan.

2003 semi-final Liga Trai Seru.

2004 semi-final Liga Trai Seru.

2005 supkampion Liga Un i Tur.

2006 di tres lugá Liga Un i Tur.

2008 kampion Liga Un i Tur.

2009 kampion Liga Un i Tur.

2010 di tres lugá Liga Un i Tur.

2011 di sinku lugá Liga Un i Tur.

2012 di 3 lugá Beisbòl Veterano.

2013 supkampion Beisbòl Veterano.

2014 te ku 2018, 5 aña konsekutivo kampion Beisbòl Veterano.2018 kampion di Reino di Beisbòl Veterano.

Liga 50,2017 pa 2022 kampion Beisbòl Veterano.

‍

Fanátikonan di Deporte Kòrsou bon dia. Nos tei atrobe kargá ku informashon di beisbòl i sóftból. Djaluna den oranan di mainta e top prospect di Kòrsou Curley Martha a firma un kontrakt pa hunga Beisbòl Profeshonal ku ekipo di Texas Rangers. E firmamentu a tuma lugá den kompanía di skout i famia di hungadó i prensa. For di chiki tabata pinta ku Curley Martha lo a bira un hungadó ku lo yega hopi leu.  Curley Martha a partisipá na World Series den Little League i den Senior League. Curley Martha a bira supkampion di Mundu den Senior Little League i kampion di Mundu den kategoria Senior. Eksito pa Curley Martha den su karera komo profeshonal.

Djamars Nathaneal Cijntje lo firma den oranan di atardi i mas den oranan di anochi Clay Winklaar lo firma. Curley Martha a firma komo shortstop. Nathaneal Cijntje lo firma komo outfielder i hungadó Clay Winklaar tambe komo outfielder. Clay Winklaar meskos ku Curley Martha a bira supkampion di Mundu den kategoría Little i kampionato di Mundu den kategoría Senior, respektivamente aña 2019 i di Senior na 2023.  Eksito na e dos hungadónan aki i nos lo sigi nan pasonan djaserka.

Preparashonnan ta sigi pa partisipá ku dos selekshon di nos den eksterior. Ekipo B lo move pa Intercontinental na Baranquilla, Colombia i ekipo Curacao Suns òf mihó bisá un selekshon di Kòrsou lo ta na Miami di 1 pa 9 di febrüari. Nos Pais Televishon a laga propaganda kore i nan lo transmití tur e weganan di e Serie del Caribe. Fanátikonan por sinta trankíl na kas pa sigi e weganan di Serie del Caribe ku lo bira kayente i a nivel ta haltísimo. Aña pasá nos selekshon a laga bon impreshon atras apesar ku nan a keda nèt for di e promé 4-nan.

Kopa ABC pa loke ta trata 50+ lo tuma lugá na Aruba, Kopa ABC&S di e hóbennan lo ta na Sint Maarten. Classico 40+ lo ta na Boneiru. 60+ tambe lo ta na Aruba pareu ku e 50+ riba nivel ABC&S. Na Kòrsou lo tin e torneo. E Golden Athlete Caribbean Championship Series lo tuma lugá na Kòrsou e aña aki. Na mei 2023 e torneo a tuma lugá na República Dominicana i tabata Jaws ku a bira kampion den 50+. Ekiponan di Kòrsou Pitufos i Baranka tambe a partisipá na e torneo huntu ku algun ekipo di Aruba. Parse ku Pitufos lo organisá e torneo ku lo tuma lugá den Stadion Post 6. Nan tabata negoshando ku Van Engelen Ballpark pa yega na un akuerdo riba alrededó di e fecha di Hemelvaart. Riba e fecha menshoná no tin aktividat riba e parke.

Deporte Kòrsou tabata presente na firmamentu di Curley Martha den Renaissance den oranan di mainta di djaluna. Jesus ‘Chu’ Halabi, un skout pa mas ku 40 aña tambe tabata presente durante firmamentu. Curley Martha, mama, tata i ruman hòmber taba0ta presente. Nos a nota presensia di Yurendell De Caster ku a train Curley Martha for di dia e tabatin 13 aña. Curley Martha a firma pa un suma respetá i ta di dos riba e lista di hóbennan agente liber ku a firma di tur tempu di Kòrsou. Den oranan di atardi organisashon di Cincinnati Reds a firma Chendrion Martinus, Peson Revierre i Ryjeteri (Charlie) Merite.  Djamars 16 di yanüari Nathaneal Cijntje, Clay Winklaar i otronan ariba menshoná lo firma.

‍

Chu Halabi skout di Texas Rangers pa hopi aña a duna kátedra di skouting i e realidat den e mundu di Beisbòl Profeshonal durante un entrevista ku Glenn Thomas den Bo Tra Merdia. Un splikashon masha real i remarkabel ta ku Chu no a firma masha hungadó kompará ku otro skoutnan i mas ku 50% ku Chu a firma a yega Grandes Ligas ku ta un porsentahe haltísimo, mirando ku di kada 100 hungadó ku firma profeshonal ku un organisashon di MLB ta 3 so ta yega e Major League Baseball. Chu Halabi a primintí ku elo bin duna un charla na Kòrsou pa tur esnan envolví den Beisbòl. By the way, Chu a nase na Kòrsou den e bario di Marchena. Ela bira polis na Kòrsou i despues bai biba na Aruba i traha 9 aña komo polis. Ela menshoná asta algun nòmber di su klas ku tabata entre otro Stanley Willems, Ronny Lodowica i Ronald Pang. Te mayan ku Poder di Dios.

‍